“Bukin tera ngkai I riai n nakon te tieminari ngkai I kona n ti kamatebwai booki aika a tabu i bon irou?”

Ko na bae ni kabanea maium ni kamatebwai booki aika a tabu i bon iroum, ngaia are ngkana e tauraoi nakoim, kareketai ni kabongana raoi reken te tai anne n te tieminari ni kamatebwai booki aika a tabu ma taan reirei ao raao aika a tamaroa ngkai.

Te reireinaki ao te kamatebwai iaan ana kairiri te tia reirei ae tamaroa e na buokiko ni karekea te atatai ae boou ibukin booki aika a tabu ake ko tuai n ota raoi iai. Te tia reirei e na bae naba n tibwauai reirei mairouia burabeti ao tabeman taani kairiri n te Ekaretia are e na anganiko te atatai ae tamaroa ibukin booki aika a tabu.

N arona naba, e boni kakukurei riki reireiakim ma kaain am kiraati. E na reke am tai ni maroroakin taekan bwaai ake ko kunei ngkai ko wareware. Kaain am kiraati e na bae n iai aia namakin are e na kariki booki aika a tabu bwa mamaten nanoia. Ongoraeakinan aia namakin e kona n uoti booki aika a tabu nakon maium. Ao ibukina ngkai ko kamatebwaia te euangkerio ma tabeman, ko kona ni kakukureiko n te kakabwaia ae e a tia ni beritanaki: “ngkana uoman ke teniman a bootaki n aran te Uea, … E mena naba ibuakoia” (Taraa D&C 6:32).

Te tiemainari e katea te bwai ae kona karaoia ibukin am kamatebwai. Ko na kaungaaki ni wareware ni mwaitin te tai ae matoa, are e na buokiko ni kabanei booki aika a tabu n tatabeua. Ko kona ni kakoaua ae kona karekea riki ae rawata mani booki aika a tabu man kabonganaan te tieminari nakon riki tabeua kawai n te tai aei inanon maium.

Rao aika a Boou, Iango aika a Boou

N te tieminari ko kaitibo ma raoraom aika a boou, ao kam rangi ni kinaai ngkami imarenami n tatabemani ngkami nako, n aron te utu. Ko reiakin bwaai aika a mwaiti aika a boou are ko aki kona n ataia i bon iroum. E boni kaunga ao ni kororaoi n te maiu n tamnei. E kakoaua bwa bwa ko moana am bong ni motirawa n ae riai. Ngkana ko aki iria ngkai, moanna ao e na bita maium.

Katarina B., ana ririki ni maiu 16, California, USA

Te Kukurei

Te tieminari e kaunga au bong. E karikai bwa te aomata ae kukurei ao n anganano riki ni maroroakina te euangkerio ma tabeman aomata. Ti maroroakin rongorongo aika a mwaiti inanon booki aika a tabu, ngaia are e a raka riki otau.

Madi S., ana ririki ni maiu 15, Colorado, USA

Te Atatai ae Bati

Ngkana I kamatebwai booki aika a tabu n ti ngai, I aki bati n unga n aron are ngkana I kamatebwai ma tabeman. Ni ikotaki ma, ti kona n reiakinaki iango aika a kakaongora mairouia tabeman ngkana ti ikotaki ni kamatebwai booki aika a tabu. Rinanon te tieminari I reiakinaki ae mwaiti n rongorongon karaki aika a kakaongora, ao e mwaiti riki ae I ataia riki taekan kabwarabwaraan booki aika a tabu, are e a karika kaungan te kamatebwai! I kukurei bwa I a baireia bwa N na ira te tieminari.

Rebecca M., ana ririki ni maiu 16, Schleswig-Holstein, Germany

Te Koaua ae Matoatoa

Te moan, te Uea e taetae bwa ike a ikotaki iai uoman ke teniman n Arana, E na mena naba ibuakoia (taraa Mataio 18:20; D&C 6:32). Namakinan Tamneina e kona ni buokira n iangoa raoi te bwai are E a tia ni karaoia ibukira. Te kauoua, ngkana ti kamatebwai ma tabeman, ti kona riki n ota n te bwai are e koreaki. Inanon te ongongora i bon imarenara, ti kona n ongo te bwai are ti tuai n ataia i bon iroura, ao titebo naba ma ae e kona n riki irouia tabeman ngkana ti tibwaua rabakaura. Te katenua, ngkana I nako n te tieminari, e kakorakoraki au koaua. Te tieminare bon reken te tai n tibwauai ara koaua ao n ongora n aia koaua tabeman. E buokira n tiku iaon te kawai ae eti.

Dmitri G., ana ririki ni maiu16, Dnipropetrovs’k, Ukraine

Reireiaki mairouia Tabeman

Te nako n te tieminari bon te bwai ae e riai ibukiu. Tiaki tii au tia reirei ae babane nanona n reireinai ao ni kabwarabwarai taian koaua ake a kuneaki inanon booki aika a tabu, ma I reiakinaki ae mwaiti man ara maroro n te kiraati. Tabeman ataein te reirei a tibwaua aia atatai iaon bwaai ake a reiakin, ao a tia ni buokai ni karekea riki te rabakau ibukin te euangkerio ao te Tia Kamaiu ao Ana Mwakuri ni Kamaiu. E aki tau te kamatebwai n ti ngai, kioina ngkai I a tia ni kunei tabeua kaeka nakon au kanganga n te maroro n te kiraati. I kona ni kakoaua bwa te tieminari iai mwakorona ae kakawaki ni kakorakoran au koaua ibukin ana Ekaretia Iesu Kristo ae koaua.

Denzel J., ana ririki ni maiu 15, Western Samoa

Teniua Bukina

Te moan, ibukina ngkai I kan nako ni mitinare, I nanako ni kaea te tieminari. Mitinare a riai ni kautimwakaia ao ni kamatebwaia te euangkerio n te moaningabong. Kakaean te tieminarie buokai ni karikirakea te anua ae tamaroa n te kakautimwaka. Te kauoua, n te moaningabong, ti kona n iango n ae itiaki, n te aro bwa tiaonga ni kona ni kabanea nanora iaon reiakinara ao te kamatebwai. E kawanawana kabonganan aoa aika a tamaroa n te bongina n reiakina taekan te Atua. Te kateniua, ngkana I kamatebwai n tii ngai, N na bae n aki karekea te atatai n ae nano n aron ae karaoia au tia reirei. Ma ana kairiri ao ana angareirei, I kona n reireinaki riki ae rangin mwaiti nakon ae I karaoia n tii ngai.

H. Chen Yuan, ana ririki ni maiu 16, T’ai-chung, Taiwan

Te Ota ao te Koaua

Ngkana I kaea te tieminari, I ukoukora te ota ao te koaua ao ni katoka ana otanga ae bwanin te Atua (taraa D&C 27:15–18). Te otanga anne e buokai bwana kinaa Bwanana n taai nako ao n taabo nako. Te kamatebwai ni katoabong ni booki aika a tabu e kakorakora au onimaki ao au koaua ao ni buokai ni matoatoa inanon kataakiu. Kaean te tieminari bon teuana mai buakon kawai ni kunean te ota ao te koaua ao ni kamatebwai booki aika a tabu ao n iangoia raoi.

Nohemi M., ana ririki ni maiu 17, Puebla, Mexico

Ikotanibwai aika a Kororaoi

Te Tieminari bon te taneiai ae kaunganano. N tabetai te kamatebwai i bon iroum e aki tau. Te kamatebwai i bon iroum ao te tieminari taian ikotanibwai aika a kororaoi. Taan reirei a boni kamimi, ao ngkana iai am titiraki, am tia reirei ao kaain am kiraati a kona ni buokiko ni kaekai.

Dawson D., ana ririki ni maiu 15, Idaho, USA