Ating Yumi Mas Prea
Skot Edga, Yuta, YSA
Long spring blong 1975, famle blong mi mo mi i bin stap long medel blong ol naes fam ples long Reinlan Fals eria blong Wes Jemani. Taem mifala i stap draev i gobak hom afta long jos long wan Sandei we i ren, mifala i bin stop blong luk long wan trak we i bin rol i go long saed blong rod we i wetwet, kolosap long bus. Insaed long bus, i bin tudak finis from bigfala sed we ol tri mo naet i mekem.
Afta we mifala i lukluk long trak ia we i aksiden, mifala i bin gobak long trak blong mifala mo faenemaot se trak i fas long sofmat. Mi no save arier, be mi save draev i go fored— insaed long bus. Bifo finis mifala i bin draev insaed long bus mo faenem se plante rod insaed long rus oli joen mo bae i lidim mifala i gobak aotsaed, mekem se mifala i bin disaed blong muv fored long tudak.
Kwiktaem, mi bin luksave se mi mekem rong desisen. Smol rod we i wetwet i bin fulap long rus mo sofmat, mo i stap lidim mifala i go insaed, insaed long dip bus. Mi bin traem blong draev spid, from mi fraet se sapos mifala i stop, bae mifala i fas i stap. Mi bin luk wan ples long fored we i hil smol we i luk olsem we i strong inaf blong holem trak. Plan blong mi i blong karemaot trak long sofmat blong givim taem blong mi tingting. Trak i go antap mo kamaot long sofmat.
Mi stopem trak mo mi klaem i go aotsaed. Wetem laet blong trak we i no wok, mi no save luk wan samting. Mi tanem laet i on bakegen, tekem tojlaet, mo afta we mi lukluk raon long trak, mi disaed se bes samting i blong gobak long bus mo afta blong spid gotru nomo long ples we mifala i kam insaed long hem.
Mi arier long trak insaed long bus olsem we mi save mekem, spidim enjin smol, gobak long rod, mo draon wantaem insaed long sofmat. Naoia, mifala i stap long trabol tru. Aotsaed long trak, hem i tudak evriwan mo i no gat wan noes nating. Insaed long trak, waef blong mi mo mi i sidaon wetem tri pikinini we oli fraet bigwan.
Mi askem waef blong mi sapos hem i gat eni tingting. Afta wan smol taem, hem i talem, “Ating yumi mas prea.” Tingting blong ol pikinini i kam kwaet wantaem. Mi bin mekem wan prea wetem tingting i stap daon be wan prea we i askem help. Taem mi bin stap prea, wan tingting i kam klia long maen blong mi: “Putum ol jen wil.”
Waef blong mi i stap long 25 sentimeta blong sofmat wetem Sandei dres blong hem, hem i holem tojlaet taem mi stap klinim ol wil biaen wetem han blong mi nomo mo putum ol jen i go. Wetem fet mo tras, mitufala i bin prea bakegen mo statem enjin. Sloslo mifala i bin draev tru long sofmat mo mifala i bin gobak long strong rod.
From mifala i bin glad tumas from mifala i kamaot long sofmat mo tudak, kolosap mi bin fogetem huia nao i bin helpem mifala blong kamaot long bus. Gel blong mitufala we i gat faef yia i mekem mi tingbaot mo talem: “Papa, Papa long Heven i stap ansarem tru ol prea blong yumi, i tru ah?”