Unsa ang pipila ka pamaagi nga kita makatahud sa mga adlaw sa pangilin sa ubang mga relihiyon?

Ang pagtahud sa ubang mga relihiyon usa sa atong mahinungdanong mga pagtuo: “Kami nag-angkon sa kahigayunan sa pagsimba sa Dios nga Makagagahum sumala sa pagmando sa among kaugalingon nga tanlag, ug nagtugot sa tanan nga mga tawo sa sama nga kahigayunan, sa pagpasimba kanila sa bisan unsa nga paagi, asa, o unsa ang ilang buot simbahon.” (Mga Artikulo sa Hugot nga Pagtuo 1:11).

Ang mga adlaw sa pangilin sa relihiyon sa kasagaran naglakip og pamaagi sa pagsimba. Sama nga ang mga miyembro sa atong Simbahan mosaulog sa Pasko ug Pasko sa Pagkabanhaw, ang mga miyembro sa ubang mga pagtuo mosaulog niining balaang mga adlaw o bisan unsang adlaw sa pangilin sa pagpasidungog sa usa ka piho nga dios o sa paghinumdom og usa ka panghitabo sa kasaysayan sa ilang relihiyon.

Kamo makatahud sa mga adlaw sa pangilin sa ubang mga relihiyon pinaagi sa pagkahibalo og una kon kanus-a kadtong mga adlawa isaulog. Kamo makabasa kabahin sa piho nga mga adlaw sa pangilin sa relihiyon ug istoryahi ang inyong mga higala kon unsaon nila sa pagpakita sa ilang gugma sa Dios niining espesyal nga mga adlaw. Ayaw gayud kamo pagbugal-bugal sa ilang mga pagtuo, mga kostumbre, o mga nabatasan. Tahura ang mga simbolo sa relihiyon nga ilang gigamit sa pagsaulog ug pagsimba.

Kon kamo gidapit sa pag-apil, mohangyo kamo sa matarung nga paagi alang sa ilang mga sugyot kon unsaon ninyo sa pagbuhat niini nga husto gayud. Sila mahimong magmalipayon nga kamo yanong motan-aw lamang sa ilang gibuhat, o sila makasugyot og pipila ka mga kalihokan nga kamo makaapil ug ang uban nga kinahanglan ninyong likayan. Pananglitan, kon ang usa sa ilang naandan sa relihiyon wala mouyon sa inyong mga pagtuo, sama sa pag-inom og bino, kamo sa maayong paagi makabalibad sa pag-apil, o tingali kamo mahimong moinom og tubig. Kon mas sayo kamo nga magkasinabut, mas dako ang oportunidad nga malikayang maulawan.

Makapakita kamo sa inyong pagtahud pinaagi sa pagkat-on kon sa unsang paagi ang uban nagsimba, ug kamo usab makadapit sa uban sa pagsaulog sa inyong mga adlaw sa pangilin sa relihiyon uban kaninyo aron sila makasabut unsa ang inyong gituohan.