Wol Lidasip Trening I Haelaetem Rod blong Tru Fasin blong Gro
Ol lida blong Jos oli eksplenem mining blong “tru fasin blong gro” mo olsem wanem blong kasem fasin ia, long taem blong Wol Lidasip Trening Miting long 11 Febwari 2012.
Presiden Dita F. Ukdof, Seken Kaonsela blong Fas Presidensi, mo ol memba blong Kworom blong Olgeta Twelef Aposol, Presidensi blong Olgeta Seventi, mo ol presidensi blong ol okseleri blong Jos oli bin tekempat long instraksen we i bin go aot long ol lida blong Jos raon long wol.
“Long fasin blong toktok long Jos, fasin blong gro hem i save minim ‘ol niu memba.’ … Be, Tru Fasin blong Gro, hem i minim ‘blong namba blong ol aktiv memba, i gro i kam bigwan,’” Presiden Ukdof i bin eksplenem.
Elda M. Rasel Balad blong Kworom blong Olgeta Twelef Aposol i bin ademap “fasin blong gro i hapen taem we fasin blong jenisim laef long gospel, we i hapen long taem blong ful laef, i mekem se fet long wanwan man, woman mo famle i kam antap moa.”
Fet ia we i kam antap, i tekem ol samting we i no isi blong save makem, olsem prea evri dei, stadi long skripja, famle haos naet, lav long hom, mo eksperiens blong yuwan wetem Atonmen, Presiden Ukdof i talem.
“Plante taem tumas, yumi mekem wanem we i naes mo i simpol insaed long gospel i kam had mo fasfas tumas wetem ol lis we i no gat en blong ol ditel samting we yumi wet blong luk se i hapen,” hem i talem. “Be, taem yumi lukluk nomo long kwestin ia, ‘from wanem’ i gat gospel, plante long ol tingting ia we i fasfas oli go lus.”
Plante samting we oli bin kamaot long brodkas i lukluk nomo long ol ki doktrin mo prinsipol we oli givim ol ansa long ol kwestin ia we i stat wetem “from wanem.”
“Ol stret ‘from wanem’ kwestin bae oli lidim yumi long stret desisen long saed blong ‘hu,’ ‘wanem,’ ‘wetaem,’ ‘weaples,’ ‘from wanem,’ mo ‘olsem wanem,’ Presiden Ukdof i talem.
Mared mo Famle Insaed long Plan
“Insaed long Jos, i gat ol famle,” Presiden Boed K. Peka, Presiden blong Kworom blong Olgeta Twelef Aposol i bin talem. “Ol wod mo ol stek oli kam long nambatu ples. Taem yumi tokbaot ol famle, nao yumi luk tru fasin blong gro insaed long Jos.”
Hem i bin talem se evri hasban mo papa i mas stap olsem wan ofisa insaed long prishud, insaed long hom blong hem, we i stap prisaed ova long famle blong hem long stret mo gud fasin. Hem i talem tu, semmak, ol prishud lida oli mas klin inaf blong lidim ol man—nomata ol ofis insaed long prishud oli jenis, evri man we i klin inaf we i kasem prishud i gat prishud ia olsem we narawan i gat (luk long D&C 1:20).
Elda Rasel M. Nelson blong Kworom blong Olgeta Twelef Aposol i bin poenemaot gud se ol hasban mo ol waef, ol papa mo ol mama, oli mas bildimap wan rilesensip blong lav, fasin blong sakem sin, mo prea blong save gat sakses blong protektem mo mekem famle i kam strong moa; mo hemia i stap long “medel blong plan blong Krieta blong fiuja laef blong ol pikinini blong Hem” (“Famle: Wan Ofisol Toktok I Go long Wol,” Liahona mo Ensign, Nov. 2010, 129).
“Tri taem, insaed long ol tabu skripja, woning ia i bin kamaot se bae ful wol bae i lus evriwan long taem we Lod bae i kambak, sapos sam samting oli no stanap long stret ples,” hem i talem. “Long wanwan long ol taem ia, woning ia i tokbaot se famle blong ol man bae i olsem wanem sapos i no gat ol siling odinens blong tempol. Sapos i no gat ol odinens ia blong fasin blong sevem man, glori blong God bae i no save kamtru.”
Blong kasem gol ia long en—laef we i no save finis mo blong evriwan long ol pikinini blong God oli kam olsem wan god—i nidim blong i gat tru fasin blong gro insaed long ol hom, insaed long ol wod mo ol branj, mo raon long Jos.
Blong Yusum Gospel long Laef
Tru fasin blong gro mo fasin blong jenisim laef, i kam taem wan i yusum gospel long laef blong hem evri dei. Long wan toktok raon, blong kwestin mo ansa, Elda L. Tom Peri mo Elda D. Tod Kristofeson blong Kworom blong Olgeta Twelef Aposol, oli bin eksplenem se stret fasin blong yusum gospel long laef i blong mekem mo kipim ol kavenan blong tempol. Elda Kristofeson i bin talem se fasin blong obei long ol kavenan i save jenisim fasin blong man blong folem fasin blong wol, i kam olsem wan man we i gat fasin blong wan Sent, hemia wetem taem.
Blong go aot long ol narawan, i wan narafala impoten saed blong fasin blong yusum gospel long laef. Ol lida oli talem se ol memba oli gat responsabiliti ia, we i stap long olgeta olsem wanwan man mo woman, mo tu, olsem wan Jos, blong go aot blong sevem olgeta we oli stap long nid long saed blong spirit mo long saed blong bodi.
Elda Kristofeson i bin talem: Yumi no mas gat tu tingting blong joenem han wetem ol narafala pipol blong ol nara jos mo ol narafala oganaesesen we oli givim seves blong stap givim kea long olgeta we oli pua mo olgeta we oli stap long nid. Ol prishud lida oli mas lidim ol wok ia, be ol memba mo ol misinari oli mas sapotem wok ia tu.
Wan raon tebol toktok i bin poenemaot se wok i mas lukluk moa blong tijim ol famle, mekem olgeta man we oli kasem Melkesedek Prishud oli kam strong moa, mo blong givhan blong bildimap fet mo ol testemoni blong ol yut. Elda Balad mo Elda Nil L. Andesen blong Kworom blong Olgeta Twelef Aposol, oli bin tekem pat long toktok ia wetem Elda Ronal A. Rasban blong Presidensi blong Olgeta Seventi; Ilein S. Dalton, Yang Woman jeneral presiden; mo Rosmeri M. Wiksom, Praemeri jeneral presiden.
Elda Rasban i bin talem se evri lida i nidim blong stap insaed long wok ia blong tekem ol memba oli kambak aktiv fulwan long Jos, mo Elda Andesen i bin talemaotgud se ol yut oli nidim blong tekempat moa long wok blong mekem ol narafala yut oli kambak aktiv mo mekem ol narafala yut oli kam strong moa.
Blong Mekem Tru Fasin blong Gro I Hapen
Presiden Ukdof i poenemaot se tru fasin blong gro i kam taem yumi yusum ol prinsipol blong gospel long laef blong yumi evri dei.
“Taem yufala i stap tingting long ol topik ia, askem yufalawan abaot ‘from wanem’ seves blong yufala, mo ministri blong yufala, mo risal ‘blong hemia i karem wanem i kam’ insaed long responsabiliti blong yufala olsem wanwan man o woman, mo tu, olsem wan kaonsel,” hem i talem.
Lanem Moa
Wanwan i save lukluk, lisin, printim mo daonlodem ol toktok blong brodkas ia we i stap long twelef lanwis, taem oli go long lds.org/study/other-addresses mo afta, taem oli klik long Worldwide Leadership Training.
Elda M. Rasel Balad blong Kworom blong Olgeta Twelef Aposol i stap toktok long taem blong wan raon tebol toktok we oli bin holem olsem pat blong wan Wol Lidasip Trening Miting long Febwari 2012.
©IRI