Ko Hono Ngaohi e Ngaahi Tefitoʻi Moʻoni ʻo e Uelofeá ke Hoko ko e Konga ʻo Hoʻo Moʻuí

ʻOku ʻuhinga ʻa hono moʻui ʻaki ʻo e ngaahi tefitoʻi moʻoni ʻo e uelofeá ki heʻetau fakaʻaongaʻi ʻa ʻetau tui kia Sīsū Kalaisí—ʻo fakatātā ʻaki pē hono taʻofi ʻo e ngaahi moʻua ʻoku ʻikai fie maʻú, moʻui fakatatau pē ki he meʻa ʻoku tau maʻú, pea tauhi ha meʻakai maʻá e fāmilí ʻi ʻapi mo fakahū ha paʻanga talifaki. ʻOku hanga ʻe heʻetau tuí ʻo tataki kitautolu ke tau akoʻi hotau ʻatamaí mo hotau nimá pea ke tau ngāue ʻi he ʻaho kotoa pē ʻo ʻetau moʻuí ke tau moʻui fakafalala pē kiate kitautolu. ʻI he hili ko ia ʻetau tokangaʻi ʻetau ngaahi fie maʻu ʻatautolú, ʻoku tau lava lelei ange ai ke tokonaki maʻatautolu pea tokoni ki he niʻihi kehé. Fakatauange ke tau muimui ʻi he faleʻí ke ʻoua naʻa tau fai lelei pē ka ke tau feinga ke anga lelei, ʻo ʻikai ke tau fai lelei ange pē ka ke tau lelei ange.¹ ʻOku ʻomi ʻe he talangofua ki he faleʻi ʻa e ʻEikí ʻa e ngaahi tāpuaki fakatuʻasinó mo fakalaumālié. ʻOku lava ai ke tau fehangahangai mo e ngaahi faingataʻa ʻo e moʻuí kuo fakateunga ʻaki kitautolu ʻa e loto toʻa mo e loto falala kae ʻikai ko e manavahē mo e veiveiua.

ʻOku fakamanatu mai ʻe Palesiteni Tōmasi S. Monisoni ʻa hotau fatongia ko ia ke tokoniʻi mo faitāpuekina e niʻihi kehé:

“Siʻi kāinga ʻofeina, tau fehuʻi loto pē muʻa kiate kitautolu ʻa e fehuʻi ko ia … : ‘Ko e hā ha meʻa kuó u fai maʻá ha taha ʻi he ʻaho ní?’ ʻOfa ke mahuhuhuhu hotau lotó ʻi he fakalea ʻo ha himi angamaheni pea ke ne nofoʻia maʻu pē ia:

“Kuó u fai ha lelei ʻi he māmaní?

Pe kuó u fai nai ha tokoni?

Ke fiefia ai, ʻa e loto mamahí?

Ka ʻikai, kuó u vaivai.

ʻE maʻamaʻa pē ʻa e haʻamongá

Ke ngāue loto taha?

Pe kuó u fakamoʻui nai ha mahaki?

Ne fie maʻu pe kuo ʻi ai?

“Ko e ngāue tokoni ko ia kuo ui kitautolu ki aí, ko e ngāue tokoni ia ʻa e ʻEiki ko Sīsū Kalaisí.”²

Maʻuʻanga Fakamatalá

1. Vakai, Robert D. Hales, “Ko e Tūkufua ʻa e Ongoongoleleí ki he Uelofeá: Ngāueʻi ʻo e Tuí,” ʻi he Ngaahi Tefitoʻi Moʻoni Mahuʻinga ʻo e Uelofeá mo e Moʻui Fakafalala pē Kiate Kitá (tohitufa, 2009), 1–3.

2. Thomas S. Monson, “Ko e Hā Kuó u Fai Maʻá ha Taha he ʻAho ní?” Liahona mo e Ensign, Nōv. 2009, 87).

“ʻOku ou fakahā kiate kinautolu kotoa pē ʻoku aʻu atu ki ai hoku leʻó, ko e palani uelofea ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e ueʻi ia ʻe he ʻOtua Māfimafí. Ko e moʻoni, ko e ʻEiki ko Sīsū Kalaisí ʻa e Tokotaha naʻá Ne fokotuʻu iá. ʻOkú Ne ui mai kiate koe mo au, ʻVakai, ʻoku ou tuʻu ʻi he matapaá mo tukituki: kapau ʻe fanongo ʻe ha taha ki hoku leʻó, mo toʻo ʻa e matapaá, te u hū atu kiate ia’ (Fakahā 3:20).

“Fakatauange ke tau ongoʻi ʻa Hono leʻó, ʻofa pē ke tau fakaava ʻa e matapā ki hotau ngaahi lotó kiate Ia, pea fakatauange ke Ne hoko ko hotau takaua maʻu ai pē lolotonga ʻetau feinga ke tokoniʻi ʻa ʻEne fānaú.”]

Palesiteni Thomas S. Monson, “The Way of the Lord,” ʻi he Basic Principles of Welfare and Self-Reliance (tohitufa, 2009), 12.

Tā fakatātaaʻi ʻo e ʻatá ʻe Jerry Garns