Vaega Faapitoa o le Polokalama o le Tiute i le Atua
O Se Sini e Sili Atu
O le valaauliaina o isi i gaoioiga a le Ekalesia o se auala sili lea e fesoasoani ia i tatou e faamaea ai o tatou tiute faaleperisitua o le valaauina o “tagata uma ia o mai ia Keriso” (MFF 20:59).
Na fuafua le matou siteki o San Cristóbal Venesuela, e faatulaga se taamilosaga o le lakapi faa-Amerika mo le autalavou a le Perisitua Arona. Na sili atu ma le tasi le faamoemoega o lenei gaoioiga, e aofia ai le fausia o ni faauoga ma faamalolosia le tele o vaega o le korama a perisitua.
Na saunoa mai taitai o le siteki e na o alii talavou o uarota ma paranesi taitasi e faataga e auai ma e latou te uunaia tagata fou ma e le toaaga mai ina ia latou auai faatasi ina ia atoa au mo vaitausaga taitasi. I la matou uarota, o le Uarota a Táriba, sa na o le toalua tiakono, tasi le aoao, ma ni nai ositaulaga.
Fausiaina o se Au
O lo’u atalii o, José Francisco, lea ma te valaauina ma le alofa ia “Junior,” sa avea ma se vaega o le korama a tiakono, faatasi ai ma lana uo mamae o Oscar Alejandro. Sa manino lava le le lava o tama e auai i le taamilosaga soka. O lea sa latou galulue faatasi ma faifeautalai ma taitai o uarota ina ia saili uma le autalavou e le toaaga mai. Sa latou faaaluina le taimi i vaiaso taitasi e sailia ai nei alii talavou, uunaia i latou ma mauaina lo latou faatuatuaga. Ona o taumafaiga a tamaiti e ta’i 12 tausaga, sa mafai ona lava alii talavou mo se au. O se tasi o vavega ma mafua mai i a latou taumafaiga o le mauaina lea e lo matou uarota o le tele o nisi talavou malolosi!
I le aluga o le vaiaso latou te pikiina a latou uo fou ma fai faataitaiga i se malaetaalo o le nuu. Sa tele naua le galuega, ma sa latou le lavava i taimi uma. E laitiiti se latou aoaoga po o se fuafuaga, ae e lei taofia ai e alii talavou. Sa latou fiafia i mea na latou faia.
Amataina o le Taamilosaga
Na iu lava ina oo mai le aso muamua o le taamilosaga. Sa taunuu la matou au lototoa o tiakono i le nofoaga autu. E lei tele nisi e tapua’ia i latou, ma e lei i ai foi se latou faiaoga e fesoasoani ia i latou po o ni ofu taalo e pei o le tele o isi au. Peitai sa latou taaalo ma le naunautai, lotogatasi, ma le alofa.
Sa latou faiaina tigaina i le taaloga muamua. Ae latou te lei solomuli ai, ma na amata ona faamalosiau le siteki atoa ia i latou, ma fai atu o alii mai le Uarota a Táriba o ni faataitaiga lelei.
O Junior sa avea ma tagata e puipuia le laina sikoa. Sa ia puipuia ma le malosi le laina sikoa ma o polo na ia polokaina na tuua ai ni maka i ona lima. O lena po i le fale, na ia ta’u maia ia te au ua matuai tiga lava ona lima ma e na te manaomia ni totigilima. Sa ma aumaia i fafo le matou tupe teu ina ia ma faatauina se pea totigilima mo ia. Ae na le lava le ma tupe aua na sili atu le tau o totigilima i le faleoloa o lea la sa ma faatauina mai ni totigilima faitogalaau. Sa ia faaaogaina ma le faafetai tele.
Ou te le iloa po o fea na maua mai ai e lana au le uunaiga e faaauau ai pea. Sa mulimuli lava i latou i le faatulagaga, ae na faaauau pea ona latou taaalo.
Na oo i le taimi o le pau ma nofo. Ona o le le lava o tiakono i le siteki, o lea na mafai ai ona taaalo lenei vaega lototoa i suega siamupini, ae na latou taaalo ma se au na lava le latou sauniuniga ma o le latou faiaoga o se tagata taalo lelei tele. Sa ia faaaluina le tele o taimi e koleni ai lana au. O le latou au o le au pito i luga; sa tutusa uma o latou toniga ma na faaalia le usiusitai lea e mafua ona o toleniga. Sa matuai lagona lava e le latou faiaoga le latou malo aua e le lelei le au a si ou tama.
E lei leva ona foi mai lo’u toalua mai sana malaga, ma o lea sa ia fuafua ai e fesoasoani i tiakono. Sa ia uunaia i latou, ma tuuina atu nisi o fesoasoaniga, ma o se mea na ofo ai na latou malo. Ma o lea sa mafai ona latou fetaui ma au a le isi siteki. Sa toe malo foi a matou alii talavou!
Ina ua uma le taaloga, sa patipati tagata uma. Sa le talitonu le au maimoa na malo nei alii talavou i le tulaga muamua o le vaega a tiakono ma o le tulaga tolu i le siteki mo le au Perisitua Arona atoa.
Ausina o a Latou Sini
Na aoaoina i matou e lenei aafiaga e uiga i mataupu faavae ma upumoni faavavau lea o le a tatou faaaogaina iinei i lenei olaga. Na avea ia alii talavou o le siteki ma ni faataitaiga o le alofa, faatoaagaina mai, onosai, naunautai, ma le galulue faatasi o se au. Sa latou faaalia le autu moni o le gaoioiga. Sa latou fausia ni sootaga o le faauoga ma isi.
Ata na saunia e Bjorn Thorkelson