Stap Karem Praemeri I Kam Hom
Jisas Kraes I Tijim Mi blong Jusum Raet
Yu save yusum lesen ia mo aktiviti blong lanem moa abaot stamba toktok blong Praemeri long manis ia.
Long Tana, Ista bae i no semmak long yia ia. Bubuman blong hem i ded, mo Tana i bin harem nogud se bae hem i nomo save serem spesel taem ia wetem hem bakegen.
Be long taem blong Praemeri, Tana i harem bakegen se risen we yumi stap selebretem Ista i from se Jisas i laef! Taem Hem i laef bakegen long ded, spirit blong Hem i joen blong oltaem wetem bodi blong Hem, mo bae i neva testem ded bakegen. Tana i bin lanem se from Jisas i bin laef bakegen long ded, evriwan bae i laef bakegen long ded sam dei, mo hemia i minim se bubuman tu!
Wan singsing blong Ista i fulumap Tana wetem hapines taem hem i bin singsing: “Jisas i bin girap; Jisas, fren blong yumi. Glad i fulumap hat blong yumi; Hem i stap laef bakegen.”1 Tana i bin wantem serem gudfala nius wetem evriwan. Hem i bin disaed long hemia bifo long Ista; bae hem i putum ol smol bandel blong spring flaoa long fored blong doa blong ol neiba blong hem, wetem wan skripja abaot taem we Jisas i Laef Bakegen long Ded. Hem i stap pikjarem smael long fes blong olgeta taem bae oli faenem presen ia long Ista moning.