Karokoan te Buraimwari n te Mweenga
Iesu Kristo E Reireinai n Rinea ae e Eti
Ko kona ni kamanena te reirei aei ao te waaki ni kakukurei n reireiniko riki ibukin ana boto n iango te Buraimwari ibukin te namwakaina aio.
Ibukin Tanner, te Itita e na aki ti te arona n te ririki aei. Tibuna te unimwaane e a tia ni mate, ao Tanner e bon nanokaawaki bwa e na bon aki manga tibwauaa te tai ae onoti aio ma ngaia riki.
Ma inanon tain te Buraimwari, Tanner e kauringaki bwa bukina ae ti neboa te Itita bwa Iesu e maiu! Ngke E kautaki man te mate, Tamneina e bon manga katiteuanaaki ma Rabwatana, n aki manga rinanon te mate riki. Tanner reirei bwa ibukina Iesu e bon manga kautaki man te mate, nikabane a na manga kautaki man te mate n te bongina, n ikotaki ma tibuna te unimwaane!
Anenen te Itita e kaonrakea Tanner ma te kukurei ngke e tabe n anene: “Iesu e a tia n uti, Iesu, raoraora. Te kukurei e kaonrakea nanora; E a manga maiu riki.”1 Tanner e tangiria n tibwaua te rongorongo ae tamaroa aio ma aomata ni kabane. E bairea anne imwaain te Itita, e na katikui iaon aia kaintamarake n aia mataroa kaain rarikina taian uee ake ueen te tiburing taekan Iesu aika tabu ibukin Mangautina. E inagoa te matangare iaon moaia ngkana a kunei ana bwaintangira ni ingabongin te Itita.