Anaa sa mga Balita

Ang naa sa Internet nga mga Video Nakatabang sa Pagpakatap sa Paglaum sa Ebanghelyo

Ang Mormon Messages, nga usa ka opisyal nga LDS channel sa video-sharing Web site YouTube, sa dili madugay makita na sa kapin sa 10 ka mga pinulongan. Ang unang Mormon Messages video sa Iningles migawas niadtong Agosto 2008, samtang ang Kinatsila migawas niadtong Abril 2009. Agi og dugang, ang channel gitakda nga maanaa na sa pinulongan nga Cantonese, French, German, Italian, Japanese, Korean, Mandarin, Portuguese, ug Russian sa katapusan sa unang tulo ka bulan sa 2010.

“Ang pinakaunang katuyoan sa Mormon Messages mao ang paghatag og mubo, makahatag og inspirasyon nga mga mensahe … nga makapalig-on sa mga miyembro ug makadasig kanila sa pagpaambit sa mensahe sa ebanghelyo ngadto sa uban pinaagi sa internet,” miingon si David Nielson, tigdumalang direktor sa Church’s Audiovisual Department. Ang mga hinimo sa Simbahan nga mga video tag tulo ngadto sa upat ka minutos ang gidugayon ug kasagarang naghatag og mga pulong sa pagdasig gikan sa mga General Authority ug sa mga lider sa auxiliary.

Ang nag-unang mga segment sa video naglakip sa “What Matters Most,” diin si Presidente Thomas S. Monson miawhag sa mga nanan-aw sa paggahin og panahon kauban sa mga minahal; “Counsel to Youth,” diin si Presidente Boyd K. Packer, Presidente sa Korum sa Napulog Duha ka mga Apostoles, mitambag sa kabatan-onan kon unsaon sa pagkakaplag og kalipay; ug “The Women in Our Lives,” ni Presidente Gordon B. Hinckley (1910–2008).

Gawas sa paghatag sa mga pulong sa mga lider sa Simbahan, ang Mormon Messages naghatag usab og pagtagad ngadto sa mga miyembro sa Simbahan. Sama pananglit, ang video nga “Finding Hope” naghisgot sa sugilanon ni Victor Guzman, usa sa naluwas sa Septyembre 11, 2001, nga pag-atake sa mga terorista didto sa Amerika ug sa iyang panaw sa pagpangita og kalinaw bisan pa sa iyang mga kasub-anan.

Pagka Septyembre 20, 2009, ang mao nga channel gitan-aw na sa kapin sa 5.4 ka milyon ug nabutang sa ika-20 nga pinaka-popular nga mga channel sa “Dili pangwarta ug dili pang-Aktibista” nga kategoriya sa YouTube. Ang matag mensahe sa kinatibuk-an nakadawat og mga 200,000 ka tumatan-aw.

Ang mga video anaa usab sa LDS.org, diin ang mga tumatan-aw makakita sa unang gipakita nga mga segment.

“Manghinaut ako nga daghan pang mga miyembro ang moapil sa pagpaambit niini nga mga video ngadto sa dili mga sakop sa atong pagtuo aron sila mas makahibalo kon unsa gayud ang gibarugan sa Simbahan ug sa atong tinguha sa pagsunod kang Jesukristo,” miingon si Brother Nielson.

Personal nga Kauswagan Gi-Update

Ang kinatibuk-ang presidency sa Young Women mi-update sa materyal nga Personal nga Kauswagan sa pagpakita sa bag-ong mga kausaban.

Ang bag-ong booklet nga Personal nga Kauswagan adunay pink nga hapin ug naglakip sa mga kalihokan alang sa bag-ong ikawalo nga mithi—hiyas—nga gidugang niadtong katapusan sa 2008. Kadaghanan sa mga kalihokan mahitungod sa mithi nagpabilin nga mao gihapon, apan ang uban nausab og gamay aron mas mabag-o ug mas makahatag og pagtagad sa mga pakigsaad sa templo.

Ang medalyon sa Pahalipay sa Batan-ong Pagkababaye karon naghulagway, nga dugang sa mga spires sa templo, ang beehive nagsugyot sa panag-uyon, kooperasyon, ug sa buhat; ang Mia Maid nga rosas alang sa paghigugma, hugot nga pagtuo, ug kaputli; ug ang laurel wreath, nga nagpasabut sa dungog ug kalampusan. Ang gamay nga batong ruby sa tunga sa rosas nagsimbolo sa bag-ong mithi sa hiyas (tan-awa sa Mga Proverbio 31:10) ug sa pagkompleto sa Personal nga Kauswagan.

Ang dugang nga mga materyal naglakip og poster sa bag-ong tema ug sa mga laso sa kasulatan. Ang mga laso ihatag kon makompleto na ang mga kasinatian ug mga proyekto kabahin sa mithi.

Ang mga materyal kasamtangan nga mabasa sa Ininglis, Kinatsila ug sa Portuguese. Ang mga sulod sa dugang nga 51 ka mga pinulongan mahimo nang magamit sayo sa tibuok tuig sa 2010.

Ang Mormon Messages sa dili madugay maanaa na sa dugang nga 10 ka pinulongan.

Ang medalyon nga Pahalipay sa Batan-ong Pagkababaye adunay bag-o nga desinyo.

gilitratohan ni John Buckles