Stap Storian Tugeta

Hemia sam tingting blong gat famle “toktok taem” blong yu:

Askem papa mo mama blong yu blong putum sam taem evri dei blong famle blong yu i storian tugeta. Ating hem i long taem blong kakae, o long wan nara taem long dei.
Mekemsua se evriwan i tekem taem blong toktok mo lisin. Mekem evriwan i stap!
Gat respek long tingting long ol memba blong famle blong yu. Mekemsua se evriwan i filim se wanem we hem i stap talem i impoten.

Ol Gem blong Stap Storian

Yu nidim sam tingting blong gat toktok taem? Traem ol gem ia:

Sakem balong: Sapos famle blong yu i wan bigfala famle, o i gat had taem blong gat wanwan taem blong toktok, yusum wan balong blong soem huia nao bae i toktok. Afta we wan we i holem balong i talem wanem we hem i gat blong talem, hem i sakem balong i go long wan nara memba blong famle blong hem i gat taem blong toktok.

Man blong Mekem Intaviu: Serem ol grup long tu mo wan i gat taem blong hem blong mekem se hem i man blong mekem intaviu. Tingbaot sam kwestin we yu wantem askem, mo afta askem ol kwestin ia. Yu save yusum wan tru maek o rikoda blong mekem ol intaviu ia.

Wanem Nao Bae Yu Yu Mekem? Wanem i tekem taem blong askem famle sam defren kwestin we i stat wetem “wanem nao bae yu yu mekem … ?” Sam eksampol i go olsem: “wanem nao bae yu yu mekem sapos yu go lus samples?” mo “wanem nao bae yu yu mekem sapos yu save go long eni ples long wol?”

Help blong ol Papa mo Mama: Gat Taem Wetem Wanwan long Olgeta

Hem i wan hapi taem blong stap storian olsem wan famle, mo hem i impoten tu blong ol mama mo papa, mo ol pikinini blong spendem sam taem wetem wanwan long olgeta bakegen. Tekem janis long ol taem olsem long dei taem blong storian wetem wanwan long ol pikinini blong yu, hemwan nomo. Invaetem wan pikinini long wan taem blong helpem yu blong finisim wan wok blong haos, go wetem yu blong mekem wan wok, o blong storian wetem yu long wan rum blong smol taem. Jes sam smol taem olsem i save lidim yufala long ol gudfala storian.