Kakabwaia n te Tieminari
Ni kabuta te aonaaba, te tieminari e uotia te roronrikirake n ai arom naba ni kaniiko riki nakon Iesu Kristo
Ko aki maroa n am babaire n ira te tieminari. Ni kabuta te aonaaba, bubua man ngaa irouia kairake a karika te tieminari bwa mwakoron maiuia, n roko n aia umwanreirei n te bwati, waa, bwatika, ke bon te Intanete. Tabeman kairake a utimwaaka n te ingabong ao a mwananga n te kawai are raroa bwa a na roko n te tai, tabeman a mwananga n te tairiki, ao bon tabeman a kamatebwai ni mwengaia ibukin bong aika bati n te wiiki.
Irakin te tieminari e kainanoa te anganano, ma kairake ni kabuta te aonaaba a kunea bwa te katauraoi n te tieminari e boongana karaoana. Ao naake a iria iai te bwai ae reke irouia: aia namakin n te tieminari e uotiia ni kaniia riki nakon te Tia Kamaiu ao nakon Tamara are i Karawa.
Karekean Kakabwaia ake A Beritanaki
Bukin tera ngkai e rangi ni kakawaki ibukim te tieminari? Tabeua bukina a karinaki berita aikai mai irouia burabeti ao abotoro ni boong aika kaitira:
-
E “riki[i] bwa te kakabwaia mai iroun te Atua ibukin kamaiuaia kaain Iteraera inanon taai ni kangaanga.”1
-
E “na katauraoiko n anga te rongorongo n te euangkerio are kaokaki nakoia ake e reke am tai ni kaitibo ma ngaia.”2
-
E buokiko ni “karekea te atatai ae kakaawaki n te koaua.”3
-
Tieminari “anga tibwanga aika kakawaki n reiakin te reirei are e na kakukureiko. E katauraoa te tibwa n reitaki ma naake am reeti.”4
-
“Am atatai n te euangkerio e na rikirake. Am onimaki e na kakorakoraaki. Ko na karikirakea te reitaki ae tamaroa ao te iraorao.”5
-
“E karika … maiuraoin te maiu n tamnei, korakoran te maiu n rabwata n totokoa te buakaka are e katobibira, ao e kakorakora ni karikirakea te atatai n te euangkerio.”6
-
Bon “teuana te katauraoi ae te kabanea n tamaroa ibukin te mition.”7
Kakaean te Kawai n Iiri
Kaean te tieminari n angiin te tai e kaotia bwa ko na katuka te bwai teuana are ko tatangiria ni karaoia bwa ko aonga ni karekea te tai n iria. Ma bon te anganano ae materaoi karaoan. Elijah Bugayong mai Biribin e rinea te babaire are n ana kabanea n ririki n te reirei ae rietata. Inanon ana tai n reirei n te reirei ae rietata, e kakauoman n ana kiraati. E nanomatoa ni karekea te moanna n ana ririki n tiniia ao e iangoia n reitanako irakin te tieminari, are e a tia n iriria n te ririki ae e nako mai imwaina, bwa e aonga ni kakoroa bukin ana kouru.
Ngkanne n te bongina ao e bitaki ana iango. “I [taraa] au taibora ni kamatebwai,” e taku. “I noora te bwariko ni boki irarikina, au boki aika tabu n ikotaki ma au boki ni koroboki n te tieminari ao au boki ni kairi. Bon inanou I titirakinai, ‘Tera ae e kakaawaki riki?’”
Elijah e kunea kaekaana ni Mataio 6:33: “Ma kam na ukoukora moa uean te Atua ma ana raoiroi; ao a na bane n raonaki baikai nako imi.” E baireia bwa e na kakaonimaki n ira te tieminari ao ni kakaai anga ni kabaeranta ana tai bwa e aonga ni mwakuri iaon ana kamatebwai n te reirei. Ni banen te ririki, e aranaki bwa te kabanea n tamaroa n ataei ao e reke naba irouna te tikaoratibu.
Spencer Douglas mai Alabama, USA, e baireia ni katikui tabeua waaki ni kakukrei bwa e aonga ni karekea riki ae mwaiti man te tieminari. Ni moan ana ririki ake uoua n te tieminari, e uti n 4:00 n te ingabong n iria, ao ni banen ririki ake uoua e uti n 5:00 ingabong. E taku, “I aki kona n irii waaki ni kakukurei n te bwakanako n tai ma raraou ibukina bwa N na moantaai ni matu. Ngkana I aki, N na bon aki kona n irii ao n reirei n te ingabong are imwiina.” Iroun Spencer, tiaki tii taekan te roko n reirei, ma bon te marurung ao te tauraoi n reirei.
Unimwaane Dallin H. Oaks man te Kooram n Tengaun ma Uoman n Abotoro e tia n reirei: “Tii ibukin te bwai ae e raoiroi bon tiaki anne bukin karaoana ae tau. Mwaitin bwaai aika raraoi ake ti kona ni karaoi e bwakanako ma mwaitin te tai ae tauraoi ni katiai. Tabeua bwaai a tamaroa riki nakon ae raoiroi, ao bwaai aikai bon bwaai aika a riai ni moanibwaiaki inanon maiura.”8 Anne te reirei ae kakaawaki bwa ko na uringnga ngkai ko bairea aron kakaawakin te tieminari n am tai.
Katauraoi nakon te Mition
Tieminari e riki naba bwa te katauraoi ae korakora ibukin te mwakuri ni mitinare are ko na karaoia—ngkai te membwa ni mitinare n taai aikai ao ngkana ko riki naba bwa te mitinare ae bwanin ana tai n taai aika a na roko. Franco Huamán Curinuqui mai Peru e ataia bwa ana kamatebwai n koroboki aika a tabu n te tieminari e a tia n buokia ni katauraoia nakon ana mition.
E taekinna bwa ana katauraoi e bongana n uti ibukin te tieminari are e boo n te 4:00 n te karangaina, tokana n rii waa ngke namwakainan te ieka e orea te aono nako, ao imwiina n rinanon bokaboka ni kaea ana kiraati. E taku, “I tangiria ni kabanea te tieminari ao ni waakina te intitute kiraati bwa I aonga n tauraoi ibukin te mition. N na rikirake inanon te Ekaretia.” Tieminari e rangi ni kakaawaki nakoina ibukin reiakinana n taekan koroboki aika a tabu ao ni kamatenanoi kiibu, ake ana buokia n riki bwa te mitinare ae nakoraoi.
Kakabwaiaaki n Aro nako Inanon Maium
Ngkai kairake ni katobibia te aonaaba a kataia n iira te tieminari, a na karekei korakora ni mwaitin riki kamatebwaian koroboki aika a tabu. Cameron Lisney mai England e kunea bwa e kakabwaiaaki n iteran nako maiuna. “Te tieminari e aki ti ibuobuoki n iteran te maiu n tamnei, ma e ibuobuoki naba n te reirei ao reiakinan te rabakau,” e taku Cameron.
E taekinna bwa “te moantaai ni waaki nakon te ngaina e na kammwakura am kaburoro. Tabeman raraou a taku bwa a ribwa aia tai n iria—eng, tiaki n aekakin ae ko na rinanon te numera n te 6:00 n te ingabong, ko karaoia?” Ngkai ko kamatebwai, “te Uea e na buokiko n am ukeuke, ao ngkana ko nakon te tieminari, E na rangi ni buokiko riki,” e taku Cameron.
Ngaia anne, te tieminari e buoka Cameron ni kakorakora ana koaua naba. E taekinna, “Moan reken au koaua e riki man ana burokuraem te tieminari. N rorou ni kairake ae 14, I rangi n mwakuri korakora ma te euangkerio. I aki rang kukurei n te aro, ao I riingi bwaai aika I riai n aki riingi. Bon ti inanon tabeua namwakaina imwain aei I bon kanakoi raoi ni kabane.” Ma ngke raraon Cameron e kaoia bwa e na ira te tieminari, e baireia bwa e na iria. Imwiina e a waaki n roko te kakabwaia.
“I a manga tabe n namakina te Tamnei,” e taku Cameron. “I a waaki riki n ongora n te taromauri ao n ira te Reirei n Tabati ao te reirei n te nakoanibonga. E a beebete riki, ao I a tibwa namakina te kukurei. N tokina I karekea au koaua n te euangkerio ibon irou.” Imwiin uoua namwakaina n te tieminari, Cameron e kaitibo ma ana bitiobi ao e a kamatoaaki bwa te tia reirei n te Nakoanibonga ae te Aaron.
Cameron e ataia bwa te tieminari e buokia n tei ni matoa ni kaitaraa te kataaki n te aonaaba. Ngkai e waaki nako te tieminari,” e taku, “I kunea bwa e a beebete riki te kataaki are e kaoti n te aonaaba. E bon matoa aron te kairake n te aonaaba ae ti maeka inanona bure a katobibiira man taabo nako. I kakoaua bwa ngkana ko ira te tieminari, ko na kunea te korakora ni kaitaraa. Te tieminari e karekea te maiun tamnei katantan ni kataniko. Kataaki ao kariiri aika kakaokoro mwaitiia a tia n tewenakoaki ni kawaiu, ao te tieminari e a tia n riki bwa te buoka ae korakora ni kawakinai n tiku iaon te kawai ae eti man irariki.”
Kakorakoraia Imarenaia
Te tieminari e karekea am tai ni bootaki ma kairake tabeman ake a uataboa am koaua. Vika Chelyshkova mai Russia e taekinna, “I mimi irouia aomata aika titebo aroia ake a kawakina itiakin rabwataia ao a kakoaua te Atua n arou.” E reitia, “Ngkana iai au titiraki, I kona ni maroroakinna ma au tia reirei n au tieminari ao ataein te reirei tabeman. I kona n tibwa au iango ao au koaua ma ngaia ni kakorakora au onimaki ao aia onimaki tabeman. Man warekan booki aika tabu ni bootaki ao n iangoi nanoia n te maiu n tamnei, ti uakaan riki nakon te Atua ao nakoira.”
Ksenia Goncharova mai Ukraine e reke naba aio irouna. E taekinna, “Ngkana ti tibwa te namakin imarenara, ti kakorakoraaki riki ao ti oota riki n atai koroboki aika tabu. Ngkana ti maroroo iaon banna ni katooto inanon maiura n tain te reirei, I noora te aro are e mwakuri iai te euangkerio inanon maiu ao ni maiuia tabeman.”
Ataakin Tamara are i Karawa ao Iesu Kristo
Te kurubu ni kairake a titirakinaki n te tai e aki rangi ni maan bwa e kanga te tieminari ni kakabwaiai maiuia. Aia kaeka e kaota te botoniango—bwa te tieminari e buokiia ni kaniia riki nakon Tamaia are i Karawa ao te Tia Kamaiu. Unimwaane David A. Bednar man te Kooram n Tengaun ma Uoman n Abotoro e reirei bwa: “N atuun reirei ni kabane ake ko kamatebwai n te tieminari a bane ni kakaawaki. Ni katoa ririki ngkana ko kamwataua taraan teuana kanoan koroboki aika a tabu, oina e boboto iaon te Uea Iesu Kristo.”9
Aio are a taekinna tabeman kairake n aron te tieminari n tia n uotiia ni kaniia riki nakon Iesu Kristo.
-
“I a tia n reiakina aron te Tia Kamaiu are e karaoia ibukiu, warekan rongorongo aikai ni kabane mai irouia burabeti aika mwaiti ao ataakin arou ni kakaawaki nakoina. I a ataia bwa E bon tangirai ao e mate man korakai ibukin marakiu.”
-
“Tieminari bon te kawai ae rangi ni kakannato ni moan wakinan au bong. N aki tabe bwa kuara ngai, I namakina te Tamnei ao I namakina te kakorakoraaki bwa aonga bwaai aika matoatoa inanon au bong, I ataia ma te aki nanououa bwa au Tia Kamaiu e tangirai, ao I mwengaraoi n tei ibukin ae eti.”
-
“Ngai I rairaki nakon te Ekaretia. I waakina au tieminari bon imwain ae I bwabetitoaki. N akean te tieminari, I aki ataia ngkana I kona ni bwabetitoaki. N akean te tieminari, N na bon aki karekea te Tia Kamaiu inanon maiu ngkai ke n ataia bwa e kona ni kabwaraaki au bure. I bon tuai ni karekea Tamara are i Karawa ke Iesu Kristo inanon maiu. Te tieminari e buokai ni kuneia Naakai ao ni Karekeia bwa ana riki bwa mwakoron maiu ao ni maiuia natiu n taai aika a na roko.”
-
“Irakin te tieminari ni katoabong e buokai ni kaniiai riki nakon au Uea ao au Tia Kamaiu, Iesu Kristo, rinanon reiakinan Ana reirei, Ana tangira ae korakora ibukiu, ao arou ni kona ni manga oki ni maeka ma Ngaia.”
-
“Ngkana I rin n te tieminari, I kunea nanon te boki ae tabu ae nano riki. E buokai ni kauringai ni katoa ingabong bwa N na riki n ai aron Kristo n au mwakuri ni katoabong.”
-
“Te tieminari e reieinai arou ni wareki koroboki aika a tabu ao tiaki tii ni kukurei iai ma ni karaoi bwaai aika inanon maiu. I reiakin tuua ao reirei ake a buoka kakorakoraan au koaua n tangiran Tamara are i Karawa ao Iesu Kristo, are N na uouotia ni kabane ni bongin maiu.”
Ma kakabwaia aika a rangi ni mwaiti man irakin te tieminari, e beebete noorakia kairake ni kabuta te aonaaba ngkai a moanibwaia n aia babaire.
Kamataata iroun Scott Greer
Kamatataaki n te tamnei iroun Christina Smith
Angatai: tamnein Provo, Utah, angabeeba n te tieminari anganano man te LDS Church Archives