Ol Blesing blong Seminari
Raon long wol, seminari i stap mekem ol yut olsem yu oli kam kolosap moa long Jisas Kraes.
Yu no stap yuwan long desisen ia blong go long seminari. Raon long wol, ol handred blong ol taosen blong ol yut oli mekem seminari i kam pat blong laef blong olgeta, oli tekem bas blong go long klas, oli padel long kenu, ron long baeskel, mo yusum sam narafala wei moa. Sam yut oli wekap eli mo oli wokbaot longfala rod blong kasem klas long taem; sam moa oli wokbaot long rod long naet, mo sam narafala moa oli stadi long hom blong plante dei long wik.
Blong go long seminari, i minim blong mekem sakrifaes, be ol yut raon long wol oli faenem se seminari i gud tumas blong wok from. Mo olgeta we oli stap tekem pat, oli gat wan semfala samting blong serem: eksperiens blong olgeta long seminari i mekem oli kam kolosap moa long Sevya mo long Papa long Heven.
Stap Kasem Ol Blesing blong Promes
From wanem seminari i impoten tumas blong yu? Sam risen oli we, hem i tekem sam promes we ol profet mo aposol blong lata-dei oli bin givim:
-
Hem i “kam olsem wan fasin blong sevem man, we God i sendem long wan Isrel blong tedei, long wan taem we i gat fulap jalenj.”1
-
Bae hem i “mekem yu rere blong presentem mesej blong gospel we i kambak long olgeta we yu gat janis blong mitim olgeta.”2
-
Hem i helpem yu blong “kasem wan save long trutok we i nid blong yu kasem.”3
-
Seminari “i givim fulap janis blong lanem ol doktrin we bae i mekem yu hapi. Hem i givim ol gudfala janis blong kam blong save gud olgeta narafala we oli semmak long yu.”4
-
“Save blong yu abaot gospel bae i kam antap moa. Fet blong yu bae i kam strong moa. Bae yu developem ol gudfala rilesen mo frensip.”5
-
“Hem i mekem se yu kasem … ol rij tijing long saed blong spirit, i givim paoa long tingting blong stanap agensem ol nogud samting we oli stap raon long yumi, mo tu, hem i givim wan bigfala skolasip long saed blong gospel.”6
-
Hem i “wan long ol taem we i gud moa blong mekem olgeta oli rere blong go long wan misin.”7
Stap Faenem Wan Wei blong Go long Seminari
Blong go long seminari, plante taem i minim se bae yu sakrifaesem wan samting we yu laekem blong mekem se yu gat taem blong go long seminari. Be, hem i wan sakrifaes we i gud inaf blong mekem. Elaeja Bugayong blong Filipin, i bin jusum blong mekem desisen ia long las yia blong hem taem hem i stap go long hae skul. Truaot long hae skul, hem i nambatu long klas blong hem. Hem i bin gat strong tingting blong kam nambawan long senia yia blong hem, mo i bin disaed blong go eli long seminari, we hem i stap go long ol yia bifo, blong mekem se hem i save kasem gol blong hem.
Afta, wan dei, tingting blong hem i jenis. “Mi luk long stadi tebol blong mi” hem i talem, mo “mi luk wan hip blong ol buk i stap long saed blong fo standet tabu buk, wetem seminari notbuk blong mi, mo lesenbuk blong mi. Dip insaed long miwan, mi askem miwan, “Wijwan nao i impoten moa?”
Elaeja i bin faenem ansa blong hem long Matiu 6:33: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen, hem i save givim olgeta samting ya tu long yufala.” Hem i disaed blong stap fetful blong go long seminari mo faenem ol narafala wei blong skelem taem blong hem blong mekem se hem i save mekem homwok blong hem. Long en blong yia, oli bin singaotem hem olsem wan “valediktorian” (wan we i gat mak we i hae bitim ol narawan), mo tu, hem i bin winim wan yunivesiti skolasip.
Spensa Dagles blong Alabama, YSA, i bin disaed blong givap long sam sosol taem blong mekem se hem i save lanem fulap long seminari. Long ol fas tu yia blong seminari, hem i bin wekap long 4 klok moning blong go long seminari, mo long ol las tu yia, hem i bin wekap long 5 klok moning. Hem i talem, “mi no save tekpat long plante aktiviti let long naet wetem ol fren blong mi, from se bae mi nidim blong go silip eli. Sapos mi no bin mekem, bae mi no save tekempat fulwan mo lanem samting long nekis moning.” Long Spensa, i no blong go kamaot long klas nomo, be i blong stap wekap mo stap rere blong lanem samting.
Elda Dalin H. Oks blong Kworom blong Olgeta Twelef Aposol i bin tijim: “I no from se wan samting i gud nao i no wan gud risen inaf blong mekem. Namba blong ol gud samting we yumi save mekem, oli fulap moa long taem we yumi gat blong mekem olgeta oli hapen. Sam samting oli gud moa bitim gud, mo oli ol samting ia we yumi mas putum i kam faswan long laef blong yumi.”8 Hemia i wan impoten kaonsel blong tingbaot taem yu stap disaed blong tingbaot olsem wanem blong putum seminari i kam faswan long taemtebol blong yu.
Stap Rere blong Go long Misin
Seminari i stap tu olsem wan bigfala taem blong rere from misinari wok we bae yu mekem—olsem wan misinari memba blong tedei, mo tu, sapos yu go long wan fultaem misin long fiuja. Franko Huaman Kurinuki blong Peru, i save se skripja stadi long seminari i bin helpem hem blong rere from misin blong hem.
Hem i talem se taem ia blong hem i rere, i bin gud inaf blong hem i girap from seminari long 4 klok moning, mo stap parel long kenu taem bigfala wota i bin kasem eria blong olgeta blong plante manis, mo afta, wokbaot tru long sofmad blong go kasem klas. Hem i talem, “Mi wantem finisim seminari mo statem institiut klas blong mekem se mi rere blong go long wan misin. Bae mi gohed blong groap long Jos.” Seminari i impoten long hem from se hem i lanem abaot ol skripja mo lanem baehat ol impoten ves we bae i helpem hem gud moa blong stap olsem wan gudfala misinari.
Blong Stap Gat Blesing long Evri Saed blong Laef
Taem ol yut raon long wol oli stap traehad blong go long seminari, oli stap kasem paoa long plante moa samting be i no long skripja stadi nomo. Kameron Lisnei, blong Inglan, i bin faenem se hem i bin gat blesing long evri eria blong laef blong hem. “I no from se seminari i stap help long ol samting long saed blong spirit, be tu, hem i help wetem skul mo edukesen,” Kameron i talem.
Hem i talem se “wan eli stat long wan dei i mekem se bren blong yu i wok long spid. Sam long ol fren blong mi oli talem se oli stap bisi tumas blong kam long seminari—okei, i no se bae yu stadi long matematik long 6 klok moning, ah?” Taem yu stadi, “Lod bae i helpem yu long eksam blong yu, mo sapos yu go long seminari, bae Hem i helpem yu moa long hemia,” Kameron i talem.
I tru we seminari i bin helpem Kameron blong mekem testemoni blong hem i kam strong moa tu. Hem i talem, “Stat blong testemoni blong mi i bin kam long seminari program. Long yangfala taem blong mi, taem mi gat 14 yia, mi stap traehad wetem gospel. Mi no laekem jos, mo mi go mekem sam samting we mi no sapos blong mekem. Ating bae sam manis nomo i kam, mo afta bae mi givap fulwan.” Be wan fren i bin invaetem Kameron blong go long seminari, mo hem i bin disaed blong go wetem hem. Afta nao, ol blesing oli stat blong kam.
“Mi stat blong filim Spirit bakegen,” Kameron i talem. “Mi stat blong lisin gud moa long jos mo go long Sandei Skul mo prishud lesen. Samting i kam moa isi, mo mi stat blong filim hapi moa. Nao, mi kasem wan testemoni blong gospel blong miwan.” Afta long 2 manis blong seminari, Kameron i bin mitim bisop blong hem mo oli bin odenem hem olsem wan tija insaed long Aronik Prishud.
Kameron i save se seminari i helpem hem blong stanap strong agensem ol temtesen blong wol. “Taem seminari i bin gohed,” hem i talem, “mi bin faenem i isi moa blong fesem ol jalenj we wol i givim. Hem i had smol blong stap olsem wan yut insaed long wol we yumi stap laef long hem—wetem sin we i stap raonem yumi long evri saed. Mi testifae long yufala se sapos yu go long seminari, bae yu faenem paoa blong difendem yuwan agensem sin. Seminari i krietem wan aean long saed blong spirit we i protektem yu. Plante tes mo temtesen i bin kam blokem rod blong mi, mo seminari i bin wan bigfala help blong kipim mi stap long stret mo smol rod.”
Mekem Wanwan long Yumi I Kam Strong Moa
Seminari i mekem se yu save kam tugeta wetem ol nara yangfala we oli serem ol sem bilif olsem yu. Vaeka Seliskova, blong Rasia, i talem: “Mi kasem insperesen long ol pipol we oli gat semfala maen olsem mi, we oli folem ol semfala standet blong laef mo oli biliv long God, semmak olsem mi.” Hem i ademap, “Sapos mi gat eni kwestin, mi save tokbaot wetem seminari tija blong mi mo ol narafala studen. Mi save serem ol tingting mo testemoni blong mi wetem ol narawan blong mekem se testemoni blong mi i kam strong moa, mo mekem hemia blong ol narawan i kam strong moa. Taem mifala i ridim ol skripja tugeta mo stap tingting hevi long wanem i stap insaed long saed blong spirit, mifala i stap kam kolosap long God mo long wanwan long mifala bakegen.”
Nesia Gonsarova blong Ukren, i bin luk ol risal we i semmak. Hem i talem: “Taem mifala i stap serem ol eksperiens wetem wanwan long mifala, mifala i bin kam strong moa mo mifala i bin adastanem ol skripja gud moa. Taem yumi tokbaot ol eksampol blong laef blong mifala long taem blong ol lesen, mi stap luk wei we gospel i stap wok long laef blong mi, mo long laef blong ol narafala man.”
Kam blong Save Papa long Heven mo Jisas Kraes
Oli bin askem, i no longtaem i pas, long wan grup blong ol yut, olsem wanem nao seminari i bin blesem olgeta. Ansa blong olgeta i soemaot wan bigfala stamba toktok—se seminari i helpem olgeta blong kam kolosap moa long Papa long Heven mo Sevya. Elda Deved A. Bedna blong Kworom blong Olgeta Twelef Aposol i bin tijim: “Evriwan long ol topik we yu stap stadi long hem long seminari, oli impoten. Evri yia, taem yu lukluk nomo long wan buk blong ol skripja, yu stap lukluk nomo long Lod Jisas Kraes.”9
Hemia nao wanem sam long ol yangfala ia oli bin talem abaot olsem wanem seminari i bin mekem olgeta oli kam kolosap moa long Jisas Kraes.
-
“Mi bin lanem wanem nao Sevya i stap mekem long mi taem mi ridim evriwan long ol stori ia we oli kam long plante profet, mo mi luksave olsem wanem mi impoten long Hem. Mi luksave se Hem i lavem mi inaf blong ded from mi mo safa from ol sobodi blong mi.”
-
“Seminari i wan gudfala wei blong mi statem dei blong mi. Nomata hamas mi taed, mi filim Spirit mo mi filim se mi kam strong moa, mekem se taem ol had samting oli kam long rod blong mi long dei, mi save stret, mo mi no gat tu tingting long hem, se Sevya blong mi i lavem mi, mo mi gat moa tras long miwan blong mi stanap from samting we i raet.”
-
“Mi mi wan konvet insaed long Jos. Mi stat blong go long seminari bifo mi baptaes. Sapos i no bin gat seminari, mi no ting se bae mi baptaes nating. Sapos i no bin gat seminari, bae mi no gat Sevya insaed long laef blong mi naoia, o bae mi no save se mi save kasem fogivnes from ol sin blong mi. Mi neva gat Papa long Heven o Jisas Kraes long laef blong mi. Seminari i bin helpem mi blong faenem Tufala mo mekem Tufala i pat blong laef blong mi, mo laef blong ol fiuja pikinini blong mi blong oltaem.”
-
“Taem mi stap go long seminari evri dei, hem i helpem mi blong gro i kam kolosap long Lod mo Sevya blong mi, Jisas Kraes, taem mi lanem abaot ol tijing blong Hem, bigfala lav we Hem i gat long mi, mo olsem wanem mi save gobak laef wetem Hem.”
-
“Taem mi stap long seminari, mi faenem mining we i moa bigwan insaed long ol skripja. Hem i helpem mi blong mi tingbaot evri moning se mi mas stap olsem Kraes long evri samting mi mekem evri dei.”
-
“Seminari i bin tijim mi olsem wanem nao mi mas ridim ol skripja blong mi; mo i no blong stap glad long olgeta nomo, be tu, blong faenem wei blong yusum toktok ia. Mi bin lanem ol doktrin mo ol prinsipol we i bin helpem mi blong mekem testemoni i kam strong moa abaot wan Papa long Heven we i gat lav, mo abaot Jisas Kraes; mo hemia bae mi tekem wetem mi blong ful laef blong mi.”
Wetem plante, plante blesing we oli kam taem mi go long seminari, hem i isi blong luk from wanem ol yut raon long wol oli stap mekem seminari i kam wan fas samting long taemtebol blong olgeta.
Foto pikja, JES i glad blong serem; ol pikja oli kam long Skot Gria
Pikja foto i kam long Kristina Smit
Raet: foto blong Provo, Yuta, seminari graduet; LDS Jos Akaev i glad blong serem