Wan Koling blong Wan Konvet
Mi bin wan niu konvet mo mi no save plei piano. Be mi bin glad tumas long koling blong mi we bae i jenisim laef blong mi, olsem wan man blong plei piano long branj.
I no longtaem afta we mi bin baptaes taem mi bin gat 10 yia, long Lapinranta, Finlan, mi kasem fas koling blong mi. Hem i bin long yia 1960, mo smol branj blong mifala i bin nidim bigwan blong wan i plei piano blong i go wetem ol hym blong sakramen miting. Oli bin askem mi blong mekem wok ia.
Nomata we mama blong mi i bin leftemap tingting blong brata blong mi mo mi blong mekem talen blong mitufala long saed blong art i kam antap, mi no bin save olsem wanem blong plei long piano, mo mifala i no bin gat wan piano. Be mi bin wantem blong mekem koling blong mi, mekem se mifala i bin mekem wan plan.
Long famle haos naet, mifala i tokbaot wanem nao koling ia i minim long mifala. Be, from se mama blong mi i bin wan wido wetem tu yang pikinini, mifala i bin save se bae i wan bigfala jalenj blong mifala blong save pem wan piano mo pem ol piano lesen. Mifala i bin disaed se mifala evriwan i glad blong mekem ol sakrifaes we i nid blong mekem.
Fas sakrifaes we famle blong mi i bin mekem, i wan sakrifaes long saed blong mane. Mifala i bin disaed se stat long hot taem kasem taem we i wom, bae mifala i ron long baeskel be bae mifala i no tekem bas. Brata blong mi, Mati, i bin gat strong paoa long tingting mo i kam gud blong ron long baeskel—nomata i gat sno mo aes. Mi nomo go pem klos, mo mi lanem olsem wanem blong somap. Mifala i bin lanem tu blong laef mo yusum gud ol samting. Mifala i statem wan garen long rurol eria, kolosap long haos blong ol bubu blong mifala mo mifala i stap storem ol kaekae blong taem blong kolkol. “Holidei” blong mifala, oli kam olsem ol trip blong mama blong go long tempol long Switselan, o ol piknik o kamp kolosap long hom.
Nambatu sakrifaes we famle blong mifala i bin mekem, hem i long saed blong taem. Mifala i bin serem ol wok blong haos, mo stretem ol taem mo ol narafala aktiviti mo homwok, blong mekem se mi gat inaf taem blong praktisim piano. From ol sakrifaes mo had wok blong mifala, plante taem, Mama bae i talem se mifala i no gat taem blong go mekem trabol olsem ol narafala pikinini we oli sem yia long mifala. I tru, koling blong mi i kam olsem wan famle koling, longtaem bifo mi save plei wan not.
Mi stat blong tekem ol lesen wetem wan miusik tija long lokol skul. Mi bin praktis, mo yusum wan pepa kibod mo mi stap praktis long wan piano long jos. Taem piano tija blong mi i bin muv i go, mifala i bin pem piano blong hem, mo oli bin agri blong mi stadi wetem wan piano tija we plante man i save gud hem long eria blong mifala.
Mi bin lanem ol hym miwan nomo mo mi bin mekem plante praktis wetem branj miusik daerekta. Evriwan i bin leftemap tingting blong mi—nomata sapos wan “konkon” not i kam insaed. Tija blong mi i bin sek mo harem nogud afta we hem i faenemaot se mi stap plei long fored blong ol pipol bifo mi bin lanem gud mo lanem baehat ol miusik. Be, nating mi plei long wan han, i moa gud bitim we i no gat miusik nating.
Mi ron long baeskel blong go long ol lesen blong mi, mo taem we taem blong kolkol i kam, mi traem blong wokbaot o ski sapos i posibol. Long ol Sandei, mi stap wokbaot miwan i go long ol miting blong Jos blong mekem se mi save kasem jos wan aoa bifo miting i stat mo gat taem blong praktis. Mi agri blong go long bas nomo taem tempereja i kasem -15ºC (5ºF). Mi no bin wantem save long ren mo sno; taem i bin pas kwik taem mi bin stap wokbaot from se mi bin gat plante naesfala hym blong kipim kampani long mi. Taem mi stap wokbaot, mi stap krosem ol flat ples wetem ol paeonia (luk long “Kam, Kam Ol Sent,” Tabu Singsing mo Singsing blong Ol Pikinini, pej 2), mi stap wokbaot antap long hil blong Saeon (Luk long “Antap Antap Tumas,” Tabu Singsing mo Singsing blong Ol Pikinini, pej 30), mo mi stap stanap wetem ol yut we bae oli neva stop (luk long “True to the Faith,” Hymns, no. 254). Bae mi neva save stop wetem sapot olsem—nomata we famle blong mi mo mi i bin ol faswan Lata-dei Sent long komiuniti blong mifala long Is Finlan, we i stap long sado blong boda blong Rasia.
Afta long plante yia, mi kam gud moa blong plei mo mi save mekem miusik be i no blong jes plei ol stret not nomo. Mi bin lanem blong prea blong jusum miusik, blong mekem se Spirit bae i stap long miting. Mo, wanem i moa impoten, testemoni blong mi long gospel i bin kam long mi tru long miusik. Mi save tingbaot isi nomo ol filing, ol toktok, mo ol mesej blong ol hym sapos mi gat kwestin long wan samting. Mi bin save se ol prinsipol mo odinens blong gospel oli bin tru, from we mi bin lanem olgeta wan laen afta wan nara laen, mo wan not afta long wan nara not.
Mi tingbaot wan spesel dei taem mi kasem tes long komitmen blong mi long ol prinsipol ia. Mi bin gat 14 yia; mi bin laekem blong swim mo mi bin drim blong swim long taem blong Olimpik. Mi no stap resis long Sandei, be mi stap gohed. Laswan, taem Olimpik gem long Meksiko Siti i stap kam kolosap, wan koj i bin invaetem mi blong tekempat long wan spesel trening.
Be, trening i bin stap long evri Sandei moning long taem blong Sandei Skul. Mi mekem eskius se bae mi save go long praktis mo mestem Sandei Skul from se bae mi gobak long jos long stret taem blong go long sakramen miting long naet. Mi bin sevem mane blong bas mo mi mekem plan long evri samting. Long Satedei bifo trening i kam, mi bin talem plan blong mi long mama blong mi.
Mi bin luk long ae blong hem se hem i harem nogud o i filim daon, be hem i talem nomo se desisen i blong mi mo oli bin tijim mi finis long wanem we hem i raet. Long naet ia, mi no save karemaot ol toktok blong singsing ia “Choose the Right (Jusum Raet)” (Hymns, no. 239) long maen blong mi. Ol toktok ia oli ring long hed blong mi olsem wan singsing we i stap ripripitim hemwan.
Long Sandei moning, mi gat bag blong swim long wan han, mo miusik bag blong mi long narafala han, mo mi stap hop blong giaman long mama blong mi blong bilivim se mi stap go long jos. Mi go aotsaed long bas stop. I hapen se bas stop we i stap go long ples blong swim i stap long saedrod blong mi, mo hemia we i go long japel i stap long narasaed rod. Taem mi stap wet, mi stap kam kros. Sora blong mi i stap ring wetem miusik ia “Have I Done Any Good? (Mi mekem gud wok o no?” (Hymns, no. 223)—Hym ia nao mi plan blong plei long hem long Sandei Skul long dei ia. Mi bin save long eksperiens, se hym ia i had, ol toktok blong hem i had, mo i gat ol hae not, mo bae i nogud tumas sapos piano i no plei wetem.
Taem mi stap toktok long miwan, tufala bas i kam. Bas blong go long ples blong swim i stop, mo draeva blong bas we i go long jos i stop mo i lukluk mi, i konfius from hem i save se mi stap tekem bas blong hem oltaem. Mifala evriwan i lukluk long wanwan long mifala bakegen blong smol taem. Mi stap wet long wanem? Mi bin jusum Lod (luk long “Who’s on the Lord’s Side? Hu I Stap long Saed blong Lod” Hymns, no. 260). Mi bin mekem promes blong go long ples we Hem i wantem mi blong go long hem (luk long “Talem se mi redi blong go Masta,” Tabu Singsing mo Singsing blong Pikinini, pej 46). Desisen blong mi blong kipim ol komanmen, mi bin mekem longtaem finis i kam (luk long “Keep the Commandments, (Kipim Ol Komanmen” Hymns, no. 303).
Bifo we tingting blong bren blong mi i kasem tingting blong hat blong mi, bodi blong mi i tekova. Mi spid krosem rod mo sakem han long narafala draeva blong bas blong hem i go. Mi pem bas, mo go long bak blong bas we i stap go long jos, mo mi stap luk ol drim blong mi blong swim oli draev i go long narasaed wei.
Evriwan i ting se mi stap krae long dei ia from se mi bin filim Spirit. Be mi stap krae from se drim blong mi olsem pikinini i jes foldaon, mo from se mi bin sem we mi bin gat tingting blong go swim long Sabat. Be long Sandei ia, olsem ol Sandei bifo mo afta long hemia, mi bin mekem koling blong mi i hapen.
Taem we mi rere blong go long Kolej, mi bin trenem plante memba blong branj blong lidim miusik mo plei long piano. Long kolej, mi bin gohed blong plei long piano mo mi tekem sam lesen blong organ. Mi ting se janis blong mi blong go long Latin Amerika i nomo gat nao taem mi nomo gohed blong kompit blong swim; be afta we mi finisim Masta digri blong mi long Brigham Yang Yunivesiti, mi bin go long wan misin long Kolombia. Taem mi stap yet long misin blong mi, mi tijim ol piano lesen. Mi bin wantem blong livim wetem ol Sent ia, presen blong miusik. Ol pikinini mo ol yut long Kolombia oli bin wokbaot plante kilometa long hot san blong gat janis blong lanem blong plei long piano. Olgeta tu oli bin stat wetem wan han, kasem taem oli bin progres blong plei wetem tufala han. Mo oli bin mekem moa sakrifaes bitim mi, long hadwok blong olgeta blong lanem blong plei long piano.
Hem i moa long 50 yia nao stat long taem we mi bin baptaes. Mi bin travel longlongwe long hom blong mi, Finlanf, be nomata weaples mi bin go long hem, oltaem i bin gat nid blong wan i plei long ol hym. Lanwis blong miusik we i blong ful wol i bin bildim ol brij blong andastaning mo lav long plante ples.
Tedei, ol han blong mi oli slo mo oli soa. Plante man blong plei piano we oli save moa oli bin tekem ples blong mi. Mama blong mi, plante taem i harem nogud taem hem i lukbak long eli yia blong mi long Jos mo ol sakrifaes we mi bin mekem, ol kilometa we mi bin wokbaot long hem, mo ol samting we mi no bin gat. Hem i bin fraet se kolkol ia i bin mekem se bun blong han blong mi i soa. Be, mi tekem “ol mak blong faet” blong mi wetem glad. Mi putum evri glad mo harem nogud blong mi insaed long miusik. Mi bin lanem blong laf mo krae tru long ol fingga blong mi.
Hat blong mi i singsing wetem tangkyu taem mi tingting se Papa long Heven mo ol lida blong mi oli bin kea inaf blong askem wan yang gel blong mekem wan wok olsem we i gat jalenj. Koling ia i bin helpem mi blong kasem wan strong save abaot gospel mo i bin letem mi helpem ol narafala blong filim Spirit tru long miusik. Mi mi wan pruf we i laef se ol niu konvet oli nidim wan koling—mo ol smol gel tu, we oli no gat skil long piano. Tru long fas koling blong mi, mi bin faenem se wetem God, i no gat wan samting we i no posibol, mo we Hem i gat wan plan mo wan stamba tingting long wanwan long yumi, ol pikinini blong Hem. Mo tru long miusik, mi kasem wan testemoni we i no seksek abaot gospel blong Jisas Kraes we i bin kambak long wol.
Ol pikja oli kam long Maek Malm