I a kani Mate!
Ramona Ross, Tennessee, USA
Ngkai te neeti ni mwakoron te onaoraki ae kararoaki ibukin kamarurungaia aoraki imwiin te korokoro, I karekea au tareboon n te bong teuana ni kaineti ma te aoraki ae arana Bill are e a tia n rinanon te korokoro. E riai ni kaman nakon te tabo n tararua ibukia aika a kakaiaki ma e kamwaingaki nakoiu ibukina ngkai e a onrake te iunite arei.
E aki maan ao e a roko te aoraki ma ana utu, I rauaki ngke I nooria bwa e bwanin te tararua nakoina, e ataia bwa tera ae riki, ao n ataaki bwa e aki mweengabuaka.
Imwiin tauan kabuebuena ma rietatan rarana ao n tuangnga ma ana utu taekan ana ruu. I rinnako nakon kawain te ruu ni koroboki iaon ana tiata. Ngke e a toka au been iaon te beeba, I a ongo te bwana, “Nako okira ana ruu.” I katoka au koroboki ao n taraa bukiu. Akea temanna ikekei. I taku bwa I iangoa te bwana, ngke n te tai ae karina I a manga ongo naba te kaua tai—n tii takarua.
I biri n oki nakon ana ruu Bill ni kunea bwa roroana e a taboro buburana, ao iai ana kanganga n ikeikena. N iangoia bwa te ia are e karerekea te rara nakon atuuna e raran, I taotaona roroana ma baiu ae te angatai inanon te tai are I kabongana iai angamaingiu n tareboonia te tia korokoro are e karaoa ana mwakuri. Te tia korokoro e taku bwa e na kawaerakeia kaain te tiim n anaa Bill n te tai ae waekoa. “Ao tai kamwainga baim!” e taku.
Ngke I teimatoa n taotaona te tabo are e rootaki, I a kinaa bokin te Ekaretia ae mena irarikin ana kainiwene Bill. “Ngkoe kaain te Ekaretia?” I titiraki.
E kataia ni katoutoua atuuna ao imwiina e tuangai bwa ngaia te tia mwakuri ibukin otenanti n te Atlanta Georgia Tembora. Imwiina e karubei matana aika a ranran ao e taku, “I a kaani mate!”
I tuangnga bwa e aki kona ni mate, ni kataia n taetae, “N na mareaki n te Atlanta Tembora n te namwakaina ae e na roko ao ko na mena ikekei.” A roko imwiina kaain te tiim ni korokoro ni kaira nako Bill.
Ni korakoran kukureiu n au babaire ibukin au mare iaon te namwakaina are imwiina. I a kuri ni mwaninga taekan Bill, are iai te bwai ae riki nakoina imwiin taian bwainaoraki. Ma ngke e a kairai kainnaban te beretitenti n te tembora nakon te ruu ni kabaebae ni bongin au mare, I noora te ubu ae I kinaa: kainnaban Bill, Georgia. Ngke I tuangnga ae N nang mare, e nako ni kakaea Bill. Tabeua taai imwaain boon te bukamaru, e uki te mataroa ao e rinnako. Imwiin wiiki ni maraki n atuu, te mumuta, ao kakain te rabwata ao te iango, Bill e a marurung n te bong anne ni mwananga nakon te tembora, n aki ataia ae bon au bong ni mare te tai anne.
Uoua te ririki imwiina ngai ma kainnabau ti weteaki n riki bwa taani mwakuri ibukin otenanti n te Nashville Tennessee Tembora. Ngke tia roko n te tembora bwa ti nang anganaki nakoara, te mwaane e taua te mataroa ni kaukia ibukiu ao e taku, “Ko butimwaeaki nakon te Nashville Tembora!” Bon te Tari Bill.
Ti uaia ni beku inanon teniua te ririki. Bill e tuangia aomata ni kabane bwa I kamanoa maiuna. N aron te waaki, E a tia n reireinai kakawakin te kakauongo n ana kairiri te Tamnei.