Aomata ni Kabane a Kinaa Bleck
Iroun Honoura “Bleck” Bonnet, te bwatiketibooro bon te bwai ae e kabanebuaka ana tai iaona. Man ana ririki ae 15, Bleck bon te titaa ae rikirake i French Polynesia—temanna mai buakoia taan takakaro aika a bwakuaku ibukina ngkai bon teuana mai buakon tiim aika a bwakuaku aika a momoanna n aia itera ikawai n te aba. E ngae ngke e bure korean ana nikineim n te taetae ni Imatang black, bon akea te kairua n ana taarena.
Ma e tangira riki ae mwaiti. E kan takakaro n aroia aika a rangin mwaatai i Europe. Ao iaon riki bwaai nako, e tangiria ni karekea te tokanikai iaon te meetera ae te koora n ana Takakaro Tebetebeke Maiaki.
Te bwai are e taraa n tutuka kawaina bon te Ekaretia.
TE mwaane iaon ana Mition
E ngae ngke te tiim are e takakaro ibukina Bleck e tibwaontianaki man te Ekaretia, Bleck akea nanona n te Ekaretia ke ana wewete te burabeti ibukia ni kabane ake a tau ao kairake n ataeinimwaane ake a konabwai ni karaoa aia mwakuri ni mitinare.
E a kaman tia n tuanga ana bitiobi ae e na aki nako ni mitinare. E aki nooria bwa e na kanga ni mwaatai n takakaro ngkana e kanakoi uoua te ririki.
Ae kakawaki riki, ana Takakaro Tebetebeke Maiaki—e booaki ni katoa aua te ririki—e na bae ni boo n ana tai ni mitinare, ao te Tahiti Basketball Federation e nano irouna ni kan katakakaroa ibukin tiimnin te aba. E na bae n reke ana tai n te kabanea ni katoka ana taeka tamana are e aki toki n taekinna ni katoaa te tai are e moanna n iangoia bwa te aomata ngaia ae e bubura arona: “Aomata ni kabane a kinaa Bleck, ma akea ana koora.”
Taman Bleck, Jean-Baptiste, e nanoni ana taeka n te anga ae raoiroi. Ma e kaburababaki iai Bleck. Bon taian kauring bwa e ngae ngke ana aomata n te bwatiketibooro aika a nano irouna a kinaa ni kabuta Tahiti, bon akea ana meetera man te takakaro. Tamana e a tia n reke ana tokanikai n te meetera ae te koora n aia tiim mwaane n tain ana moan Takakaro Tebetebeke Maiaki.
Bon ana mition Bleck ni kakoaua bwa taeka akekei a kairua.
Bitakin te Iango, Bitakin te Nano
N aki ongea ana namakin ibukin te mition, Bleck e teimatoa n iri ana waaki ni kakukurei te Ekaretia. N ana taenti te Ekaretia ngke e koro 16 ana ririki ni maiu, Bleck e karekea te ninikoria ni bubutia Myranda Mariteragi bwa a na taenti. Myranda bon te tia takakaro n te bwatiketibooro ae rabakau naba—ma miina n tokanikai ni karekea te meetera ae te koora. Tamana e boni mena naba iaon te tiim are a karekea te moan meetera.
Tabeua te teekan imwiin bubutiakina, e a toki te katangitang. Ngaia are a taenti n tain te kuna are imwiina, are ai te kabanea ni kuna ibukin te tairiki anne. Mai ikanne Bleck e aki tangiria bwa e nang bwara te taenti.
E tuai ni baireia Bleck ae e na mare n te tembora ke ni mare ma te membwa ibukin te kanganga anne. Ma e a moanna ni bitaki ngkai e a moanna ni kinaa raoi Myranda uoua te ririki are imwiina. Ni mweengan neienne n te bong teuana, te bwai teuana are e a tia ni karaoia n aia bootaki Kairake n Ataeinaine e katika matana. E warekia, “N na mare n te tembora.”
Nanon Bleck iroun Myranda ao ana motinnano ae matoatoa ni kani mare n tembora a karaoia bwa e na manga iangoa riki ana babaire. E baireia bwa e nang moanna n taua ma nanona n te Ekaretia. Ana babaire e kairia nakon mwakuri are e butimwaea te Tamnei ae Raoiroi ni mwakuri inanon maiuna.
Te Babaire
Teuana mai buakon babaire akanne bon katauraoana ni karekea ana kakabwaia te tamanuea ni koron ana ririki te 18. Ngke te tamanuea e taekinna inanon te kakabwaia ae Bleck e na karaoa ana mwakuri ni mitinare ao ni mare n te tembora, e namakina te Tamnei. “I ataia bwa anne ae tangiria te Atua bwa n na karaoia,” e taetae.
E ngae ngke te tiim n te aba e taraa n ae e na reke ana tai ni karekea te meetera, Bleck e baireia ma ana boutoka ana utu bwa e na karimoa are e tangiria te Atua ibukina. E aki bebete te babaire. Te tabeaianga ni kan takakaro e boni korakora. Ao e waekoa n reiakinaki bwa ana babaire n anga ngaia nakon ana kantaninga te Atua e na kataaki riki nakon ae ti te taina.
Imwiin tiana ni beku n aron te mitinare i Tahiti ibukin teuana te ririki, te kambwana ni bwatiketibooro e bubuti ngkana e kona n oki nakon te tiim tii ibukin teuana te namwakaina n ira aron te iwawaki n te takakaro.
Ana mition beretitenti Bleck, e tabeainga ibukin mwiin te taneiai are ena reke iaon ana konabwai Bleck n okina ao ni beku, e namakina kairakina iroun te Tamnei n te bwai are e na tuangnga, “Ko kona n nako ngkana ko tangiria, ma ko aki kona ni manga oki.”
Bleck e tangira te meetera anne, ma e aki tangiria nakon te bwai riki teuana. Ana mition e bon rangin kamimi. E tuai tauraoi nanona ni kanakoa ana kabanea n ririki, e ngae ngke ibukin te bwatiketibooro.
E tiku Bleck.
Kaain te tiim a karekea te koora.
Bwaai aika a Kakaokoro, Babaire aika Ti te Arona
Imwiin okin Bleck ni mitinare ma te karineaki, e mareaki ma Myranda n te Papeete Tahiti Tembora, ao a moana katean aia utu. E kantaninga naba takakarona ibukin timnin te aba.
Myranda e takakaro bwa te tia kamanoa te tiim n te karin booro n aia tiim aine n te aba ao e katauraoi ngaia ibukin ana Takakaro Tebetebeke Maiaki.
Ma e angae n anne, ngkai e a roko te takakaro, te taanga aio e korakora aia namakin bwa ana karekea aia kauoman n nati.
Ma taian takakaro aika a nang kaoti ni kee iaan teuana te ririki, e na taraa ni bebete ni kamarangaan reken riki temanna natia bwa e aonga n takakaro Myranda. Aia tiim aine e reke aia tai ni karekea te meetera.
Ma te taanga aio a reiakinaki man aia taneiai bwa anganakon aia kantaninga nakon te Atua e uoti kakabwaia aika a korakora nakon bwaai ake a kantaningai man irakin oin nanoia. Imwiin te kamatebwai ma te taratara raoi ao te tataro, a baireia bwa ana moanibwaia moa aia utu.
N 1999, ngke ana kawaniua n namwakaina ni bikoukou Myranda, aia tiim aine a karekea te koora.
Aomata ni kabane a Kinaa Bleck
Bleck ao Myranda a tia ni kona n takakaro n taian karinan ake a ririeta i French Polynesia n riaon tebwina te ririki n nako—n tokanikai n te reitaki n takakaro ibukin te aba ao mwangko n te tonamente ao n takakaro ibukin timnin abaia inanon takakaron ririki aika 2003 ao 2007.
N tain te takakaro n 2011, a uaia n ira buakon te takakaro, tii n te tai aio ngkai Bleck bon te kouti ngaia n aia tiim mwaane. Ngkai Myranda ao aia tiim aine e reke irouia te meetera ae te koora, aia tiim mwaane a karekea te buraonti, are e a manga konaaki riki iai miia kaain ana tiim Bleck ni karekean te koora.
Bleck n tabetai e mimi e na tera aron maiuna ngke e a tia ni karaoa are e tangiria n oneamwiin are e tangiria te Atua.
“N na bae ni kona ni karekea te meetera ae te koora,” e taetae. “Tao N na kona n takakaro n aron ae mwaatai, tao tiaki.”
Ma te taanga aio a aki uringaaba n aia babaire are a tia ni karaoia. A aki koaua raoi bwa a na kanga ni kukurei.
“I a tia ni mare n te tembora,” e taetae Bleck. “Iai kainnabau ae rangin nakoraoi, natiu aman aika a tikiraoi, ao I bon teimatoa ni mena n te Ekaretia. Te bwatiketiboora n ti ngaia e aki kona n anganai teutana mai buakon arei. Akanne boni kakabwaia aika a roko mai mwiin karimoakin moa te Uea.”
Karimoakin moa te Uea e aki kamotirawaa ana bwabwainingare tamana, ma e a tia n anga taeka akanne nakon nanoia aika a boou. Tabeua te ririki n nako te bootaki n takakaro e bairea tain te reitaki n takakaro n te Taabati, taian beretitenti n te kirabu a kaitibo ni maroroakina taekana. Temanna e titiraki, “Ko a tia titirakina Bleck?”
E aki butimwaeaki te bubuti.
Ibukin ngkai Bleck e karimoa moa te Uea, aomata a aki tii kinaa Bleck—a ataa te bwai ae a kakoaua.
Honoura “Bleck” ao Myranda Bonnet a maan n ira buakon te takakaro n te bwatiketiboora i Tahiti.
Iroun Bleck ao Myranda, te tokanikai n aia takakaro e riki bwa aia kabanea ni bwai inanon aia utu.
Korotamnei iroun Adam C. Olson, n tii akana a kaotaki
Tamnein tebwatikietibooro iroun Tamara Ratieta © IRI