Espesyal nga Seksyon kabahin sa Katungdanan ngadto sa Dios
Usa ka Mas Dako nga Tumong
Ang pagdapit sa uban ngadto sa mga kalihokan sa Simbahan maoy usa ka dako nga paagi sa pagtabang kanato sa pagtuman sa atong katungdanan sa priesthood sa pagdapit sa “tanan sa pagduol ngadto kang Kristo” (D&P 20:59).
Ang among stake, ang San Cristóbal Venezuela Stake, mihukom sa pagtukod og usa ka bangga sa football alang sa mga kabatan-onan sa Aaronic Priesthood. Kini nga kalihokan adunay labaw pa kay sa usa ka katuyoan, lakip ang mga pagpakighigala ug sa paglig-on sa nagkalain-laing mga korum sa priesthood.
Ang mga lider sa stake miingon nga ang mga young men lamang sa kada ward o branch ang gitugutan sa pag-apil ug sila paawhagon sa bag-ong mga miyembro ug dili kaayo aktibo nga mga miyembro sa pag-apil kanila aron sila adunay kompleto nga mga team alang sa kada pundok sa edad. Diha sa among ward, ang Táriba Ward, dihay duha lamang ka mga deacon, usa ka teacher, ug pipila ka mga priest.
Pagtukod og usa ka Team
Ang akong anak nga lalaki, si José Francisco, kinsa among mapinanggaon nga gitawag og “Junior,” apil sa korum sa mga deacon, kauban sa iyang suod nga higala nga si Oscar Alejandro. Kini klaro nga walay igo nga mga lalaki nga maapil sa bangga sa football. Busa mitrabaho sila uban sa mga misyonaryo ug sa mga lider sa ward sa pagpangita sa tanan nga dili kaayo aktibo nga mga kabatan-onan. Mihatag sila og oras kada semana sa pagpangita niadtong mga young men, nag-awhag kanila ug nagkuha sa ilang pagsalig. Tungod sa mga paningkamot niining pares sa 12 anyos ang panuigon nga mga lalaki, nakapundok sila og igo nga mga young men alang sa usa ka team. Ang usa sa mga milagro nga miresulta gikan sa ilang mga paningkamot mao nga ang among ward nakaangkon og daghan pa nga aktibong mga kabatan-onan!
Sulod sa semana ilang hapiton ang ilang bag-o nga mga higala ug dayon magbansay diha sa usa ka nataran sa komunidad. Kini dugay kaayo nga trabaho, ug sila kanunay nga gikapoy. Diha silay gamay nga pagtudlo o taktika, apan ang young men wala motugot niana sa paghunong kanila. Malipayon sila sa unsay ilang gibuhat.
Pagsugod sa Bangga
Sa katapusan, ang unang adlaw sa sangka miabut. Ang among walay kahadlok nga team sa mga deacon miabut sa stake center. Wala silay daghang pundok sa tawo nga moabiba kanila, ni sila adunay coach sa pagtabang kanila o mga uniporme sama sa kadaghanan sa ubang mga team. Apan sila midula uban ang kadasig, panaghiusa, ug gugma.
Grabe ang pagkapilde nila sa unang dula. Apan wala sila moundang, ug ang tibuok stake misugod sa pag-awhag kanila, nag-ingon nga ang mga lalaki gikan sa Táriba Ward maayo kaayo nga mga ehemplo.
Si Junior mao ang tigbantay sa goal. Iyang gibantayan ang goal uban sa ingon kadako nga tinguha nga ang mga bola nga iyang gialihan mibilin og mga marka diha sa iyang mga kamot. Nianang pagkagabii diha sa panimalay, misulti siya kanako nga ang iyang mga kamot sakit gyud ug nga siya nagkinahanglan og pipila ka mga guwantis. Gipagula namo ang among mga tinigum aron kami makapalit kaniya og usa ka parisan nga guwantis. Apan ang mga guwantis diha sa tindahan mga mahal kay sa among maabut, busa ang gipalit namo panapton nga guwantis alang sa tanaman. Gidawat niya kini uban sa dakong pasalamat.
Wala ako masayud kon diin nakuha sa iyang team ang awhag sa pagpadayon. Katapusan sila diha sa mga ranking, apan mipadayon sila sa pagdula.
Sa katapusan panahon na kini alang sa elimination rounds. Tungod sa kakulang sa mga deacon diha sa stake, kining walay kahadlok nga grupo nakahimo sa pagdula sa katapusan apan midula sila batok sa usa ka praktisado nga team kansang coach usa ka maayo kaayo nga magdudula. Nakahatag siya og daghan nga panahon sa pagbansay sa iyang team. Sila mao ang nag-una nga team, aduna silay terno nga mga uniporme ug gipakita ang disiplina nga nagagikan sa pagbansay. Ang ilang coach ingon og mibati og pagsalig mahitungod sa pagdaug sa dula tungod kay ang team sa akong anak nga lalaki dili kaayo maayo.
Ang akong bana bag-o pa lamang mibalik gikan sa biyahe, busa mihukom siya sa pagtabang sa mga deacon. Giawhag niya sila, gihatagan og pipila ka mga tambag, ug sa kahibulong midaug sila. Busa nakahimo sila sa pag-atubang sa uban nga team sa stake. Ang among young men midaug pag-usab!
Sa diha nga nahuman ang dula, ang tanan namakpak. Ang pundok halos dili makatuo nga kadtong mga young men nakahimo sa pagdaug sa unang dapit sa kategoriya sa deacon ug ikatulong dapit diha sa stake alang sa tibuok Aaronic Priesthood.
Nagkab-ut sa Ilang mga Tumong
Kini nga kasinatian nagtudlo kanato mahitungod sa mga baruganan ug mahangturon nga mga kamatuoran nga atong magamit dinhi niini nga kinabuhi. Ang mga young men sa stake maoy mga ehemplo sa gugma, pagkaaktibo, paglahutay, pagkadasig, ug panaghiusa isip usa ka team. Gipakita nila ang tinuod nga katuyoan sa kalihokan. Gitukod nila ang talikala sa panaghigalaay ngadto sa uban.
Paghulagway pinaagi ni Bjorn Thorkelson