Te Kataneiai irouia Taan Kairiiri n te Aonaaba ni Kabuta e Katerea te Kawai nakon te Rikirake ni Koaua
Taan kairiiri n te Ekaretia a kabwarabwarai raoiroin te “rikirake ni koaua” ao aron kakoroan bukina n Beberuare 11, 2012, Boowi ni Kataneiai ni Kairiiri n te Aonaaba ni Kabuta.
Beretitenti Dieter F. Uchtdorf, Kauoman ni Kauntira n te Moan Beretitentii, ao membwa n te Kooram n Abotoro ake Tengaun ma Uoman, te Beretitentii n te Itingaun, ao taan kairiiri n te Ekaretia beretitentii a iri aia kaetieti taan kairiiri n te Ekaretia ni kabuta te aonaaba.
“N te Ekaretia te taeka ae, rikirake e kona ni kabwaranakoaki bwa te ‘membwa’ ae e boou. ‘…Te Rikirake ni koaua, e ngae n anne, e kabwaranakoaki bwa ‘rikiraken mwaitiia membwa aika a kakaonimaki’,” e kabwarabwara Beretitenti Uchtdorf.
Unimwane M. Russell Ballard man te Kooram n Abotoro are Tengaun ma Uoman e reitia, “Te rikirake e riki man tataekinan te euangkerio inanon maium are e reke man rikiraken te kakaonimaki iroun temanna ma temanna ao n te utu.”
Anne e karikirakea te kakaonimaki n ikotaki ma bwaai ake a aki kona ni warekaki mwaitiia, n aron te tataro ni katoabong, kamatebwaian koroboki aika a tabu, bootakin te utu n te tairiki, te tangira n te mwenga, ao namakinan te Mwakuri ni Kamaiu ibon iroum, e taku Beretitenti Uchtdorf.
“Ae e ririki, ti kairurua te tikiraoi ao bebeten ana euangkerio Iesu Kristo ma mwaitin te maraki are e kantaningaaki,” e taku. “E ngae n anne, ngkana ti kabotoi ara iango iaon ana ‘kantaninga’ te euangkerio, mwaitin te nanououa a na bua.”
Mwaitin te kanakobwana a boboto iaon boton koaua ao reirei, are e karekei kaeka nakon “bukin tera” titiraki.
Te titiraki raoi n oin te euangkerio e na kairiira nakon maroroakinan bwa antai ae e kaineti nakoina, tera ae e na karaoaki ibukina, nningai ae ti na karaoi iai bwaai akanne, bukin tera ngkai ti karaoi bwaai akanne, ao ti na kanga ni karaoi,” e taku Beretitenti Uchtdorf.
Mare ao te Utu n te Babaire
“E reke te Ekaretia man taian utu,” Beretitenti Boyd K. Packer, Beretitenti n te Kooram n Abotoro are Tengaun ma Uoman, e taku. “Uoote ao titeiki a tei ni boutokaia utu. Ngkana ti taekin utu, ngkanne ti na noora raoi rikiraken te Ekaretia.”
E taekinna bwa ni kabane kainnaba ao kaaro a riai n riki bwa aomata aika a taua ao a kabonganaa te nakoanibonga ni mwengaia, n tararuaia ana utu inanon te kokoaua. N aron naba, e taku taan kairiiri n te nakoanibonga a riai n tau ni kairiiri—e ngae ngke aobiti a mwaiti rinaniia, ni kabane mwaane aika a tau iai irouia mwaakan te nakoanibonga n aron are imwiina (taraa D&C 1:20).
Unimwaane Russell M. Nelson man te Kooram n Abotoro are Tengaun ma Uoman e katuruturua bwa kainnaba mwaane ao aine, kaaro ao tiina, a riai ni karikirakea aia reitaki n te tangira, rairannano, ao te tataro n tainako ni kakorakoraia ao ni katana aia utu, are “kakaawaki nakon ana babaire te Tia karikibwai ibukin aroia Natina” (“Te Utu: Te Katanoata nakon te Aonaaba,” Riaona ao Ensign, Nobembwa 2010, 129).
“Teniua te tai te kauring ni koroboki aika a tabu are e karaoaki bwa te aonaaba ni kabane e na bon kamaunanakoaki n okin te Uea ngkana e aki karaoaki aro aikai,” e taku. “Inanon aikai ao ni katoai kauringa a irekereke nakon aron te utu ake aki kabaeaki n otenanti n te tembora. N akean otenanti aikai n te karietataaki, mimitongin te Atua e na bon aki riki.”
Karekean tokin te kouru anne—te maiu ae akea tokina ao te karietataaki nakoia natin te Atua ni kabane—e kantaningaaki bwa te rikirake ni koaua e riki inanon mweengara, n ara uoote ao mwaanga, ao n taabo nako n te Ekaretia.
Karaoan nanon te Euangekrio
Te rikirake ao te rairaki raoi e reke man karaoan nanon te euangkerio inanon maiura ni katoabonga. Inanon te marororo are e titirakinaki iai Unimwaane L. Tom Perry ao Unimwaane D. Todd Christofferson man te Kooram n Abotoro n te Tengaun ma Uoman e kabwarabwaraaki bwa te kabanea n rietata n ana kantaninga te euangkerio bon buokaia aomata ni karaoi ao ni kawakinan berita aika a tabu n te tembora. Te ongotaeka nakon berita aika a tabu, e taku Unimwaane Christofferson, e kona ni bita te aro n aomata nakon te Aomata ae Itiaki n te tai ae waekoa.
Buokakiia tabeman bon te koaua naba teuana ae moan te kakaawaki ni karaoan nanon te euangkerio. Membwa n tatabemaniia nako a katabeaki ao ngkai kain te Ekaretia n roko irouia ao ni kamauiia naake a kainnanoa te ibuobuoki n te maiu n rabwata ao n tamnei, a taekinna taan kairiiri.
Ti riai n aki rawa n ibuobuoki ma aro ake tabeua ao ni karaoi mwakuri n ibuobuoki ma bootaki n tararua ibukiia aika aki kaubwai ao a kainnano, e taku Unimwaane Christofferson. Taan kairiiri n te nakoanibonga a riai ni karaoi mwakuri n ibuobuoki, ma membwa ao mitinare a riai ni boutoka naba te mwakuri anne.
N aia marooro aomata n te kurubu e taekinaki kabotoan te ibuobuoki nakoia utu, kakorakoraaia naake a taua te Nakoanibonga ae te Merekitereka, ao buokakin karikirakena aia onimaki ao aia koaua te roronrikirake. N aia marooro Unimwane Ballard ao Unimwaane Neil L. Andersen man te Kooram n Abotoro are Tengaun ma Uoman, n airi ma Unimwaane Ronald A. Rasband man te Itingaun, Elaine S. Dalton, te beretitenti ni kabuta n te Bootaki n Aine, ao Rosemary M. Wixom, te beretitenti ni kabuta n te Buraimwarii.
Unimwane Rasband e taku bwa ni kabane taan kairiiri a kainnanoia n ibuobuoki ni kairaia membwa n oki nakon te kakaonimaki, ao Unimwane Andersen e katuruturua bwa te roronrikirake a kainnanoia riki n iriiri ao ni kairiia ao ni kakorakoraia roronrikirake ake tabeman.
Karekean te Rikirake ni Koaua
Te rikirake ni koaua e roko ngkana ti karaoi reirei man te euangkerio inanon maiura, e katuruturua Beretitenti Uchtdorf.
“Ngkai ko iangoi iango aikai, titirakiniko ibon iroum “bukin tera ko karaoi mwakuri ao tera ae ko riai ni karaoia n tokina, n nakoami n tatabemani ngkami ao n te botaki ni kauntira,” e taku.
Reiakina ae Mwaiti Riki
Aomata nako a kona n taratara, ongora, rawei rongorongo, ao ni karekei rongorongo man te kanakobwanaa n taetae aika a mwaiti man riniia n lds.org/study/other-addresses ao ni kiriki iaon Worldwide Leadership Training.
Unimwaane M. Russell Ballard man te Kooram n Abotoro n te Tengaun ma Uoman e taekinna n tain te marooro are e karaoaki ni mwakoron te Marooro ni Kataneiai ibukiia Taan Kairiiri n te Aonaaba ni Kabuta ni Beberuare 2012.
© IRI