Ol Kwestin & Ol Ansa
“From wanem mi nid blong go long seminari sapos mi save stadi nomo long skripja miwan nomo?”
Bae yu gat ful laef blong yu blong stadi long ol skripja yuwan, mekem se, sapos program ia i stap kolosap long yu, yu mas tekem janis blong go long seminari blong stadi long ol skripja wetem ol gudfala tija mo ol fren naoia.
Blong lanem samting mo stadi anda long daereksen blong wan gud tija, i helpem yu blong kasem wan niu tingting abaot ol skripja we ating yu no bin andastanem tru. Tija i save serem tu ol tijing we oli kam long ol profet mo ol nara lida blong Jos, blong mekem se yu andastanem ol skripja gud moa.
Mo tu, hem i gud moa blong lanem samting wetem klas blong yu. Bae yu gat janis blong tokbaot ol samting we yu bin faenem taem yu stap rid i go. Ol fren blong yu long klas bae oli gat sam eksperiens we i mekem se sam long ol skripja oli kam ol skripja we oli laekem tumas. Taem yu stap harem abaot ol eksperiens blong olgeta, i save mekem se ol skripja oli kam laef long yu. From se yu stap stadi long gospel wetem ol narafalawan, yu save stap glad long blesing ia we i gat promes we i talem se taem i gat tu o tri man oli kam wanples tugeta long nem blong Lod, bae Lod i stap long medel blong olgeta (luk long D&C 6:32).
Seminari i stap tu olsem wan strong samting we i stap blong givhan long stadi blong yu. Bae i pusum yu blong rid long wan spid, we bae i helpem yu blong finisim wanwan buk blong ol skripja. Bae yu gat janis blong toktok raon mo lanem baehat ol skripja mastri ves. Bae yu save kasem moa aot long ol skripja taem yu go long seminari bitim long eni narafala wei long taem ia blong laef blong yu.
Niu Fren, Niu Aedia
Long seminari, bae yu mitim ol niu fren, mo bae yufala i kam kolosap long wanwan long yufala, olsem wan famle. Bae yu lanem ol niu samting we bae yu no save save yuwan. Hem i wan gud taem mo i wan taem we yu filim Spirit. Hem i mekemsua se yu statem dei blong yu long wan stret wei. Sapos yu no tekempat naoia, stat naoia mo bae i jenisim laef blong yu.
Katarina B., 16 yia, Kalifonia, YSA
Hapines
Seminari i openem gud dei blong mi. I mekem mi mi hapi mo mi gat moa filing blong toktok raon long gospel wetem ol narafala pipol. Mifala i go tokbaot moa ol skripja, mekem se mi andastanem gud moa ol samting ia.
Madi S., 15 yia, Kolorado, YSA
Moa Save
Taem mi stadi long ol tabu skripja miwan, mi no gat wan gud taem olsem we taem mi stadi wetem ol narafalawan. Antap long hem, mifala i lanem ol gudfala aedia we i kam long wanwan long mifala taem mifala i stadi long ol skripja tugeta. Tru long seminari, mi bin lanem abaot plante stori we oli gud tumas, mo mi save moa abaot bakgraon blong ol skripja, we i mekem se stadi i gud gud moa! Mi mi glad se mi disaed blong joenem seminari.
Rebekah M., 16 yia, Sleswig-Holstein, Jemani
Wan Testemoni we I Strong Moa
Faswan, Lod i bin talem se taem i gat tu o tri pipol we oli kam wanples tugeta long nem blong Hem, bae Hem i stap wetem olgeta (luk long Matiu 18:20; D&C 6:32). Blong filim Spirit blong Hem, i save helpem yumi blong tingting hevi long wanem nao Hem i bin mekem long yumi. Nambatu, taem yumi stap stadi long ol skripja wetem ol narafalawan, yumi save andastanem gud moa wanem nao we oli raetem i stap. Taem yumi stap lisin long wanwan long yumi, yumi save harem wan samting we yumi no bin luk yumiwan, mo semmak i hapen wetem ol narafalawan taem yumi serem save blong yumiwan. Nambatri, taem mi go long seminari, testemoni blong mi i kam strong moa. Seminari i wan janis blong serem ol testemoni blong yumi mo blong lisin long ol testemoni blong ol narafala pipol. Hem i helpem yumi blong stap long stret rod.
Dimitri G., 16 yia, Dnipropetrovs’k, Yukren
Lanem Samting Aot long Ol Narafalawan
Blong go long seminari, i wan samting we mi mas mekem. I no se gudfala tija blong mi i tij mo eksplenem ol trutok we yumi faenem insaed long ol skripja, be tu, mi stap lanem fulap samting aot long toktok blong mifala insaed long klas. Ol narafala studen oli serem ol eksperiens blong olgeta long ol samting we oli bin lanem, mo oli bin helpem mi blong kasem moa save abaot gospel, mo Sevya mo Atonmen blong Hem. Hem i no inaf blong mi stadi miwan, from se mi faenem se sam ansa long ol problem blong mi oli kamaot long taem blong toktok raon insaed long klas. Mi save testifae se seminari i plei wan impoten pat blong fidim testemoni blong mi abaot tru Jos blong Jisas Kraes.
Densel J., 15 yia, Wes Samoa
Laet mo Trutok
Taem mi go long seminari, mi lukaotem laet mo trutok mo mi putum ful klos blong faet blong God (luk long D&C 27:15–18). Klos blong faet ia i helpem mi blong luksave voes blong Hem long evri taem mo long evri ples. Blong stadi long skripja evri dei i mekem fet blong mi i kam strong moa mo i mekem testemoni blong mi i kam strong moa mo i helpem mi blong stanap strong long taem blong ol tes blong mi. Blong go long seminari i wan long ol bes wei blong faenem laet mo trutok mo blong stadi long ol skripja mo blong tingting kwaet blong longtaem.
Nohemi M., 17 yia, Puebla, Meksiko
Tu Samting we I Joen Gud
Seminari i wan eksperiens we i leftemap tingting. Samtaem, blong stadi yuwan i no inaf. Blong stadi yuwan mo gat seminari, i tu samting we i joen gud. Ol tija oli sapraes, mo sapos yu gat eni kwestin, ol tija mo ol fren long klas oli save helpem yu blong ansarem olgeta.
Dawson D., 15 yia, Aedaho, YSA
Tri Risen
Faswan, from se mi wantem go long wan misin, mi stap go long seminari. Ol misinari oli nidim blong girap eli mo stadi long gospel long moning. Blong go long seminari i helpem mi blong developem gud fasin blong girap eli. Nambatu, long moning, yumi gat hed we i kliagud, mekem se yumi save putum ful tingting long samting we yumi lanem mo stadi. Hem i waes blong yusum ol bes aoa long dei blong lanem abaot God. Nambatri, sapos mi stadi miwan, ating bae mi no andastanem samting i dip olsem we tija blong mi i mekem. Wetem help blong hem mo tijing blong hem, mi save lanem moa bitim we taem mi lanem samting miwan.
H. Sen Yuan, 16 yia, Tehai-Tsung, Taewan