Gipanalipdan sa Wala Damhang Panghitabo
Kami nasayud nga ang Ginoo mobantay kanamo sa among pagbiyahe ngadto sa templo. Apan wala kami makahunahuna kon unsa ka dako ang among pagkinahanglan sa Iyang panalipod.
Human sa 61-ka oras nga biyahe sa bus, ang among pundok sa mga batan-on miabut sa Templo sa Manila Philippines. Agig pagsaulog sa ika-20 nga anibersaryo sa templo, ang kabatan-onan sa stake sa Davao migahin og siyam ka bulan nga pagpangandam alang sa biyahe, nagtambong sa mga klase sa family history, aktibong miapil sa mga kalihokan sa Simbahan, nagsiksik ug nag-andam sa mga ngalan sa pamilya, ug nagtabang nga makatigom og mga pundo alang niini nga biyahe. Dihay kadasig sa palibut samtang ang 63 kanamo nanganaog sa bus nianang gabii sa Lunes. Sa patron house sa templo, mipahigayon kami og dako kaayong family home evening, uban sa musikal nga mga pasundayag ug espiritwal nga mga mensahe, ug dayon nangatulog.
Sulod sa nagsunod nga duha ka adlaw ang mga batan-on gibunyagan ug gikumpirmahan alang sa kapin sa 2,000 sa ilang mga katigulangan, naghatag niadtong mga katigulangan og higayon sa pagdawat sa gipahiuli nga ebanghelyo. Wala kami mobati og kagutom o kakapoy samtang nagtrabaho kami kada oras didto sa templo. Ang Espiritu kusog kaayo. Pipila sa mga batan-on adunay kasanag sa mga panagway; ang uban adunay luha sa kalipay diha sa ilang mga aping.
Sa wala madugay panahon na sab sa pagpamauli. Pipila ka minutos sa among pagbiyahe, ang malinawon nga kahilum sa bus nabalda sa mga serina sa police. Sa gawas, gilibutan kami og mga patrol car, diin mipugos kanamo sa paghunong. Dayon among nakita ang mga sniper nga police naglibut kanamo, nagtion sa pusil. Niadtong makalilisang nga mga higayon, among nasayran nga ang mga pasahero sa bus mga pipila ka pye sa among atubangan gibihag, ug gigamit sa mga police ang among bus isip taming!
Kaming mga lider mihimo kutob sa among mahimo aron sa pagpakalma sa matag usa, apan ang pipila misugod sa pagkatarantar. Taliwala sa kaguliyang ang police mimando kanamo sa paghapa sa salog. Human sa pipila ka makahahadlok nga minutos, among nadungog ang usa ka tawo nga nagsinggit kanamo sa pagpahawa sa bus. Nagsunod sa mga mando, kami nagdali sa pagkanaog sa bus ug miadto sa kasikbit nga bakanting building.
Sobra sa usa ka oras, nanglingkod kami sa ngitngit nga building, nag-ampo ug naminaw sa buto-buto sa pusil. Sa katapusan gisultihan kami nga mahimo nang mobalik sa bus. Ang pinusilay mihunong, duha ka mga gibihag ug duha ka mga hijacker ang namatay.
Gikuyawan kamig maayo samtang nagpadayon kami sa among biyahe. Sa dihang ang kahadlok nagkaanam og kawala, bisan pa, kami nakaamgo nga kami napanalipdan. Walay usa kanamo nga nasakitan, ug kami nasayud nga ang Ginoo nagbantay kanamo. Gibati namo ang balaanong presensya ug naghunahuna nga tingali ang pipila niadtong among gibunyagan diha ra sa duol.
Akong nahunahunaan ang kasulatan nga nag-ingon, “Ako ang Ginoo, mapugos sa pagtuman kon kamo mobuhat sa unsa nga Ako misulti” (D&P 82:10), ug ako nalipay nga ang Ginoo mituman sa Iyang mga saad. Samtang kita nagtuman sa mga sugo ug magpadayon sa matinud-anon nga paagi sa atong mga katungdanan, lakip na ang templo ug family history nga buluhaton, mahimo kitang takus sa mga panalangin sa Ginoo—lakip na ang Iyang panalipod kon kini gikinahanglan kaayo nato.
Paghulagway pinaagi ni Roger Motzkus