Ni Karokoa Ae Ti A Manga Kaitiboaki
Te kantaninga n te Mwakuri ni Kamaiu
Man te taromauri are e karaoaki i Brigham Young University n Nobembwa 4, 2008. Ibukin taetaena ni Matang ae bwanin, kawara speeches.byu.edu.
Te kantaninga e riai ni kabotoaki tiaki n tii iaon te rabakau ao te kakoaua ma iaon naba karaoakin te Mwakuri ni Kamaiu bwa e na bon koaua raoi inanon oin maiura.
I a tia ni kaaitibo ma aomata ake a tia ni kabua aia kantaninga ni kabane. Te rairannano, a namakinna, e bon aki nanonaki ibukiia ao te kabwara bure e aki tauraoi nakoia. Aomata aika akea aia kantaninga a aki oota ni mwaakan ana katiaki te Mwakuri ni Kamaiu. Ke, ngkana a oota iai, a tuai ni karaoia bwa mwakoran rabwataia inanon ana korakai Iesu Kristo i Ketetemwane ao iaon te kaibangaki. Ibukira ngaira ni kakeaa te kantaninga ibukin kaitiakan maiura bon kakeaan korakoran te namakin, te mwaaka, ao anaun korakaina ibukia.
Tabeua te ririki n nako iai katabeau ngke I mena n te maungatabu n te titeiki ni karaoa te aitara ni maroroo ma temaane ae 21 ana ririki ni bairea kororaoina ni karaoa ana mwakuri ni mitinare. Ngkai, Mataniwi ni Kabuta aikoa tataneiai ni karaoa te itaramata ni maroroo ma ake a kan mitinare. Aingaia are aio e bon aki taneiai te aba iai. Ngke I warekii tabeua rongorongo ibukin te itaramata ni maroroo, nanou e maraki. Te ataeinimwaane aio e a tia ni karaoi buure n aekakiia nako. I miimi ibukin tera N na tuangaki ni kawara temanna ma te aekaki aio, ni motikia bwa e na bon rangi n aki riai ibukiu bwa N na rekomente ngaia ibukin kariaiana bwa te mitinare.
Imwiin te tetere n te maungatabu n te tairiki n te Kaonobong, I a oki rikaaki nakon ana aobiti te beretitenti n te titeiki ibukin te intawiu. Ngke I tataninga, te kairake n ataeinimwaane ae botonimwaane ma teina ae kamimii e roko. I miiakinna bwa N na kanga ni kainaomataai ibukina bwa e taraa n ae e tangiria ni kan taetae ao ngai iai kabaeakiu ma te kairake n ataeinimwaane ae iai ana kangaanga. Ngkanne e a kabwarabwara ngaia. Bon te kairake n ataeinimwaane are I mena ikekei ibukina.
Inanon ruun te aobiti are tii ngai ma ngaia, I titirakinna tii teuana te titiraki: “Bukin tera I intawiuniko?”
E karakina arona aika bubuaka n taai aika nako. Ngke e a bane, e moanna ni kabwarabwaraa taian mwaneka ao korakaina are e a tia n rinanona. E taetae iaon te Mwakuri ni Kamaiu—mwaakan te Mwakuri ni Kamaiu are akea tokina. E kaota ana kakoaua ao ni kabwarabwara ana tangira ibukin te Tia Kamaiu. Ao imwiina e taku, “I kakoaua korakain te Tia Kamaiu i Ketetemwnane ao Ana angakarea iaon te kaibangaki a bon tau mwaakana ni kamaiua te aomata ae aiarou.”
Ni kamaingaki man ana nanorinano ao iroun te Tamnei, I taku, “N na nako n rekomente ngkoe bwa kona mwakuri bwa ana tia tei Iesu Kristo.” Ao imwiina I taku, “N na tii titirakiniko teuana te bwai mai iroum. I tangiriko bwa kona riki bwa te kabanea n tamaroa ni mitinare ngkoe inanon te Ekaretia ni kabuta. E a toki ikanne.”
Teniua ke aua te namakaina imwiina, Titita Edgley ao ngai ti taetae n aia tabo ni kataneia mitinare. Ni kainan te taromauri, I bon kakawari ma mitinare ngke I a noora te kairake n ataeinimwaane ae moana I tataneiai ma ngaia.
E titiraki, “Ko uringai?”
Kaanga I mamaa, I taku, “I nanokaawaki. I ataia ae I riai, ma I a bon aki uringnga.”
Ngkanne e taku, “Kariaia bwa N na tuangko antai ngai. Ngai te kabanea n tamaroa ni mitinare inanon te tabo ni kataneiai ni mitinare.” Ao I kakoaua.
Ana kantaninga te kairake n ataeinimwaane aio e boboto tiaki tii iaon te rabakau ao te kakoaua iaon te Mwakuri ni Kamaiu ma iaon naba kamwakuran i bon irouna te bwaintangira aio. E ataia bwa i bon bukina i bon irouna! E ataa mwaakan te Mwakuri ni Kamaiu ao te kantaninga are e anga ngkana ni kabane a taraa ni bua ke ni kabwaranano.