Usa ka Pagpamatuod sa Propeta
“Unsa nga Ako ang Ginoo namulong, Ako namulong … ; bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).
Human dayon sa iyang bunyag ug kumpirma, ang akong apohang babaye miingon, “Anaa na kanimo ang Espiritu Santo karon, ug ang importante nga ikaw adunay pagpamatuod sa propeta.” Wala magdugay mitambong ako sa kinatibuk-ang komperensya sa pinakaunang higayon—sa Oktubre nga komperensya niadtong 1949.
Ingon og usa kadto ka nindot nga kasinatian. Didto ako natulog sa balay sa akong mga apohan. Nahinumduman nako ang pagmata og sayo kaayo niadtong Sabado sa buntag ug ang pagsakay sa bus padulong sa lungsod sa Siyudad sa Salt Lake kauban ang akong apohan nga babaye. Nanglakaw kami padulong sa Temple Square ug nagbarug diha sa nanaglinya sulod sa taas kaayong oras. Sa dihang nakasulod na kami sa Tabernacle, nanglikod kami dapit sa luyo.
Sa wala pa magsugod ang miting, adunay kasikas ug ang tanan namarug. Dayon si Presidente George Albert Smith (1870–1951) misulod. Akong nakita si Presidente Smith ug ang iyang mga magtatambag. Dili gayud nako makalimtan ang akong gibati sa pagkakita nako sa propeta sa pinakaunang higayon. Gibati nako ang hilabihan ka talagsaon. Nasayud ko nga siya propeta sa Ginoo.
Usa kadto ka espesyal kaayo nga panghitabo. Gibati nako ang samang pagbati kon akong makita ang Presidente sa Simbahan karon. Nag-alagad ako isip General Authority karon sulod sa tulo ka mga Presidente sa Simbahan. Ug kon ang Presidente mosulod na gani, anaa gihapon kanako kana nga pagpamatuod: “Siya ang propeta.”
Ikaw dili usa ka bata pa kaayo sa pag-angkon og pagpamatuod nga ang Presidente sa Simbahan mao ang propeta sa Ginoo. Kon maangkon nimo kana nga pagpamatuod samtang ikaw bata pa, kana usa ka makaabag nga impluwensya sa imong kinabuhi. Ikaw masayud nga ang Ginoo adunay propeta ug kita mapanalanginan kon kita maminaw og maayo kon unsay iyang ipangtudlo.
Paghulagway pinaagi ni Dan Burr