Kasem Taem Yumi Mit Bakegen
Hop long Atonmen
I kamaot long wan toktok blong wan divosen we oli holem long Brigham Yang Yunivesiti long 4 Novemba 2008. Blong kasem ful toktok ia long Inglis lanwis, visitim speeches.byu.edu.
Hop i no save stanap nomo long save mo testemoni, be tu, hem i mas stanap long fasin blong putum Atonmen long yuwan.
Mi bin mitim ol pipol we oli bin lusum evri hop. Fasin blong sakem sin, oli filim se i bitim wanem we oli save mekem, mo bae oli no save kasem fogivnes. Olgeta ia oli no stap andastanem paoa blong Atonmen. O, sapos oli stap andastanem, oli no putum long olgetawan mining blong safaring blong Jisas Kraes long Getsemane mo long kros. Long eniwan long yumi we i givap long hop long fasin blong mekem laef blong yumi i kam klin, i blong sakemaot safaring blong Hem, we i dip, i gat paoa mo i bigwan, we Hem i bin mekem long bihaf blong yumi.
Sam yia i pas, mi gat wan wok taem mi bin stap long wan stek konfrens blong mekem wan intaviu long wan man we i gat 21 yial, blong faenemaot sapos hem i klin inaf blong go long wan misin. Naoia, ol Jeneral Atoriti oli no stap mekem intaviu long olgeta we oli stap rere blong go long misin. Mekem se taem ia, i no olsem oltaem. Taem mi stap ridimbak sam long ol risen blong mi mekem intaviu, hat blong mi i brokdaon. Boe ia i bin brekem ol loa we i hae tumas. Mi stap askem miwan from wanem oli bin askem mi blong visitim wan olsem, wetem bakgraon olsem, mo mi mekem tingting se bae i no nomol blong mi rikomendem nem blong hem blong oli apruvum olsem wan misinari.
Afta long Satedei naet sesen blong konfrens, mi go long ofis blong stek presiden blong mekem intaviu. Taem mi stap wet, wan naes yang man wetem wan fes we i saen i kam insaed. Mi stap tingting se bae mi talem olsem wanem long hem se bae mi no save toktok long hem, from mi luk se hem i wantem toktok, be mi gat wan apoenmen wetem wan man we i gat trabol. Afta nao, hem i talemaot nem blong hem. Hem nao i yang man ia we mi stap wet long hem.
Insaed long ofis, mi askem wan kwestin nomo: “From wanem nao bae mi intaviu long yu?”
Hem i tokbaot laef blong hem bifo. Taem hem i finis, hem i stat blong eksplenem ol step mo safaring blong hemwan we hem i bin gotru long hem. Hem i bin tokbaot Atonmen—paoa blong Atonmen we i no gat en. Hem i talem testemoni blong hem mo i talemaot lav we hem i gat long Sevya. Mo afta, hem i talem: “Mi biliv se safaring we Sevya Hemwan i bin gat long Getsemane mo sakrifaes blong Hem long kros oli gat paoa inaf blong sevem wan man olsem mi.”
Mi filim se hem i putum tingting blong hem i stap daon, mo Spirit i pusum mi, nao mi talem: “Bae mi putum nem blong yu blong yu givim seves olsem wan ripresentetiv blong Jisas Kraes.” Mo afta, mi talem: “Be bae mi askem wan samting nomo long yu. Mi wantem yu kam bes misinari long ful Jos. Hemia nomo.”
Tri o fo manis afta, Sista Edgli mo mi i bin stap toktok long wan misinari trening senta. Long en blong divosen, mi stap storian wetem ol misinari taem mi luk wan yang man wetem wan fes we mi save.
Hem i askem: “Yu tingbaot mi?”
Mi sem smol mo talem: “Sori tumas. Mi save se mi mas tingbaot, be mi nomo save tingbaot.”
Afta nao hem i talem: “Bae mi talem long yu huia nao mi. Mi mi bes misinari insaed long misinari trening senta.” Mo mi bin bilivim hem.
Hop blong yang man ia i stanap long save mo testemoni blong Atonmen, be tu, hem i bin putum presen ia long hemwan. Hem i bin andastanem se presen ia i blong hem stret! Hem i bin save long paoa blong Atonmen, mo hop we Atonmen ia i givim taem evri samting i olsem se hem i lus mo i nomo gat hop.