Taʻu ʻe Fitungofulu Mā Nima ʻo e Moʻui Fakapotopotó

Neongo naʻe teʻeki ai fokotuʻu ʻa e palani uelofea ʻa e Siasí, ka naʻe ʻiloʻi ʻe he Kāingalotú ʻa hono mahuʻinga ʻo e moʻui fakafalala pē kiate kitá, ʻa e tokangaʻi ʻo e masivá mo e faingataʻaʻiá, mo e tokoni ki he niʻihi kehé. Naʻe pehē ʻe he Palōfita ko Siosefa Sāmitá, “Ko e tangata ʻoku fonu ʻi he ʻofa ʻa e ʻOtuá, ʻoku ʻikai fiemālie ia ʻi hono tāpuakiʻi pē hono fāmilí, ka ʻoku feʻaluʻaki he funga ʻo e māmaní, ke tāpuekina ʻa e faʻahinga ʻo e tangatá.”¹

Ne ʻikai fuoloa mei hono fokotuʻu ʻo e Siasí, naʻe langa ha fanga kiʻi fale tukuʻanga koloa ʻa e kau pīsopé mo ha ngaahi ʻōfisi vahehongofulu ke tokoniʻi ʻa e kau faingataʻaʻiá. Naʻe kamata ʻe Siosefa Sāmita hono tānaki ʻo e foaki ʻaukaí ʻi Ketilani, ʻi ʻOhaiō, lolotonga e ngaahi taʻu ʻo e 1830.² Naʻe fakafeʻiloaki foki mo e tefitoʻi moʻoni ʻo e vahehongofulú lolotonga e vahaʻataimi ko ʻení (vakai, T&F 119). Naʻe totongi ʻa e paʻanga vahehongofulú mo e foaki ʻaukaí ʻo fakafou ʻi he ngāue, koloa, mo e ngaahi meʻa kehe pē. Naʻe tokangaʻi ʻe he kau pīsopé hono tufaki ʻo e ngaahi maʻuʻanga tokoni ko ʻení ʻi he ngaahi founga tatau pē mo ia ʻoku fakahoko he ʻaho ní.³

Naʻe fāinga e tokolahi ʻo e Kāingalotu ʻi he kamataʻangá ke tauhi kinautolu. Naʻe ngāue fakataha e kau taki ʻo e Siasí mo e kāingalotú ke maʻu ha ngaahi founga ke nau ngāue ai ke tauhi ʻaki kinautolu mo taʻofi ai ʻa e nofo noá. Naʻe ngāue ha niʻihi ʻi hono langa ʻo e ngaahi fale ʻo e Siasí mo fakakakato e ngaahi ngāue ʻa e puleʻangá. Naʻe faama ʻa e niʻihi mo fakatau atu e ngaahi koloa ke nau moʻui ai mo honau ngaahi fāmilí. ʻI he ngāue fakataha ʻa e Kāingalotú, naʻe tāpuakiʻi kinautolu ʻaki ha meʻa feʻunga ke feau ʻaki ʻenau ngaahi fie maʻú.

Neongo ʻoku kehe ʻa e ngaahi faingataʻa ia ʻo hotau kuongá ni, ka ʻoku kei hokohoko atu pē ʻa e tokonaki ʻa e Kāingalotú maʻanautolu mo tokangaʻi ʻa e paeá mo e faingataʻaʻiá ʻaki ʻenau muimui ʻi he ngaahi akonaki ʻa e Fakamoʻuí mo e faʻifaʻitakiʻanga kuo tā ʻe he ngaahi toʻu tangata kimuʻá.

Ko e maʻu e fakamatala ʻi he fakahokohoko ko ʻení mei he ngaahi maʻuʻanga tokoni ko ʻení, tuku kehe ʻo ka toki fakahā atu: Susan Clayton Rather, Supporting the Rescue of All That Is Finest (2005); Glen L. Rudd, Key Moments in Church Welfare Services (2008); Glen L. Rudd, Important Events for Historical Church Welfare (1999); Glen L. Rudd, A Brief History of the Church Employment Program (1998); Glen L. Rudd, Pure Religion (1995).

Maʻuʻanga Fakamatalá

1. Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 493.

2. Vakai, Howard W. Hunter, “Fast Day,” Ensign, Nov. 1985, 72.

3. Vakai, Glen L. Rudd, Pure Religion (1995), 2, 4.

1936

• 6 ʻo ʻEpelelí: Fakahā ʻe Palesiteni Hiipa J. Kalānite mo hono ongo tokoní ʻa e palani maluʻi ʻa e Siasí ʻi he konifelenisi lahí.

• ʻOkatopa: Fokotuʻu ʻe he Siasí e Kōmiti Uelofea Fakalūkufuá.

1937

• Fokotuʻu ʻe he Siasí ʻa e fuofua Fale Tukuʻanga Koloa Lahi ʻa e Kau Pīsopé ʻi Sōleki Siti.

1938

• Fakatau ʻa e konga kelekele ko Uelofea Sikueá ʻi Sōleki Siti, pea kamata ʻa e langá.

• ʻEpeleli: Toe fakahingoa foʻou ʻa e palani maluʻi ʻa e Siasí ke ui ko e palani uelofea ʻa e Siasí.

• 12 ʻo ʻAokosí: Fakaava ʻe he Siasí ʻene fuofua falekoloa maʻamaʻa ko e Kautaha Teseletí ʻi Sōleki Siti.

1939

• Kamata ngāue ʻa e ʻuluaki fale faʻoʻanga meʻakai kapa ʻi Uelofea Sikuea.

1940

• 27 ʻo ʻAokosí: Fakatapui ʻe Palesiteni Tēvita O. Makei ʻa e fale tukuʻanga keleni ʻi Uelofea Sikueá. Naʻe ngāue e kāingalotu ʻo e Siasí ʻi ha houa ʻe 70,000 ki hono langá.

1941

• 20 ʻo ʻEpelelí: Kamata ngāue ʻa e ʻuluaki fale ngaohiʻanga huʻakau ʻi Uelofea Sikueá.

1948

• 1 ʻo Māʻasí: Fokotuʻu ʻe he Siasí haʻōfisi kumi ngāue fakavahelahi ʻi Sōleki Siti.

1960

• Māʻasi: Kakato hono langa ʻo e fale ngaohiʻanga huʻakau foʻou ʻi Uelofea Sikueá.

1963

• Kāmata ngāue ʻa e fale ngaohiʻanga pasitā mo e fale faʻoʻanga meʻakai kapa foʻou ʻi Uelofea Sikueá.

1973

• Fokotuʻu ʻe he Siasí ʻa e Kautaha Tokoni Fakasōsiale ke tokoniʻi ʻaki e ngaahi fāmilí.

1976

• Mafola ʻa e ngaahi fale uelofeá ʻi he ʻIunaiteti Siteití mo Kānata.

• 29 ʻo Māʻasí: Kakato hono langa ʻo e fale tukuʻanga koloa foʻou ʻa e kau pīsopé ʻi Uelofea Sikueá.

1978

• Fokotuʻu ʻe he Siasí ʻa e Kōmiti Tali ki he Meʻa Fakatuʻupakeé ke tokoni ki he kakai ʻe lauimiliona ʻi māmani ʻoku uesia ʻe he ngaahi fakatamakí.

Ngaahi taʻu ʻo e 1980

• Langa ʻa e ngaahi fuofua senitā ki he kumi ngāué mavahe mei he ʻIunaiteti Siteití ʻi ʻĀsenitina, Silei, Palakuai, mo ʻUlukuai.

1981

• Langa ʻe he Siasí ha falekoloa maʻamaʻa ʻa e Kautaha Teseletí ʻi Uelofea Sikuea.

1982

• 10 ʻo Sepitemá: ʻAʻahi ʻa e palesiteni ʻo ʻAmeliká ko Lōnolo Leikeni ki he ngaahi fale uelofea ʻi ʻOkiteni, ʻi ʻIutaá.

1983

• ʻOku vahe ki he Kau Pīsopeliki Pulé ke nau tataki ʻa e polokalama uelofeá.

1985

• Kamata ʻa e polokalama Tokoni ʻOfa Fakaetangata ʻa e Siasí.

Ngaahi taʻu ʻo e 1990

• Fakaʻaongaʻi ʻe he Siasí ʻene Senitā Tokoni ʻOfa Fakaetangatá ke fili ai e ngaahi vala mo e koloa kehe ke uta ko e tokoni ki he ngaahi feituʻu ʻi māmani ʻoku masiva mo hoko ai e ngaahi fakatamakí.

1996

• Fokotuʻu ʻe he Siasí e Ngaahi Kautaha ʻOfa ʻoku ʻikai kau ai e puleʻangá ke fakahoko e ngaahi ngāue tokoni ʻofa fakaetangata ʻi ha ngaahi fonua kuo fili ke fakahoko aí.¹

• Langa ʻe he Kautaha Tokoni Fakauelofeá ʻi Mekisikou ʻa e fuofua fale tukuʻanga koloa ʻo e kau pīsopé mo e ngaahi senitā tukuʻanga koloa mavahe mei he ʻIunaiteti Siteití.

• Kamata hono toe fakaleleiʻi ʻo Uelofea Sikueá.

1997

• Lekooti e fika ʻo e ngaahi ohi naʻe fakahoko ʻe he Kautaha Tokoni Fakasōsiale ʻa e Siasí ki he taʻu ʻe tahá ʻaki ʻa e 629—ko e māʻolunga taha kuo lavaʻi ʻe he kautahá ʻi he senituli 20. ²

1999

• Māʻasi: Kamata fokotuʻu ʻe he Kautaha Tokoni Fakasōsialé ha ngaahi senitā foʻou ʻe aʻu ki he 50 ki he kumi ngāué ʻi ha ngaahi feituʻu ʻi māmani.

• Toe fakahingoa ʻa e Kautaha Tokoni Fakasōsiale ʻa e Siasí ke ui ko e Tafaʻaki Tokoni ʻa e Siasí ki he Fāmilí, pea ʻoku toe fakalahi atu ʻa e ngaahi polokalamá.

2001

• Fakafeʻiloaki ha kalasi ako ngāue foʻou ʻi he ngaahi senitā maʻuʻanga tokoni fakangāué. Fakafeʻiloaki e ngaahi nāunau ki he ako ki hono fakalele haʻate ngāue pē aʻatá ʻi he taʻu hono hokó.

• 5 ʻo Sepitemá: Toe fakatapui ʻa Uelofea Sikuea ʻi he kakato hono toe fakaleleiʻí.

2003

• 25 ʻo Sānualí: Kamata ʻa e uepisaiti Ko e Moʻui Fakapotopotó, providentliving.org.

• Tali ha fokotuʻu ke fakalahi e ngaahi fale tukuʻanga koloa ʻa e kau pīsopé ʻi he funga māmaní.

• Kamata ʻe he Siasí ha ngaahi tokoni ʻofa fakaetangata lalahi ʻe fā: ako ki he fakaake ʻo e pēpē ʻoku fāʻeleʻi mai kuo maté, vai maʻá, tufaki ʻo e ngaahi sea teketeké, mo e faitoʻo matá.

2009

• Sune: Fokotuʻu ha uepisaiti foʻou kau ki he ohí, ItsAboutLove.org.³

2010

• ʻEpeleli: Fokotuʻu ha uepisaiti foʻou kau ki he kumi ngāué, LDSjobs.org, ʻoku lolotonga ʻi he lea faka-Pilitāniá, Sipeiní, mo e faka-Potukalí.

• Tānaki atu ki ai mo hono ngaohi e meʻakaí ki he ngaahi tokoni ʻofa fakaetangatá.

Maʻuʻanga Fakamatalá

1. Vakai, “Humanitarian Activities Worldwide,” providentliving.org/content/display/0,11666,4600-1-2323-1,00.html.

2. Vakai, C. Ross Clement, “LDS Family Services” (hisitōlia naʻe teuteuʻi maʻá e Tafaʻaki Tokoni ʻa e Siasí ki he Fāmilí, 10 Mē 2000, ka naʻe teʻeki ke pulusi).

3. Vakai, Kimberly Bowen, “LDS Family Services Launches New Web Site,” Ensign, Sept. 2009, 78.

Tokoni e Kāingalotu ʻi he Teleʻa Lotoloto ʻo Kalefōniá ʻi ha ngoue kālepi ʻa e Siasí ʻi Matela, Kalefōnia ʻi he USA. ʻOku maʻu mei he ngoue kālepí ha toni fuamelie ʻe laungeau ke fakaʻaongaʻi ʻe he kakai masivá ʻi he funga māmaní.

Taupotu ki ʻolunga ʻi toʻohemá: Taʻaki mo fakaheka ʻe he Kāingalotu Hōlaní ha pateta maʻá e Kāingalotu ʻi Siamané ʻi he 1947. ʻI ʻolungá: Kuo tokoni ha ako naʻe fai ʻi ʻEkuatoa ki hono maʻu mai ʻo e meʻakaí ke tō ʻe he kāingalotú ha ngaahi ngoue fua mo foha lahi ange.

ʻOlunga, mei toʻohemá: ʻū tā naʻe fai ʻe Cornelius Zappey, ʻi he angalelei ʻa e Ngaahi ʻĀkaivi Hisitōlia ʻa e Siasí; Howard Collett; mo Peter Evans