Mga Pagpapala ay Bilangin

Ni Pangulong Henry B. Eyring

Unang Tagapayo sa Unang Panguluhan

Mula sa isang mensahe sa pangkalahatang kumperensya noong Oktubre 2007.

Ang paglimot sa Diyos ay matagal nang problema ng Kanyang mga anak mula pa nang likhain ang mundo. Isipin ang panahon ni Moises, nang magpakain ng mana ang Diyos at sa mahimala at kitang-kitang mga paraan ay inakay at pinrotektahan ang Kanyang mga anak. Binalaan pa rin ng propeta ang mga tao: “Magingat … baka iyong malimutan ang mga bagay na nakita ng iyong mga mata” (Deuteronomio 4:9).

Humanap ng mga paraan para makilala at maalala ang kabaitan ng Diyos. Palalakasin nito ang ating patotoo. Naaalala ba ninyo ang awiting kinakanta natin kung minsan: “Mga pagpapala ay bilangin mo; mamamangha ka sa kaloob sa ‘yo” (“Mga Pagpapala ay Bilangin,” Mga Himno, blg. 147).

Noong maliliit pa ang aming mga anak, sinimulan kong isulat ang ilang bagay na nangyayari sa araw-araw. Hindi ako pumalya kahit isang araw kahit pagod na pagod ako o maaga pa akong gigising kinabukasan. Bago ako sumulat, pinag-iisipan ko ang tanong na ito: “Nakita ko ba ang kamay ng Diyos na nakaunat para tulungan kami o ang aming mga anak o pamilya sa araw na ito?” Habang ginugunita ko ang mga nangyari sa maghapon, nakikita ko ang katibayan ng nagawa ng Diyos para sa isa sa amin na hindi ko nakita dahil sa kaabalahan ng maghapon. Natanto ko na sa paggunita ay naipakita sa akin ng Diyos ang Kanyang nagawa.

Ang Espiritu Santo ang tumutulong para makita natin ang nagawa ng Diyos para sa atin. Pinatototohanan ko na mahal tayo ng Diyos at pinagpapala tayo nang higit sa nalalaman ng karamihan sa atin. Alam ko na ito ay totoo, at nagagalak akong alalahanin Siya.

• 1. D; 2. A; 3. E; 4. C; 5. F; 6. B.

At Mamamangha Kayo!

Matututuhan ninyong pansinin ang mga pagpapalang ibinibigay sa inyo ng Ama sa Langit tulad ng paraan ni Pangulong Eyring—sa pagsulat ng mga ito.

1. Maglagay ng isang kuwaderno o journal at bolpen o lapis sa tabi ng inyong kama.

2. Tuwing gabi bago kayo manalangin at matulog, isulat:

   • Ang petsa.

   • Dalawa o tatlong mabubuting bagay na nangyari sa araw na iyan.

   • Paano sa palagay ninyo naging mga pagpapala ng Ama sa Langit ang mabubuting bagay na ito.

3. Kapag nagdarasal kayo, tiyaking pasalamatan ang Ama sa Langit sa mabubuting bagay na inyong naalala. Maaari din ninyong ikuwento sa inyong mga kapamilya ang mga pagpapalang nakita ninyo!

Paano Pinagpala ng Panginoon ang mga Anak ni Israel

Ikinukuwento sa aklat ng Exodo sa Lumang Tipan kung paano tinulungan ng Panginoon ang Kanyang mga piniling tao kapag may mga problema sila. Itugma ang bawat problema sa isang pagpapalang ipinadala ng Panginoon para tulungan ang Kanyang mga tao. Mga sagot:

Mga Problema	Mga Pagpapala
1. Ang mga piling tao ng Panginoon ay mga alipin sa Egipto.	A. Nagpadala ang Panginoon ng maraming salot sa Egipto, at sa huli ay pinalaya ng Faraon ang mga tao.
2. Hindi sila pinayagang umalis ng Faraon, ang hari ng Egipto.	B. Ibinigay ng Panginoon ang Sampung Utos kay Moises. Tinulutan Niyang marinig ng lahat ng tao ang Kanyang tinig at nagpakita Siya sa ilan sa kanila.
3. Pinayagan ng Faraon na umalis ang mga tao, ngunit hinabol sila ng kanyang hukbo para ibalik sila.	C. Inutusan ng Panginoon si Moises na hampasin ng kanyang tungkod ang isang malaking bato, at dumaloy ang tubig.
4. Nauhaw ang mga tao sa ilang.	D. Inutusan ng Panginoon si Moises na akayin ang mga tao palabas ng Egipto patungo sa lupang pangako.
5. Wala nang makain ang mga tao, at gutom na sila.	E. Hinawi ng Panginoon ang Dagat na Mapula upang makatakas ang mga tao.
6. Kailangan ng tulong ng mga tao sa pagsunod sa Panginoon.	F. Pinadalhan ng Panginoon ang mga tao ng pagkaing lasang tinapay at pulut-pukyutan. Tinawag itong mana, at natagpuan nila ito sa lupa bawat umaga.

Paglalarawan ni Weston Colton; mga paglalarawan ni Keith Christensen