Fas Presidensi Mesej
“Hem I Girap Bakegen long Ded”
Testemoni blong Wan Profet
“Kristin saon we i ring ,” Presiden Tomas S. Monson i bin talem, i we Jisas blong Nasaret i bin girap long ded. “Samting ia, we Laef Bakegen long Laef i tru, i givim long wan mo long evriwan, pis ia we i bigwan bitim save” (luk long Filipae 4:7).1
Long ol sot toktok we oli kam afta, Presiden Monson i serem testemoni blong hem abaot Laef Bakegen long Ded blong Sevya mo i talem tangkyu blong hem from, mo i talem tu se from Pikinini i bin winim ded, evriwan long ol pikinini blong Papa we oli kam long wol bae oli laef bakegen.
Laef we i gohed afta long Laef long Wol Ia
“Mi biliv se i no gat wan long yumi we i save andastanem fulwan wanem we i kam wetem wanem we Kraes i bin mekem from yumi long Getsemane, be mi glad evri dei long laef blong mi from sakrifaes blong Hem we i pem praes long bihaf blong yumi.
“Long las minit, Hem i save tanem baksaed blong Hem nomo. Be Hem i no bin mekem. Hem i bin pas i go; i go daon bitim evri samting blong mekem se Hem i save sevem evri samting. Taem yumi mekem olsem, Hem i bin givim yumi, laef we i gohed afta long laef long wol ia. Hem i bin pembak yumi long wanem we Adam i bin foldaon long hem.
“Dip insaed long sol blong mi, mi mi talem tangkyu long Hem. Hem i bin tijim yumi olsem wanem blong laef. Hem i bin tijim yumi olsem wanem blong ded. Hem i bin mekem se i sua se bae Hem i sevem yumi.”2
Stap Ronemaot Tudak blong Ded
“Long sam situesen, olsem long taem blong bigfala safa mo sik, ded i kam olsem wan enjel blong sore. Be, long wan bigfala pat, yumi ting long hem olsem enemi blong hapines blong man.
“Tudak blong ded, oltaem bae laet blong trutok we i kamaot long revelesen i save ronemaot. ‘Mi nao stamba blong laef bakegen long ded. Mi nao mi stamba blong laef,’ Masta i bin talem. ‘Man we i bilif long mi, nating we bambae i ded, hem bambae i mas laef. Mo man we i laef, i bilif long mi, hem bambae i no save ded samtaem.’
“Stret save ia—yes, mo tu wan konfemesen we i kam long heven—se i gat laef afta long gref i save givim pis we Sevya i bin promesem taem Hem bin talem long ol disaepol blong Hem: ‘Mi putum pis blong mi i stap wetem yufala. Mi nomo mi givim pis ya long yufala. Mo pis ya we mi mi givim, i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.’”3
Hem I No Stap long Ples Ya
“Sevya blong yumi i bin laef bakegen. Ol samting we i bin hapen, we oli gat moa glori, oli givim kamfot, mo i mekem maen i stap long pis, long histri blong man, i bin tekem ples—viktri ia ova long ded. Sobodi mo harem nogud long Getsemane mo Kalvari i go lus evriwan. Fasin blong sevem evri kaen man i bin hapen tru. Foldaon blong Adam, Hem i bin pembak.
“Emti tumb ia, long fas Ista moning i bin ansa long kwestin blong Job, ‘Sipos mifala i ded, bambae mifala i no save laef bakegen? Long yufala evriwan we i stap harem voes blong mi, mi talemaot, sapos yumi ded, bae yumi laef bakegen. Yumi save hemia, from yumi gat laet blong trutok ia we i kam tru long revelesen. …
“Ol dia brata mo sista blong mi, long aoa blong yumi we yumi harem nogud tumas, yumi save kasem wan bigfala pis we i kamaot long enjel we i kam long fas Ista moning ia: ‘Hem i no stap long ples ya. Hem i laef bakegen finis.’”4
Evriwan Bae I Laef Bakegen
“Yumi laf, yumi krae, yumi wok, yumi pleiplei, yumi lavem man, yumi laef. Mo afta, yumi ded. …
“Mo bae yumi ded nomo i stap sapos i no from wan Man mo misin blong Hem, we i Jisas blong Nasaret. …
“Wetem evri hat blong mi, mo wetem evri strong paoa blong sol blong mi, mi leftemap voes blong mi long wan testemoni olsem wan spesel witnes, mo talemaot se God i stap laef. Jisas i Pikinini blong Hem, Wan Stret Pikinini Ia Nomo blong Papa we i bon long wol ia. Hem i Ridima blong yumi; Hem i loya blong yumi long fored blong Papa. Hem nao i bin ded long kros blong pemaot ol sin blong yumi. Hem i kam fas frut blong Laef Bakegen long Ded. From se Hem i bin ded, bae yumi evriwan bae i laef bakegen.”5
Wan Witnes blong Miwan
“Mi talemaot witnes blong miwan, se Jisas i bin winim ded, Hem i bin winim viktri ova long tumb. Bae ol toktok ia oli kam tabu tru long Hem we i bin mekem ol toktok ia oli kamtru, mo bae oli kam wan save long yumi evriwan. Tingbaot gud olgeta. Holemtaet gud olgeta. Givim ona long olgeta. Hem I Girap Bakegen long Ded ”6
Yusum Mesej Ia blong Tij
Afta we yu serem ol toktok ia we oli kam long mesej blong Presiden Monson, lukgud long testemoni we hem i serem abaot tru mining blong Ista. Yu save askem ol kwestin ia long ol memba blong famle: “Wanem nao hem i minim long yu, se wan profet we i laef i stap testifae abaot ol trutok ia tedei? Olsem wanem nao yu save yusum ol trutok ia long laef blong yu? Tingting blong ademap testemoni blong yu tu.
Tomas we I Gat Tu Tingting, i kam long Kal Heinrij Blok