Tieminari ni Buakonikain Ecuador
I nanon te buakonikai ae raroanako, te tieminari e a karika te kaokoro ae e bubura nakoia roronrikirake aikai.
I mainikun Quito, Ecuador, riaon taian warekeno ao Maungan Andes, te aba e a bon karina naba ni bwaka nakon te buakonikai ae te Amazon. Ikekei ao ko na kunea te buakonikai ae matenten, karanga aika bati, mwangki, mannikiba aika toukan, ao kuua aika bingke.
Kam na kunea naba te kaawa ae buubura ae aranaki bwa Puerto Francisco de Orellana. Bon te kawai ae abwaabwaki man, eng, ni kabane bwaai riki i Ecuador. Te bwi ma nimaua te ririki n nako, a rangi ni karako aomata n te tabo anne. Ma kuneakin te petroleum e a karokoa te tabo ni karaobwai, aomata a kakaai aia mwakuri, ao kaain te Ekaretia.
Te Tieminari n te Mwaanga ae Uarereke
Tabeman man te roronrikirake, n aiaron Oscar R., a kaman riki bwa membwa ngke e a kateaki te mwaanga, ma angiia a tibwa rairaki. Ao a rangi ni kukurei ibukin te Ekaretia. “Ti bon korakora,” e taku Oscar.
N Tebetembwa 2010, tii teuana te ririki imwiin are e kateaki, te mwaanga e moana ana buroukuraem n te tieminari. “Ngke ti moanna ni bobotiira tabeua te ririki n nako,” e taku Oscar, “bon ti tabeman ngaira. Bon tii ngai kaain te roronrikirake. Ma ti teimatoa n rikirake. N te tai ae e aki maan ao ngaira 6, ngkanne 10, ao ngkai a rawata riki kaain te roronrikirake.”
Ibukina bwa tabeman man te roronrikirake a iira te reirei n te ingabong ao tabeman n te bwakantaai, a baairei uoua te tai n reirei n te tieminari kiraati—teuana n te ingabong man 8:00 to 9:00 ao teuana n te bwakantaai man 4:30 to 5:30.
E kona n ae e aki rangi ni bati kaain te roronrikirake n te buroukuraem, ma ibukiia kaain te roronrikirake ake a iiria, e a tia ni bita maiuia te tieminari.
Bukin tera te Nako?
“Te tieminari bon te kakabwaia ae korakora ibukiu,” e taku Luis V., te tia rairaki ae boou. “E buokai ni katauraoai n riki bwa te mitinare ae tamaroa. I a tia ni kaaitara ma kakaewenako ao kariiri aika bati man te tai are I moan kaaina te Ekaretia, ma I a tia ni kona ni kakorakoraai ibukina bwa I ataia bwa te bwai are I karaoia e bon eti.”
Ao tiaki tii Luis are e namakina anne. “I a tia n riki bwa te membwa ngai n te Ekaretia n te tai ae uarereke,” e taku Ariana J., “ma I a tia n iriira te tieminari man te tai are I bwabetitoaki iai. I kukurei n iiria ibukina bwa I reireinaki bwaai aika a bati aika koaua ni kaineti ma ana euangkerio Iesu Kristo are e a kaona nanou ma te kaantaninga ao au iango ma te atatai.”
Iirakin te tieminari e a tia ni buoka ni katea aan Ariana ae matoatoa n te euangkerio. “Ibukiu, bon te kakabwaia bwa N na riki bwa mwakoron taiani kiraati aikai,” e taku Ariana. “A kakorakoraa tamneiu ao ni buokai ni katauraoai bwa n te bongina ao I kona n riki bwa te ainenuma ae tamaroa, te tina, te tia kairiiri n te Ekaretia, ao tao te mitinare ae bwanin ana tai.”
Mwaanen Ariana, Gerardo, e namakina ae ti te arona. “I kakaaitau ibukina bwa te tieminari e a tia n riki bwa mwakoron maiu ae kakaawaki,” e taku. “E katauraoai ni karaoa au mwakuri ni mitinare n te bongina. Ikekei I a tia reireinai ibukin te babaire ni kamaiu are te Atua e katauraoia ibukiu. Ni katoa te kiraati are I iria e anganai te kantaninga bwa I kona ni karekea te abanuea are te tiretio ao n anganai te aki raraoma bwa I a tia ni karekea ana euangkerio Iesu Kristo.”
Gerardo e bon rangi ni kua n tain te tieminari n tabetai. E na kaira tarina ae uarereke nakon te reirei moa ao imwiina e na okira mweengana ni kaira mwaanena bwa aonga n airi nakon te tieminari. Ma e aki tabe iai.
“Nikabane bwaai aikai a rangi ni boou nakoiu, ma I onrake n te kukurei,” e taku Gerardo. “I ataia bwa I mena i aon te kawai ae eti are e na anganai te tai n noora Tamau are i Karawa riki. Te Tamnei are Raoiroi e anganai te koaua aio. N na tii karaoa te kekeiaki ao te reitianako nakon te toki.”
Akea Kainnanoan te Raraoma
Ibukin Walter A., te tieminari n te moan tai bon te bwai ae kakamwaaku. “I bon raraoma n te moan tai ngke I roko,” e taku. “Ma ngke I a rinnako n te kiraati, I namakina te namakin ae onoti ibukina bwa I namakina te tangira are ko namakinna ngkana ko kamatebwai booki aika tabu. Ao ngke I a kitanna, I namakina te kakorakoraaki ma te kukurei ibukin te bwai are I a tia n reiakinna. Teuana te kakabwaia ae rangi ni korakora are e a tia ni karekea Tamara are i Karawa ibukiia te roronrikirake bon te tieminari.”
“Ana Ekaretia Iesu Kristo ibukiia Aomata aika Itiaki ni Boong aika Kaitira e a tia ni bita maiu,” e taku Abel A., are e a bon katauraoia naba nakon ana mwakuri ni mitinare. “I a reiakinaki n taekan aia reirei burabeti. I tangira Iotebwa Timiti. E bon ninikoria n ni kakoroa bukin Kaokakin te Ekaretia ae koaua ribuakon kaangaanga ni kabane are a riki nakoina. I tangiria n riki n ninikoria n aiarona.”
A rawata kaain te roronrikirake ake a tia ni karaoi angakarea ibukin irakin te tieminari. E bon aki beebete n taainako, ma ibukin te roronrikirake i Puerto Francisco de Orellana, Ecuador, e bon materaoi te kekeiaki.
“Ngkana I iangoa te teimatoa ni waaki nako, n aiaron are a taku booki aika tabu,” e kamatataa Abel, “I taku bwa te boki ae tabu e nanonna are ti na karinanii bwaai aika kakaawaki ibukin te maiu. Tieminari bon teuana mai buakoia. N aron are e a tia ni bita maiu, e kona ni karaoa ae titebo ibukiia kaain te roronrikirake ake tabeman.”
N taabo naba ake a rangi n raroa nako n te buakonikai i Ecuador, ana Ekaretia Iesu Kristo ao ana buroukuraem n tieminari ibukiia roronrikirake a karikirakeia ao ni bita maiuia ibukiia ake a rineia bwa e na riki.
Te tieminari e kakorakoraia te roronrikirake n aroia ake i Ecuador, angiia a tibwa rairaki.
Tamnei iroun Joshua J. Perkey