Unsa ang Atong Gituohan

Si JesukristoMao ang Sentro sa Plano sa Langitnong Amahan

Ang Langitnong Amahan nag-andam og plano sa pagtabang kanato nga mahimong sama Kaniya ug aron makadawat og hingpit nga kalipay. Siya miingon, “Mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).

Isip espiritu nga mga anak sa atong Langitnong Amahan, kita nagpuyo sa Iyang presensya sa atong kinabuhi sa wala pa dinhi sa yuta. Kini gitawag nga atong kinabuhi sa wala pa dinhi sa yuta. Kitang tanan nagpundok sa dako nga Konseho sa Langit diin ang atong Langitnong Amahan mipresentar sa Iyang plano ngari kanato: Kita moanhi sa yuta, nga atong kinabuhi dinhi sa yuta, ug magbaton og pisikal nga lawas. Kinahanglan usab natong “masuta” kon “kita [mo]buhat ba sa tanan nga mga butang bisan unsa … ang [i]sugo sa Dios ngari [kanato]” (Abraham 3:25). Usa ka Manluluwas ang kinahanglang motubos sa mga sala sa tanang katawhan, naghimo kini nga posible para kanato nga maghinulsol ug malimpyo pag-usab. (Tan-awa sa Alma 42:23–26.)

Kita mipili sa pagdawat sa plano sa atong Langitnong Amahan ug ni Jesukristo isip atong Manluluwas. Tungod sa Pag-ula ug Pagkabanhaw sa Manluluwas, kita makabalik sa presensya sa atong Langitnong Amahan ug mopuyo sa matang sa kinabuhi nga Iyang gipuy-an.

1. Nag-abut kita didto sa dakong Konseho sa Langit uban sa atong Langitnong Amahan aron maminaw sa Iyang plano.

2. Ang plano sa Ginoo nagkinahanglan og Manluluwas aron sa pagtubos sa atong kalibutanong mga sala. Ang Dios nangutana, “Kang kinsa Ako mopadala?” (Abraham 3:27).

3. Si Jesuskristo, ang Kinamagulangang Anak sa atong Langitnong Amahan, nakahibalo nga kita kinahanglang gawasnon nga mopili sa pagsunod sa Dios. Si Jesus miingon, “Ania Ako, ipadala ako” (Abraham 3:27). “Amahan, ang imong pagbuot mao ang matuman, ug ang himaya imo sa kahangturan” (Moises 4:2).

4. Si Lucifer, nga usa usab ka anak sa Dios, wala motuo nga kita kinahanglang gawasnon nga mopili sa pagsunod sa Dios. Siya miingon, “Ania ako, ipadala ako. … ako motubos sa tanan nga mga katawhan, nga walay usa ka kalag nga mawala … ; busa ihatag kanako ang imong dungog” (Moises 4:1).

5. Ang atong Langitnong Amahan miingon, “Ako mopadala sa una”—si Jesukristo (Abraham 3:27).

6. Kita “misinggit sa kalipay” (Job 38:7).

7. Tungod kay si Jesukristo ang mahimo nga Manluluws, si Lucifer nasuko ug mirebelde. Ang ikatulo nga bahin sa mga panon sa langit misunod kaniya. (Tan-awa sa D&P 29:36–37.)

8. Kita mipili sa pagdawat sa plano sa Dios ug mosunod kang Jesukristo. Atong nahuptan ang kinabuhi sa wala pa dinhi sa yuta ug milambo ngadto sa kinabuhi dinhi sa yuta, diin kita midawat og usa ka mortal nga lawas.

9. Kita nakadawat sa mga benepisyo sa Pag-ula ni Jesukristo pinaagi sa pagbaton og hugot nga pagtuo ngadto Kaniya, sa paghinulsol sa atong mga sala, pagpabunyag pinaagi sa usa ka tawo nga nagkupot sa katungod sa Iyang priesthood, sa pagdawat sa gasa sa Espiritu Santo, ug pagsunod sa mga sugo sa Dios sa tibuok natong kinabuhi (tan-awa sa 2 Nephi 31:16–20; Mga Artikulo sa Hugot nga Pagtuo 1:3–4).

Sa wala: Detalye sa Si Kristo sa Emmaus, pinaagi ni Carl Heinrich Bloch; mga paghulagway pinaagi ni Robert T. Barrett; paghulagway sa litrato sa bunyag pinaagi ni Matthew Reier

“Kamo sayud nga gikan sa walay hinungdan nga pagggawi nga inyong napanunod gikan sa inyong mga ginikanan kamo gitubos, dili pinaagi sa mga butang madugta ingon sa salapi o bulawan … kondili sa bililhong dugo ni Kristo, nga daw sa nating karnero nga walay buling o hugaw: siya gitagana nang daan alang niini bisan sa wala pa ang pagkabuhat sa kalibutan, apan niining kaulahiang mga panahon siya gikapadayag na tungod kaninyo” (1 Pedro 1:18–20).

Si Jesukristo mao ang sentro sa plano sa kalipay sa Dios para kanato. “Tan-awa. Ako mao siya kinsa giandam gikan sa katukuran sa kalibutan sa pagtubos sa akong mga katawhan. Tan-awa, Ako mao si Jesukristo. … Ngari kanako mahimo nga ang mga katawhan adunay kinabuhi, ug nga sa kahangturan, sila kinsa motuo sa akong ngalan; ug sila mahimo nga akong anak nga mga lalaki ug anak nga mga babaye” (Ether 3:14).