Yut
Bae Mi Luk Hem Bakegen
Papa i bin mekem se wanwan long mifala, ol pikinini, mifala i filim se mifala i spesel. Hem i bin lavem mifala mo bae i fogivim mifala isi nomo. Hem i bin mekem evri samting we hem i save mekem, blong mekemsua se wanwan long mifala i bin hapi; mo hem i bin talemaot klia se hem i bin wantem samting we i gud evriwan i hapen long mifala. Mi bin lavem hem tumas.
Taem mi bin stap long klas sikis, papa blong mi i bin ded long wan aksiden blong trak. Famle blong mi mo mi, mifala i bin harem nogud tumas. I gat wan bigfala hol i stap insaed long famle blong mifala. Papa i wan man ia nao we mi stap dipen long hem; hem i wan ia nao we mi stap go luk hem sapos mi stap gat ol problem. Be, tetaem ia, mi no go lukaotem help, mo mi letem kros mo harem nogud blong mi i stap. Nao, mi talem se hemia i rong blong God. Mi stop blong ridim ol skripja, mo stop blong talem ol prea. Mi bin go long Jos nomo from se Mama i bin wantem mi blong go. Mi bin traem blong stap longwe long Papa blong mi long Heven.
Afta, mi bin go long Yang Woman Kamp blong fas taem. Mi bin laekem blong faenem ol niu fren, be yet, mi no ridim ol skripja blong mi. Long las naet, mifala i gat wan testemoni miting. Mi filim wan samting we mi no bin filim blong wan longfala taem: Spirit. Mi tingting gud long ol gel we oli bin stanap mo talem ol testemoni blong olgeta, be mi sidaon nomo i stap, from se mi ting se mi no gat wan testemoni. Wantaem nomo, mi filim se mi mas stanap. Mi openem maot blong mi, mo traem tingting long wanem blong talem. Mekem se mi talem se mi glad from kamp ia blong Ol Yang Woman. Afta, mi sek mi stap talem se mi save se Jisas Kraes i bin ded from mi, mo Papa blong mi long Heven i lavem mi, mo Jos i tru.
Mi fulap long wan gudgudfala pis. From eksperiens ia, mi save talem se mi save se bae mi luk papa blong mi bakegen from Atonmen blong Sevya mo from Hem i bin laef bakegen long ded.