Ol Wod Kaonsel long Wok
Ol Lata-Dei Sent oli yusum ol wod mo branj kaonsel blong blesem laef blong olgeta we oli stap long nid.
Long naet blong 22 Mei 2011, long medel blong saon blong ol saerin we oli krae, wan bigfala wael win i kasem medel blong Joplin, Misuri, YSA, mo i prapa spolem ol hom mo ol laef. Joplin Fas Wod, waelwin ia i spolem, be stret afta, Bisop Kris Hofman mo ol kaonsel blong wod oli stat blong kaontem ol memba blong wod.
“Mifala i bin gat wan plan blong help i stap from se mifala i bin tokbaot ol samting ia long wod kaonsel bifo we oli hapen,” hem i talem. “Mifala i bin dipen tu long Spirit blong save wanem blong mekem. Ol laen blong paoa oli nomo wok. Ol mobaelfon oli nomo wok. Mifala i bin prea mo lisin long ol ansa, mo oli bin kam—oltaem, ansa i kam. Mi bin glad tumas, olsem wan bisop, blong harem ol memba oli talem, ‘mi mi mekem hemia,’ be i no, ‘Wanem nao yu wantem mi mi mekem?’”
Help long Joplin i bin soem paoa blong wan wod kaonsel we i joen wan. “Elda M. Rasel Balad blong Kworom blong Olgeta Twelef Aposol i bin raetem: “wod kaonsel miting i wan long ol miting we i moa impoten long Jos, from se ol lida blong prishud kworom mo ol okseleri lida oli toktok raon mo mekem plan wetem bisoprik. … Aot long evriwan long ol kaonsel mo komiti insaed long Jos, mi biliv se wod kaonsel i save mekem plante samting blong helpem ol pikinini blong Papa.”1
Kam Wan Tru long Lav mo Fet
Long Puerto Fransisko de Orelana, wan vilej we i stap hemwan long ol bus blong Ekuado, ol memba oli gat wan strong rilesensip blong lav mo fet. Branj kaonsel we i tekem ples evri manis i soem hamas oli kea. Oli lukluk long wanwan man mo woman mo ol famle faswan, afta, oli luk olsem wanem ol program oli save help. Insperesen i stap kam folem.
Plante memba oli nid blong faenem wok. Branj kaonsel i faenem se plante taem, ol jalenj blong ol memba oli save stretem nomo long lokol level. Taem kaonsel i stap toktok raon long ol nid blong wan singgel mama we i gat wan yang gel we i gat problem blong hat, Rilif Sosaeti presiden i save abaot wan wok we mama ia i save wok, mo semtaem i stap kolosap long gel blong hem.
Branj kaonsel i yusum tu ol risos blong Jos, olsem LDS Wok Seves, wetem ol tul blong tijim woksop long saed blong wok.2 Oli setemap wan klas we wan memba blong branj i setemap wetem help blong wan nara memba blong branj, blong oli faenem wan wok we i gud moa.
Ramiro Riyes, fas kaonsela long branj presidensi, i tokbaot branj kaonsel long wei ia: “Yumi stap olsem ol tul long han blong Lod. Bae Hem i mekem ol gol blong Hem oli kamtru, tru long ol wok blong yumi.”
Rod blong Yu I Go long Tempol
Long Livapul, Niu Yok, YSA, olsem wan Praemeri presiden, Melisa Fisk i bin stap go long wod kaonsel miting, mo hem i kasem ol niu tingting long saed blong paoa blong hem. Taem hem i pusum han blong hem long basket blong tekem wan notbuk, hem i holem wan pikja blong 28 Praemeri pikinini we oli stap long step blong Palmaera Niu Yok Tempol. Evriwan oli gat mak blong onet we i kakae olgeta. Blong smol taem, pikja ia i pulum tingting blong hem longwe long miting, mo hem i tingbaot dei ia we Praemeri blong wod i bin go long Palmaera blong glad long tabu filing blong stap long yad blong tempol. Be sore tumas, taem ol pikinini oli openem blanket blong olgeta, oli mestem mo muvum wan bed blong onet we i stap.
Afta we oli bin lukluk long wanwan long olgeta, ol lida oli bin invaetem ol pikinini blong tajem tempol. Ol pikinini oli nomo wantem from se oli bin fraet se ating bae i gat moa onet. Mekem se ol papa mo mama mo ol lida oli bin stanap long laen mo mekem wan rod i go long tempol. Hemia i bin givim strong paoa long tingting long ol pikinini blong oli muv fored.
Taem Melisa i putumbak tingting blong hem i gobak long wod kaonsel miting, hem i stap tingting se, “sapos nomo evriwan i save gat ol fren mo ol lida we oli gat lav, we oli raonem olgeta olsem taem oli stap progres i go long tempol.”
Tingting blong hem i bin stop taem hem i harem Rilif Sosaeti presiden i givim tingting abaot nid blong wan sista: “Hem i no bin stap long jos long las Sandei. Bae mi mekemsua se ol visiting tija blong hem oli save se i gat wan tempol trip i stap kam.”
Presiden blong kworom blong ol elda i ademap: “Oli stap gotru long sam had samting naoia. Bae mi folemap wetem ol hom tija blong olgeta mo luk sapos i gat eni samting we yumi save mekem.”
Yang Woman presiden i talem: “Ol yang woman oli save help blong lukaotem ol pikinini.”
Taem Melisa i luk long fes blong ol memba blong wod kaonsel, hem i luk tru lav mo wari. Wan smael i krosem fes blong hem. Hem i tingting long hemwan: “Lod i bin mekem rere ol wei blong ol pikinini blong Hem oli kasem proteksen mo gat lav. Hem i wod kaonsel!”
Semmak olsem long Joplin, Puerto Fransisko de Orelana, mo Livapul, ol lida blong Jos raon long wol oli gohed blong faenem ol blesing blong wod mo branj kaonsel. Taem oli mekem olsem, oli lidim bigfala paoa blong ol kaonsel ia blong helpem Lod blong blesem ol pikinini blong Hem mo mekem wok blong Hem i kamtru.
Lef: foto pikja i kam long Kreg Daemon
Lef: foto pikja i kam long Josua J. Peki