Tangira, Tararuaia, ao Kakorakoraia

Tataro mwaaka ni kamatebwaia te bwai n reirei aei, n arona ae riai, maroroakinna ma aine ake ko kawariia. Kabonganai titiraki bwa a na buokiko ni kakorakoraia aine ao ni karaoa te Bootaki n Aine bwa iteran maium ae kakawaki.

Onimaki, Utu, Buoka

N aron te Tia Kamaiu, taan kakawari n reirei a buoka temanna imwiin temanna (taraa 3 Nibwaai 11:15). Ti ataia bwa a koro bukin ara ibuobuoki ngkana a kangai ara titita: (1) au kakawari n reirei e buokai ni karikirakeai n te maiu n tamnei; (2) I ataia bwa au tia reirei ni kakawari a tabeakinai ma au utu ma nanoia raoi; ao (3) ngkana iai au kanganga, I ataia bwa au tia reirei ni kakawari e na karaoa te mwakuri n aki tataninga tuangakina.¹

Ti na kanga ngaira taan kakawari n reirei n tangiria, tararuaia, ao ni kakorakora te aine? A kaotaki imwiina kawai ake a kuneaki n te mwakoro 7 n Daughters in My Kingdom: The History and Work of Relief Society ni buokiia taan kakawari n reirei n tararuaia aine:

Tataro ni katoabong ibukin neienne ao ana utu.
Ukoukori kairi mai eta ni kina ao ana utu.
Teimatoa ni kakawaria n noria bwa e uara ao ni buokia ao ni kakorakora neienne.
Teimatoa n reitaki ma ngaia rinanon te kakawari, tareboon, reeta, i-meeri, rongorongo n te tareboon, ao mwakuri n akoi aika a bebete.
Kamaura neienne ni bootakin te Ekaretia.
Buoka neienne ngkana iai ana kanganga ae karina, aorakina ke kanganga riki tabeua aika karina.
Reireina neienne taekan te euangkerio man booki aika tabu ao man Rongorongo ni Kakawari n Reirei.
Kaunga neienne man karaoan banna ni katoto aika tamaroa.
Ribotinna nakon te mataniwi n Aia Bootaki Aine taekan aia mwakuri n ibuobuoki ao maiuia n tamneia ao ni maiuia n rabwata.

Man Booki Aika Tabu

Ruka 10:38–39; 3 Nibwaai 11:23–26; 27:21

Man Ara Rongorongo ni Kawai

“Te kakawari n reirei e a tia n riki bwa te bwai ni mwakuri ibukiia aine Aika Itiaki ni Boong Aika Kaitira ni kabuta te aonaaba n tangiriia, ao n tabeakiniia, ao ni beku ibukiia—ni ‘karaoia n aron ae e a tia n unikia n [ni] bwanibwanra,’ n aron are e reirei Iotebwa Timiti.”²

Te titita ae a tia n akea buuna e taetae ibukiia a na tia reirei ni kakawari: “A ongora. A karaua nanou. A tang ma ngai. Ao a inga ma ngai. … [A] buokai man te bwarannano ao te nanokawaki ae korakora ni moan namwakaina tabeua ni mamaroa.”³

Te ibuobuoki ma iango nakon te tembora bon te anga naba n ibuobuoki. N te maungatabu ni kabuta n Okitobwa 1856, e katanoata Beretitenti Brigham Young bwa bwaeoniia ma aia aenika a bae n te tino ae nanona e nakon 270–370 te maire (435–595 km) raroana. E weteia Aika Itiaki ni Boong Aika Kaitira i Salt Lake City bwa ana kamaiuia “ao n tabeakin riki bwaai aika ti atong bwa bwain te rabwata.”⁴

E uringa Lucy Meserve Smith bwa a buti aia kauaotao ni kamumun ao aia titaoki n te tabo arei n te tabaenako ao ni booti ni katokai iaon waekon bwa ana kanakoaki nakoia bwaeoniia aika a rootaki n te mwaitorotoro. Ao a manga boboti kunnikai ao kunnikai ni matu ibukiia naake a roko ma tabeua aia kunnikai. Ngke e a roko te kambwana n aenika, te auti n te taun e “onrake ma bwaai n ibuobuoki ibukiia.”⁵

Temanna imwiin Temanna, iroun Walter Rane, ana anganano te Church History Museum