Atong mga Panimalay, Atong mga Pamilya
Unahon ang Pamilya
Ako nasayud nga dili kami makalahutay og dugay sa pag-apas sa among busy nga iskedyul. Unsay among usabon?
Kadto usa ka bag-o nga semana, ug ako nagtan-aw sa among kalendaryo nga may kabalaka. Unsaon kaha namo sa pagbuhat sa tanan namong mga obligasyon nga among gipang-iskedyul?
Akong gisubsob ang akong kaugalingon, naningkamot kutob sa akong mahimo sa pagboluntaryo sa mga kalihokan sa eskwelahan, dad-on ang mga bata sa ilang nagkalain-laing mga sport ug mga organisasyon, mopakaon sa tanan bisan pa sa puno kaayo nga mga iskedyul, ug mangandam ko matag adlaw sa leksyon sa kada buntag nakong klase sa seminary. Ang akong bana magdali-dali padulong sa trabahoan ug sa mga miting sa Simbahan, sa pagbisita sa mga miyembro sa ward ug sa pag-coach og soccer. Kami naningkamot nga dili magluya diha sa maayo nga mga katuyoan ug mahimong aktibo sa Simbahan, apan adunay usa ka butang nga nagkulang. Bisan daghang mga pamilya ang makahimo og daghang mga kalihokan, apan kini dili magsilbi kanamo: ang kapuno sa iskedyul nakahimo og dakong problema sa among pamilya.
Samtang ako namalandong niini nga problema, ako misugod sa pagkamatikud kon pila ka bises namong mabalibaran ang among mga anak kabahin sa mga butang nga ilang gusto ug gikinahanglan gikan kanamo. Kini nakahasol kanako, ug gisugdan nako ang paghunahuna kon unsay angay nga buhaton.
Ako mibasa sa mga kasulatan. Samtang ako nagbasa sa Basahon ni Mormon, ako miabut sa sermon ni Haring Benjamin diin siya misulti, “Ug tan-awa ang tanan niini nga mga butang mahimo diha sa kaalam ug kahusay; kay kini dili panginahanglan nga ang usa ka tawo kinahanglan nga modagan nga labaw pa kaysa iyang kusog. Ug usab, kini angay nga siya kinahanglan magkugi, nga sa ingon niana siya unta makadaug sa ganti; busa, ang tanan nga mga butang kinahanglan gayud nga mabuhat diha sa kahusay” (Mosiah 4:27).
Ang ganti nga among gusto mao ang mas malipayon, mas nagkahiusa nga pamilya. Kami gusto og mas minus nga kabudlay ug mas makalingaw, apan daw kami dayag nga wala sa dalan padulong niini nga mga ganti.
Kami kugihan apan gamay lang ang nahimo. Kami nangandam sa tanang butang nga sukwahi sa tanang kinahanglanon nga butang. Nag-ampo ako kabahin sa among sitwasyon, apan sa sinugdanan walay tubag nga miabut.
Ang kinabuhi nagpadayon sama sa naandan. Ang mga calling nagkinahanglan og atensyon, akong gibati nga ang mga plato kinahanglang hugasan, ug ang tanan gikinahanglang ihatud ngadto sa ilang mga kalihokan. Samtang ako nag-andam sa pagtudlo og seminary kada adlaw, ako misugod sa pagkakita og mga tubag nga akong gipangita gikan sa kaalam sa atong modernong mga propeta ug mga lider. Nakabasa ako sa usa ka pamulong ni Presidente Spencer W. Kimball (1895–1985) nag-awhag sa mga Santos sa paghimo og family home evening. Siya miingon: “Apan sa atong panahon ang Ginoo mitanyag sa iyang mahangturong programa sa bag-ong paagi ug kini naghatag og bag-ong saad sa pagbalik sa kalibutan sa maayong pagpuyo, ngadto sa matuod nga kinabuhing pamilya, mosalig sa usag usa sa pamilya. Kini mao ang pagbutang og balik sa amahan ngadto sa iyang sakto nga luna isip pangulo sa pamilya, pagbutang og balik sa inahan sa panimalay gikan sa pagsige og suroy-suroy ug panarbaho, ang mga anak malayo sa walay kahumanang mga kalingawan.”1
Akong naamgohan nga ang unang biktima sa among busy gayud nga kinabuhi mao ang among regular nga iskedyul sa family home evening. Sa wala madugay, ang among bishop mibasa og usa ka sulat sa miting sa sakrament gikan sa Unang Kapangulohan nagpahinumdom kanamo sa pagpili sa among mga kalihokan sa maalamong paagi ug dili itugot nga ang maayong mga butang nga gipanghimo makabalda sa home evening.
Samtang ang akong bana ug ako naghisgut kabahin niini nga tambag, kami nakaamgo nga daghan sa among mga kalihokan makalingaw apan dili kinahanglanon ug kami makakuha og kaayohan sa pagtangtang sa mga sobra. Kami mihimo og listahan sa among mga kalihokan ug gikategoriya kini sama sa “kinahanglanon,” “dili kinahanglanon,” ug “kinahanglan pang palamboon.”
Samtang kami nagtuon sa among listahan, kami nabalaka kabahin sa mga pagbati sa among mga anak. Kadaghanan sa mga kalihokan nga among gihunahunang putlon mao ang mga kalihokan nga may labut sila, sama sa mga sport ug mga organisasyon. Kami mihukom sa pagpahigayon og family home evening ug hisgutan kini uban sa mga bata. Sa dihang among gihisgutan ang problema uban sa mga bata, kami natingala sa pagkahibalo nga sila mas gustong mogahin og panahon uban kanamo kay sa kami mo-coach sa ilang mga team o mangulo sa ilang mga organisasyon.
Gikan niini nga pagkaamgo ang among “Club sa Pamilya” natukod.
Sa dihang among natuman ang among mga obligasyon sa mga kalihokan nga anaa kami, kami wala na moapil og bisan unsa nga bag-ong club. Sa mga gabii nga kami walay mga responsibilidad sa Simbahan, ang akong bana moabut sa panimalay gikan sa trabaho ug mopahibalo, “Karong gabii mao ang Club sa Pamilya!” ug ang mga bata magdali-dali sa paghuman sa ilang homework ug bulahaton sa balay aron kaming tanan magkauban.
Ang among mga anak ganahan nga moapil sa espesyal nga mga proyekto, ilabi na kauban sa ilang papa. Usa ka gabii naghimo sila og computer gikan sa mga scrap nga mga bahin sa computer. Usahay ang tanan magsul-ob sa ilang mga bakos nga butanganan sa mga himan ug mag-ayo og bisan unsang guba sa balay. Ang punto mao nga kami aduna nay higayon, kusog, ug tinguha nga magkauban.
Ako usab aduna nay mas daghang panahon nga makauban ang mga bata ug mangandam og mas sustansyadong mga pagkaon alang sa pamilya. Ang Club sa Pamilya wala magkinahanglan nga magdali-dali unsay isunod, nga magkabulagay ang pamilya sa adtoan tungod sa mga kalihokan, o mangaon sa gawas. Walay usa kanamo nga daw gimingaw sa among kinabuhi nga magdali-dali ug sa fast food. Kami nalingaw gayud sa panahon nga kami nag-uban nga ang among mga bata dili na gusto nga moapil sa ekstra-kurikular nga mga kalihokan.
Among nabalik ang family home evening ug kada adlaw nga pag-ampo sa pamilya. Kami usab manghawan o manglimpyo, maghimo og personal nga pagtuon sa kasulatan, ug maghimo og makalingaw nga mga kalihokan sa pamilya. Kami nakasabut nga samtang ang mga bata nagkadako, normal lang nga magkadaghan ang ilang mga kalihokan. Amo kining idugang kon kini kinahanglanon na, apan sa karon, kami nagtagamtam sa matag minuto sa Club sa Pamilya.
Family Home Evening, pinaagi ni Del Parson