Te Tai n Taetae
“N na karineia au karo ao ni karaoa tabeu ni kakorakoraia au utu” (Au Kainibaire n te Euangkerio).
“E tamaroa, aomata ni kabane. Tia waakina ara tai n taetae,” e wewete Mom.
Josie e a tia ni kantaningaa te tai n taetae n te bong anne. Ni katoa tairiki, Josie ao uoman mwaanena aika a uarereke, Ben ao Wes, a bootaki i nanon te ruu ni katangaina ma Mom ao Dad n taetae iaon te bwai are e riki inanon maiuia.
N te tairiki aio Dad e a tia n taku bwa e na buooka Josie ni kataneiai ibukin ana taetae ibukin katanoata n te ingabong. Warekan taian katanoata n te tibwanga ae karineaki n ana reirei Josie. Ningaabong Josie e na anenea teutana mwakoron kunana ae tatangiria ni bwain taetaen ana reirei ao ni kamanenaa te bwai n taetae ni katanoataa te bwai are e na karaoaki n te bong anne ao kanoan te katawanou.
Josie e biri nakon te ruu ni katangaina, n ingainga ni kamatebwaia ana taeka.
“Anne ara tia kanakobwanaa ae kinaaki!” e taku Dad ngke Josie e kibara aon te kaauti (couch) are irarikina. “E uara am namakin ibukin te ingaabong?”
“I ingainga ma teutana te nakonnano. I maaku bwa ae N na kamangaooi bwaai tabeua imatan te reirei ni kabane,” e taku Josie.
“Anne bukina ngkai ti kataneiai,” e taku Dad. “Waki nako ao wareka am taeka ni kabane, ao N na kakauongo ibukin taabo ake ko na katamaroai.”
“Ko rabwa, Dad,” e taku Josie.
Ngaia ma Tamana a rinanon ana taeka n te tai ae rangi ni bati n te aro are Josie e a bua ana wareware. Ngkanne Josie e teirake ao ni karaoa ana taetae n te kabanea n tai ibukiia ana utu. Tinana ao Tamana a takaarua ao man kukurei. Ben e anganna te nimaua ae rietaata, ao Wes e matangare ao man uboi baina.
Josie e nako ni matu ni kukurei ao man aki nanououa.
Te bong are imwiina bwaai ni kabane a nakoraoi. E ngae ngke e nako nanona, Josie e moangare ngke e ongo ana katanging bwa e a katangaki n ana tibiika te reirei. E bon kukurei bwa e a tia ni kataneiai ma Dad, ao e warekia ni karaurau ao ni maataata n akea taian kaairua.
“E rangi n tamaroa am mwakuri,” e taku Mrs. Blake, te kauoman n buritintiboro.
N tokin ana bong te reirei anne, Josie e tei n te rain ibukin te bwati. Te ataeinimwaane ae e ikawai riki e rairaki ao n titirakinna, “Ngkoe te ataeinnaine are e wareka katanoata n te bong aio?”
Josie e moangare. “Eng,” e taku.
“Bukin tera ko rinea te anene arei?” e titiraki te ataeinimwaane. “Bon te anene ae buakaka. Ko kabuakakai katanoata n te ingabong.” Ngkanne e wetea arana ni kabuakakaa ao ni ngare ma raona.
Josie e tekateka n tiingaia n te moan kaintekateka n te bwati. E aoraki ni birotona.
Ngke e a roko Josie ni mweengana, e kunea tinana n takakaro ma Wes.
“Mom, I ataia bwa e tuai boo tain te taetae, ma I iangoia ngkana ti kona n taetae ngkai naba,” e taku Josie.
“Ngaia raoi, Josie,” e taku Mom. “Tera ae riki? Iai te bwai ae bure ma taian katanoata n te ingabong?”
“Akea,” e taku Josie. “Bwaai ni kabane a rangi n tamaroa. Anne are I bon iangoa, ni karokoa te ataeinimwaane e tuangai ae I rinea te anene ae buakaka. E weteai naba n arau ae buakaka.”
Mom e ororea te burooa are irarikina. Josie e nakoina man tekateka iaontano. Mom e anganna te irabwati ae bubura. Josie ao Mom a taetae ibukin bwaai ni kabane ake a riki n te bong anne, n ikotaki ma ana taeka ni kamoamoa Mrs. Blake.
“I nanokaawaki bwa te ataeinimwaane anne ma raoraona a rangi ni buakaka nakoim,” e taku Mom. “Ma bwanaaia aomata ake tabeman ake ko karineia, n aron Mrs. Blake, a rangi ni kukurei n arom ni wareki katanoata. Dad ao ngai ti rangi ni kakatonga iroum. Ko rangi ni mwakuri korakora, ao e bon korobukina!”
Josie e rabwata riki Mom. “Ko rabwa, Mom,” e taku Josie. “I namakina riki te raoiroi riki.” Josie e bon kukurei bwa taai n aki akaaka a kona n riki bwa taai n taetae.
Kamataata iroun Jared Beckstrand