Elda Kristofeson, Elda Jensen, Tufala I Tijim Ol Memba long Ajentina

Long Satedei 12 Novemba 2011, Elda D. Tod Kristofeson blong Kworom blong Olgeta Seventi mo Elda Jei E. Jensen blong Presiden blong Olgeta Seventi, tufala i bin toktok long olgeta yut, olgeta yang adalt, olgeta prishud lida, olgeta misinari, mo olgeta memba long Salta, Ajentina.

Mo tu, i bin gat Elda Mevin B. Anol, Presiden blong Saot Amerika Saot Eria; waef blong hem, Devona; mo Elda Ruben Spital, Eria Seventi. Waef blong Elda Kristofeson, Kati, mo waef blong Elda Jensen, Lona tu, we tufala i bin stap long taem ia.

Kolosap 1 300 yut mo papa mo mama, oli bin stap long faeasaed ia we tufala, Elda Kristofeson mo Elda Jensen i bin toktok long hem. Wan nara 10 taosen memba long 70 stek senta raon long Ajentina oli bin lukluk brodkas ia.

Elda Jensen, we i bin stap bifo olsem Saot Amerika Saot Eria Presiden i bin talem: “Sapos yufala i no tingbaot wan samting we mi bin talem, bae mi wantem we yufala i mas tingbaot wan toktok blong wan profet, Presiden Tomas S. Monson, we mi testifae se hem i wan tru profet blong God. Hemia nao toktok ia: ‘Ol desisen oli talemaot fiuja blong yu.’”

Yumi gat fridom blong jusum—paoa ia mo spesel janis blong mekem ol desisen—Elda Jensen i talem, mo wetem ol desisen ia, yumi stap jusum fiuja blong yumi.

Hem i bin talem stori blong wan fren we, wan naet, i bin jusum blong drink mo draev mo i mekem wan aksiden we 2 man i bin ded long hem. Hem i komperem wetem stori blong joes blong hem mo waef blong hem blong pusumbak taem blong mared blong tufala blong mekem se hem i save go long wan misin taem hem i bin wan yangfala man.

“Taem mi bin kambak, mitufala i bin mared long tempol. Mitufala i bin mekem ol kavenan, we mitufala i bin riniu evri wik long laef blong mitufala. Mitufala i bin mekem wan desisen we i talemaot fiuja laef blong mitufala,” hem i talem.

Sista Kristofeson i kam afta, i serem testemoni blong hem abaot blesing blong kipim ol kavenan, mo Elda Kristofeson i bin endem miting.

“Wan samting ia nomo we yu nidim tru, hem i lav mo fet,” Elda Kristofeson i bin talem. “Hem i fet we i bin helpem mitufala long mared blong mitufala, famle, bisnis mo wok.”

Hem i poenemaot gud se ol komanmen oli givim daereksen long laef blong yumi mo i helpem yumi blong kasem wanem we i impoten tru.

Afta, hem i bin givim kaonsel long tugeta, ol yut mo ol papa mo mama blong olgeta, blong mekem komitmen blong folem kaonsel we i stap long buk ia, Blong Ol Yut Oli Kam Strong.

Hem i talem: “Hemia bae i mekem ol pikinini blong yufala oli kam strong moa, nomata taem oli luk se oli stap olgetawan—bae oli save se papa mo mama blong olgeta oli stap folem ol semfala prinsipol.”

Elda Kristofeson i bin endem wetem wan toktok blong lav i go long ol memba long Ajentina, long ples we hem i bin go long misin kolosap 50 yia finis i pas.

Taem tufala i bin stap long Salta, Elda Kristofeson mo Elda Jensen i bin mit tu wetem ol lokol misinari mo ol yang singgel adalt, mo tufala i bin pasem lav blong ol lida blong Jos long olgeta.

Tugeta, Elda Kristofeson, mo Elda Jensen i bin toktok wetem ol misinari we oli stap long Ajentina Resistensia Misin, eli long Novemba 2011.

Pikja i kam long Jemes Dalrimpol