Ti Taekina Kristo
Ae Kamimi Akoi
I onimakina ana akoi Iesu Kristo ni katoabong.
“N bootakin ara Ekaretia, tiaki tataekina taekan te tangira n tainako,” e taku au tia reirei n te Brigham Young University n taekan te aro, “ma ngkai ngaira membwa n Ana Ekaretia Iesu Kristo ni Boong Aika Kaitira, ti kakoauaa te akoi.”
Ni bon arona, I aki kona n uringa aia reirei Ataeinnaine ke Reirei n Tabati iaon te akoi, ma e oki rikaaki au ururing nakon au kuaea n te reirei ae rietata ao te anene “Te Akoi Ae Kamimi.”
Te Akoi Ae Kamimi! (ai tamaroara tangina!)
Ae kamaiua te aomata ae rangin ni buakaka n aekakiu!
I a tia ni bua n te taina, ma ngkai I a manga oki;
I mataki ngkoa, ma ngkai I a noraba.1
“Te akoi bon mwakan te Atua man ana Mwakuri ni Kamaiu Iesu Kristo,” e kabwarabwara au tia reirei. “I tibwaua te akoi inanon aua te mwaaka: te mangauti, kaboan maiura, kamaiu, ao te kakorakora.” E waaki man kabwarabwarakin te mwaaka, ma e a manga oki rikaaki au ururing.
N te taina ao e mwananga te kuaea man te kuura ae rietata naba anne nako California, USA, ni kaea te kabo n te anene. I aoraki bon imwain te mwananga, ao aorakin buau e kaotia bwa n na bon aki anene n au kuaea n tain te kabo—ke ngkana n na iria, e na bon aki nakoraoi au anene, ma te maraki. I tuanga tamau ibukin te kakabwaia n te nakoanibonga ao I kabanea te bong are imwina n tataro ibukin buokan katokan aorakiu.
Ma tao I aki ataia raoi, ngke I anenea “Te Akoi Ae Kamimi” ma aorakin buau are e a tia ni katokaki n tain te kabo, bwa I a anenea taekan te kabanea ni korakora ni mwaaka are e a tia ni kamaiuai tebongina imwaina. E a tia ni kakabwaiai te Tia Kamaiu n te bong anne, Ana akoi ngaia bon reken kamaiuakiu.
“Ao e na waaki, n rinanon te maraki ma te karawawataaki ao te kaririaki n aekaia nako; ao aio bwa e na kakoroaki bukin te taeka are e taku bwa e na uota iaona marakiia ao aorakiia ana aomata” (Aramwa 7:11).
Imwiin te kuura ae rietata, n aroia angiia ataein te reirei n aia moan ririki, I karawawataaki n au kooti n au reirei ao te kakaewenako ni kitana mwengau ni waekoa ao ni maeka ma raou n au ru aika niman.
Aio te tai are I reiakina korakoran ao mwaakan ana akoi Kristo n ibuobuoki. I kabanei au bong ni mwakuri ao ni kamatebwai, ma I kabanea au iango iaon te tataro ni katoabong are I tang nakon Tamau are i Karawa ibukin te konabwai ni kona ni katiai mwakuri ake a kantaningaaki. Ngke e a waaki te reirei, I kunea ma te kimwareirei bwa man ana kakorakora ao ana konaa mwakan ana Mwakuri ni Kamaiu Kristo I kunea bwa I kona ni waaki n akea te kanganga.
“I boni konai bwaai ni kabane ni karaoi iroun Teuare kakorakoraai” (I-Biribi 4:13).
E ngae ngke I tuai n rinanon iteran Ana akoi ake uoua—te mangauti ao bwaninin kaboan maiura—I teimatoa n onimakina ana Mwakuri ni Kamaiu Iesu Kristo ni katoabong. Te akoi, mwaakan te Atua man ana Mwakuri ni Kamaiu Iesu Kristo, e a tia ni kamaiuai ao ni kakorakoraai. Ngke I kekeiaki n iri ana tua te Atua ao n ira Ana kantaninga, I karekea ana ibuobuoki karawa ae raka nakon are I kona ni karekea.
“Ti ataia bwa bwa bon rinanon te akoi are ti kamaiuaki iai, imwiin bwaai ni kabane ake ti kona ni karaoi” (2 Nibwaai 25:23).
Kamataataki n te tamnei iroun Ash Ram