Naggiya sa Agianan
Sa dihang ang mga anak nga pamilyang Calderón mipasakop sa Simbahan, sila ang migiya sa agianan ngadto sa dakong mga kausaban sa ilang pamilya.
Ang mga anak sa pamilyang Calderón mipasiugda sa usa ka dakong kausaban alang sa ilang pamilya. Si Jared, nag-edad og 15, mao ang unang mipasakop sa Simbahan, gisundan paglabay sa usa ka tuig sa iyang igsoong babaye, si Angie, 13. Ang ilang mga ginikanan mipasakop sa Simbahan tulo ka tuig human sa bunyag ni Angie.
Sa sinugdanan kining pamilya nga gikan sa Costa Rica walay ideya unsa ka bililhon ang ebanghelyo ni Jesukristo sa pag-usab sa ilang mga kinabuhi Gipaila-ila sila ngadto sa Simbahan sa usa ka miyembro nga pamilya niadtong 2002, ug sulod sa daghang mga bulan human niana ang mga Calderón kanunay nga moimbitar sa mga misyonaryo sa ilang panimalay aron sila makat-on og dugang. Sa ilang pagbuhat sa ingon, ang pamilya nakasinati og kausaban—tinuod nga pagkakabig.
Usa ka Buhong nga Espirituhanong Kinabuhi
Sa wala pa magpasakop ang pamilya sa Simbahan, ang mga Calderón nabalaka nga si Jared ug Angie maglisud sa pagkuha og moral ug espirituhanon nga edukasyon sa kalibutan nga mipakaubos sa relihiyon.
Ang ebanghelyo, nga nakaplagan sa mga Calderón, may mga tubag sa mga problema nga ilang giatubang. “Sa dihang nakasabut kami sa ebanghelyo ug nakasugod sa pagsunod sa mga pagtulun-an niini, kana nga kahibalo nakapausab sa pamaagi sa among pagpuyo,” miingon si Brother Calderón. “Among nahibaloan kon kinsa kami ug unsaon namo nga makabalik ngadto sa atong Langitnong Amahan. Tungod sa among nakaplagan, nakapuyo kami og mas buhong nga esprituhanong kinabuhi.”
Dili kanunay nga sayon ang pagdawat dayon sa ilang nakat-unan gikan sa mga misyonaryo, apan sa dihang ilang gisulayan ang mga baruganan sa ebanghelyo, nakabaton sila og pagpamatuod niini. “Samtang nagkat-on kami sa mga sumbanan sa ebanghelyo,” miingon si Sister Calderón, “naningkamo kami sa pagpabilin diha sa mga utlanan sa pagkatakus. Mihunong ako sa pag-inom og kape. (Ug nakainom ako og daghang kape kaniadto!) Mihimo kami og mga tumong isip pamilya nga dili na mamalikas, mabination nga pagsultihanay sa usag usa, ug sa pagsunod sa ubang matarung nga mga baruganan.
“Ang kinadak-ang sakripisyo nga among nahimo mao ang among garbo,” siya mipadayon. “Kinahanglan nga makat-on kami sa pagpaubos, ug sa dihang misulay kami sa pagkat-on ug pagpuyo uban sa kamapainubsanon, nadawat namo ang daghang mga panalangin ug nakasinati og dakong paglambo isip mga indibdwal, isip managtiayon, ug isip usa ka pamilya.”
Pagdesisyon nga Magpabunyag
Si Jared Calderón mao ang una sa iyang pamilya nga mipasakop sa Simbahan; siya gibunyagan niadtong Hunyo 2003. Si Angie misunod pagka Hulyo 2004. Ang ilang mga ginikanan gibunyagan niadtong Abril 2007. Ug sa katapusan, human ang kinamanghurang sakop sa pamilyang Calderón, si James, nag-edad og walo niadtong 2007, siya gibunyagan.
Ang pamilya nag-andam dayon alang sa dugang nga mga pakigsaad ug mga ordinansa sa templo. “Nasayud kami nga ang bunyag mao lamang ang unang lakang,” miingon si Sister Calderón. “Naghan-ay kami og tumong nga mopadayon sa paglambo, lakip na ang pag-adto sa templo ug pagbugkos isip usa ka pamilya aron kami sa umaabut makapuyo uban sa atong Langitnong Amahan.”
Paglantaw ngadto sa Templo
Agig pangandam alang sa ilang pagbugkos didto sa templo, ang tibuok pamilya migahin og panahon sa pag-ampo ug pagpuasa. Si Jared miapil usab og pipila ka higayon sa mga pagpahigayon og mga bunyag alang sa patay. Dayon pagka Mayo 10, 2008, ang tibuok pamilya nabugkos didto sa Templo sa San José Costa Rica.
Nahinumdom si Jared sa iyang gibati nianang higayuna. “Sa akong pagsulod sa sealing room, ang Espiritu gamhanan kaayo. Husto kaayo ang gibati nga maadto didto uban sa akong pamilya,” siya miingon.
Ang iyang igsoong lalaki, si James, nahinumdom nga naghulat og dugay kaayo una pa siya makasulod sa sealing room, apan, siya miingon, kadto igo gayud,: “gibati nako ang tumang kamaya ug kalipay. Nagpadayon ang akong kalipay nga nasayud nga akong ikauban ang akong pamilya sa kahangturan.”
Ang Impluwensya sa mga Pakigsaad
Samtang ang pamilya mihimo og daghang mga kausaban sa ilang mga kinabuhi aron sa pag-andam alang sa mga ordinansa sa templo, ilang nakaplagan nga ang mga ordinansa, sa pagkatinuod, nag-usab kanila. Sama pananglit, si Angie nahinumdom nga sa wala pa ang ilang pamilya mabugkos, iyang gisultihan ang iyang mama nga dili siya gustong magpakasal sa templo. “Ako wala pa makasabut sa mga saad kaniadto,” siya miingon. “Karon akong nakita ang mas dako nga talan-awon, ug ako adunay usa ka mas dakong tumong. Gusto ko nga maminyo sa templo. Gusto ko nga makabaton og akong kaugalingong pamilya sa umaabut ug makapuyo uban kanila sa kahangturan.”
Laing kausaban nga nasinati ni Angie mao ang nagkadugang nga tinguha sa paghimo og family history ug buluhaton sa templo alang sa iyang nangamatay nga mga katigulangan. Siya ug ang iyang inahan mibisita sa family history library sa ilang lokal nga balay-tigumanan aron sa pagsiksik niini nga mga ngalan. Si Angie adunay dakong pagbati sa gugma alang sa iyang mga katigulangan. Kanunay siyang andam sa paghimo og family history nga buluhaton.
Si Jared nakamatikud usab og kausaban sa iyang kaugalingon sa paagi sa iyang pagtagad sa iyang pamilya. Siya mipasabut: “Kon kamo moadto sa templo, inyong makita ang mga butang nga labaw pa ka klaro. Gibati nako ang Espiritu nga migiya kanako sa pagtagad sa akong mga ginikanan ug mga igsoon nga labaw pa ka maayo, aron magpabilin ang maayong relasyon uban kanila. Adunay mga higayon nga bation nako ang kalagot ug nagtuo nga sayop ang laing tawo, apan kon mahinumduman nako nga kami usa ka mahangturon nga pamilya, akong maamgohan nga dili angayan nga lalison ang gagmay nga mga butang.
“Bisan pa niana,” siya midugang, uban sa mabiay-biayon nga pahiyom, “kon gusto kong mopuyo uban kanila sa kahangturan, kinahanglan nga mag-anad ako uban nila.”
Dako nga Kalipay
Ang mga Calderón nakaamgo nga ang paghimo og mga pakigsaad dili pa diay igo—mahinungdanon usab ang paghupot niini. Sila naningkamot sa pagbasa kanunay sa mga kasulatan ug kanunay nga maghiusa sa pag-ampo. Sila mosimba ug motuman sa ilang mga calling ug mosuporta sa usag usa. “Kadtong mga butanga nakatabang kanamo nga makahimundom sa among gisaad ug nakadawat kami og daghang mga panalangin, sa espirituhanon og temporal nga paagi,” miingon si Sister Calderón.
Ang pamilya nagpadayon ug magpadayon sa pag-atubang og mga hagit sa ilang kinabuhi, apan ang mga pakigsaad nakahimog dakong kalainan sa ilang panan-aw. Sa paghinumdom sa mga desisyon nga nahimo sa iyang pamilya, si Brother Calderón mibati og dakong kalipay: “Samtang kami nagkat-on kabahin sa ebanghelyo ug nagsunod niini, among napalambo ang konbiksyon, ang kasigurohan, nga kini mao ang ebanghelyo ni Jesukristo, ug ang tunong niini nakatabang kanamo sa husto nga paagi sa paghimo og importante nga mga desisyon. Ang among pamilya nagkaduol ngadto sa Manluluwas. Kami miuswag sa espirituhanon nga paagi, ug wala pa gayud kami sukad mobati og ingon niini nga kalipay sa among mga kinabuhi.”
Mga litrato pinaagi ni Melissa Merrill
Si Jared (sa wala) mao ang una sa mga Calderón nga mipasakop sa Simbahan, niadtong 2003. Ang iyang igsoong babaye, si Angie (ubos), misunod paglabay sa usa ka tuig. Ang ilang mga ginikanan ug manghud nga lalaki mipasakop pagka 2007.
“Wala pa gayud kami sukad sama niini ka malipayon,” miingon si Brother Calderón mahitungod sa mga kausaban nga nahimo sa mga pakigsaad sa ebanghelyo ngadto sa iyang pamilya.