Ang Panagang
Kon ako kahibalo lamang unsaon sa pagpasabut nganong ako dili moadto og mga party.
“Nganong dili man gyud ka mouban kanamo?” ang babaye misyagit. “Dili ka ba gusto nga maapil sa among grupo?”
Kadto mao ang katapusan sa tingpamulak, ug ang pag-eskwela hapit na mahuman. Panahon nga walay klase kami magdula og football sa gawas, ug ako mao ang goalkeeper. Isip goalkeeper ako anad sa pagliput ug pagpugong sa mga atake gikan sa field. Apan, kini nga dula lahi tungod kay ako kinahanglang moliput ug mopugong sa mga atake gikan usab sa mga isigka kilid.
Tunga-tunga sa opensiba nga mga pag-atake sa pikas team, gipangutana ako sa pipila ka mga babaye sa akong klase kinsa nagbarug sa kilid sa field. Aron makalikay sa ilang mga pagpangutana, ako kinahanglang mopokus aron madepensahan ang sayon nga pagsulod sa bola sa pikas team, apan ako wala kaayoy swerte nianang adlawa.
“Busa nganong ikaw dili man gyud moadto sa among mga party?” siya mipadayon. “Dili ka ba gusto og gamayng kalingawan?”
“Gamayng kalingawan!” Naghunahuna ko. Ang pag-apil sa party uban sa akong mga klasmeyt, magdula og binata nga mga dula, ug mobati nga napugos ngadto sa dili komportableng mga sitwasyon dili mao ang akong gusto nga kalingawan. Mas ganahan pa ko nga anaa sa balay.
“Kami naningkamot nga maila-ila ang usag-usa, ug ikaw wala didto,” miabut ang laing atake gikan sa kilid.
“Sakto kana!” ako miingon. Ug kinahanglan nakong ipasabut nganong ako mibati nga siya ug ang uban kinahanglan nga makasabut kanako. Apan nagduha-duha ako niini. Nganong ingon ani man sila? Ako lang ang miyembro sa Simbahan sa akong eskwelahan, ug wala’y usa kanila ang nakasabut gyud kabahin sa Simbahan o sa mga sumbanan niini.
“Dili ka ba ganahan ni bisan kinsang babaye sa atong klase?” nangutana siya.
“Dili kini kabahin sa pagkaganahan kanila,” ako miingon. “Mibati lang ko nga dili komportable.”
“Apan ngano?” siya miusisa.
Ang akong team nailogan sa bola, ug ang tanang mga lalaki nagdagan padulong sa akong direksyon.
“Nganong ikaw mibati nga dili komportable?” miusisa siya pag-usab.
Ang tanan daw naglihok nga hinay samtang ang akong mga mata nakapokus sa nagpadulong nga bola. Ang iyang tingog mao lamang ang akong nadungog, ug ang makanunayong “ngano,” “ngano” ang nagbalik-balik sa akong hunahuna. Klaro kaayong patiran sa akong kontra ang bola para masulod, ug akong nakita nga ang bola kusog unya kaayo nga moigo kanako. Apan ako andam. Siya mipatid sa bola, napugngan nga miuntol sa akong mga kamot uban sa kusog nga tingog. “Oo!” Laing panginsulto nga malampusong napugngan,” ako naghunahuna, nga nagngisi. Gikuha nako ang bola ug gilabay balik sa field ngadto sa akong mga kauban sa team ug dayon miatubang sa lain nakong mga kontra.
“Unya?” siya miingon.
Ang akong kasingkasing naglagubo gumikan sa kahinam sa dula. “Ang rason nganong dili ko moadto sa inyong mga party kay …” Ako misugod, dayon mihunong, naghunahuna sa kadiyot.
“Kay?” siya mibalik sa pagsulti niini nga may gamayng kabalaka.
Ako mibalik sa pagtan-aw sa field pag-usab aron sa pagtan-aw sa kontrang pas-pas nga nagpadulong. Ang akong kasingkasing kusog nga mipitik, ug ako nasayud nga kinahanglan nakong tiwason unsa ang akong gisugdan. “Tungod kay akong gigahin ang akong kaugalingon ngadto sa usa ka tawo nga espesyal!” Nahinayak ako sa pagsulti.
“Unsa!” siya misinggit.
Ang akong mga kontra nagpadulong na kanako, ug ang akong atensyon usab anaa sa dula. Ang bola mihadyong, nakalusot sa akong mga sagang. Ang pikas team mi-abiba, samtang ang mga babaye nga nagbarug didto nangatawa.
“Gigahin ang imong kaugalingon alang sa usa ka tawo,” siya miingon, nga nag-agik-ik. “Unsa man ang iyang ngalan?”
Ako mibati og kaulaw. Bisan tuod nga ako walay bisan usa nga ngalan nga espesyal sa akong hunahuna, ako nasayud gihapon nga moabut ang adlaw nga akong makita ang akong asawa sa umaabot, ug ako kinahanglang takus nga modala kaniya ngadto sa templo. Mao kana nganong dili ko moadto sa ilang mga party.
Ang akong mga kamot nagpadayong nangurog ug ang akong kasingkasing nagpadayong nagpitik og kusog samtang ako naglakaw pauli sa balay pagkahuman, apan ako nagpahiyom og gamay. Tingali ako naulawan didto sa field nianang adlawa; bisan pa, ako mibati nga nagmadaugon.
Mga paghulagway pinaagi ni Sal Velluto