Pōpoaki ʻa e Kau Palesitenisī ʻUluakí
ʻE Lava Nai ke Mau Mamata ki he Kalaisí?
‘I ha pō ʻe taha naʻe lau ai ʻe ha kuitangata ha talanoa ki hono mokopuna fefine taʻu faá peá ne hanga hake ki ʻolunga ʻo pehē ange, “ʻE Kuitangata, vakai ki he ngaahi fetuʻú!” Ne malimali pē tangataʻeikí mo pehēange, “ʻOkú ta ʻi fale kitaua. ʻOku ʻikai ha fetuʻu ia heni.” Kae kei vili ange pē kiʻi taʻahiné, “ʻOku ʻi ai e ngaahi fetuʻu ʻi ho lokí! Sio ki hē!”
Naʻe sio hake e kuitangatá ni peá ne ʻohovale ʻi heʻene fakatokangaʻi naʻe ʻasi holo he ʻaofí e fanga kiʻi meʻa ngingila. Ko e taimi lahi naʻe ʻikai ke ʻasi ia, ka naʻe ʻi ai pē ʻa e faʻahinga fetapaki e māmá he taimi ʻe taha ʻoku hangē tofu pē ha ngaahi fetuʻú. Ko e kiʻi taʻahiné pē naʻá ne fakatokangaʻí ka ko e moʻoni naʻe ʻi ai e ngaahi fetuʻu. Pea talu mei he momeniti ko iá, ko ʻene hū pē ʻa e kuitangatá ki he lokí ni ʻo sio hake ki ʻolunga, naʻá ne lava ʻo sio ki he meʻa naʻe ʻikai ke ne fakatokangaʻi kimuʻá.
ʻOku tau aʻu mai ʻeni ki ha faʻahitaʻu Kilisimasi fakaʻofoʻofa ʻe taha ʻoku fonu ʻi he ngaahi hivá mo e ngaahi māmá, paati fakafiefiá mo e ngaahi meʻaʻofá. Pea neongo e kakai kotoa pē, ka ko kitautolu kāingalotu ʻo e siasí ʻoku tau fataki e huafa ʻo e Fakamoʻuí, ʻoku fie maʻu ke fakalaka atu ʻetau sió ʻi he ngaahi meʻa muna ʻo e faʻahitaʻu Kilisimasí ka tau vakai ki hono ʻuhinga moʻoni mo e fakaʻofoʻofa ʻo e taimi ko ʻeni ʻo e taʻú.
ʻOku ou fifili pe ko e toko fiha nai ʻi Pētelihema naʻa nau ʻiloʻi naʻe ʻaloʻi tonu pē ʻa e Fakamoʻuí ai, ʻo ofi atu pē kiate kinautolu? Naʻe ʻi honau lotolotongá pē ʻa e ʻAlo ʻo e ʻOtuá—ʻa e Mīsaia ne talaʻofa mai pea fuoloa ʻa e tatali ki aí!
ʻOkú ke manatuʻi e meʻa naʻe fakahā ʻe he ʻāngeló ki he kau tauhisipí? “He kuo ʻaloʻi kiate kimoutolu ʻi he ʻahó ni, ʻi he kolo ʻo Tēvitá, ʻa e Fakamoʻui, ʻa ia ko Kalaisi ko e ʻEikí.” Pea nau fepehēʻaki ʻiate kinautolu, “Ke tau ō ʻeni ki Pētelihema, ʻo mamata ki he meʻá ni kuo faí” (Luke 2:11, 15).
Hangē ko e kau tauhisipi ʻo e kuonga muʻá, ʻoku fie maʻu ke tau pehē ʻi hotau lotó, “Ke tau ō ʻo mamata ki he meʻá ni kuo faí.” ʻOku fie maʻu ke ʻi hotau lotó ʻa e holi ko ʻení. Tau ō ʻo mamata ki he Tokotaha Māʻoniʻoni ʻo ʻIsilelí ʻi he ʻaiʻangakai ʻo e manú, ʻi he temipalé, ʻi he moʻungá, pea ʻi he kolosí. Ke tau hangē ko e kau tauhisipí ʻo fakalāngilangiʻi mo fakahīkihikiʻi ʻa e ʻOtuá koeʻuhi ko e ngaahi ongoongo lelei ʻo e fiefia lahi ko ʻení!
Taimi e niʻihi ko e ngaahi meʻa ʻoku faingataʻa taha ke tau sio ki aí ʻa e ngaahi meʻa pē ko ia naʻe ʻi muʻa ʻiate kitautolú. Hangē ko e kuitangata naʻe ʻikai te ne lava ʻo sio ki he ngaahi fetuʻu ʻi he ʻaofí, ʻoku pehē ʻa e ʻikai ke tau faʻa lava he taimi e niʻihi ʻo sio ki he meʻa ʻoku ʻasi mahino mai pē kiate kitautolú.
Kuo tau fanongo ʻi he pōpoaki nāunauʻia ʻo e hāʻele mai ʻa e ʻAlo ʻo e ʻOtuá, ʻa kitautolu kuo tau ʻai ʻa Hono huafá mo fuakava ke ʻaʻeva ʻi Hono halá ʻi heʻetau hoko ko ʻEne kau ākongá—kuo pau ke ʻoua naʻa tāpuni hotau lotó mo e ʻatamaí pea mamata moʻoni kiate Ia.
ʻOku lahi e ngaahi founga ʻoku fakaʻofoʻofa ai e faʻahitaʻu Kilisimasí. Ko ha faʻahitaʻu ia ʻo e ngāue tokoni mo e ʻofa fakatokoua. Ko ha faʻahitaʻu ke tau vakaiʻi ʻetau moʻuí pea pehē foki ki he ngaahi tāpuaki lahi ʻoku tau maʻú. Ko ha faʻahitaʻu ʻo e faʻa fakamolemole pea mo hono fakamolemoleʻi kita. Ko ha faʻahitaʻu ke tau fiefia ai ʻi he ngaahi hivá mo e ngaahi māmá, fakafiefiá mo e ngaahi meʻaʻofá. Ka ʻoku ʻikai ʻaupito totonu ke hanga ʻe he ngaahi meʻa fakafiefia ʻo e faʻahitaʻú ʻo fakanenefu ʻetau vakaí pea taʻofi kitautolu mei heʻetau mamata moʻoni ki he Pilinisi ʻo e Melinó ʻi Hono ngeia fakatuʻí.
Tau hanga kotoa muʻa ʻo ngaohi ʻa e faʻahitaʻu Kilisimasi ʻo e taʻu ní ke hoko ko ha taimi ʻo e fakafiefia mo e fakamanatu, ko ha taimi ke tau fakahā ai ʻa e mana ko ia naʻe fekauʻi mai ʻe hotau ʻOtua Māfimafí ʻa Hono ʻAlo pē Taha Naʻe Fakatupú ko Sīsu Kalaisi, ke huhuʻi ʻa e māmaní!
Faitaaʻi ʻe David Stucki; tā fakatātaaʻi ʻe Joe Flores
Toʻohemá: tā fakatātā ʻa Paul Mann; tā fakatātā ʻo e ngaahi meʻa teuteú ʻe Joe Flores; Ko Hono Fokotuʻu Hake ʻe Kalaisi ʻa e ʻOfefine ʻo Sailosí, tā ʻe Greg Olsen © 1990; Ko e Tamasiʻi ko Sīsuú ʻi he Temipalé, tā ʻe Grant Romney Clawson © IRI; Ko e Tutukí, tā ʻe Harry Anderson © IRI; tā fakatātāʻi ʻe Paul Mann; Kuó Ne Toetuʻu, tā ʻe Del Parson; Kau Tangata Poto ʻe Toko Tolú, tā ʻe Paul Mann