Kauntira n te Uoote a Mwakuri
Aomata aika a Itiaki a kabonganai kauntiran te uoote ao mwaanga ni kakabwaiai maiuia naake a kainnanoa te ibuobuoki.
N tairikin Meei 22, 2011, ribuakon beroron ma tangitangin, te toneito ae korakora are e taona nakon nanon Joplin, Missouri, USA, n urubekei mweenga ao maiuia aomata. Te Moan Uoote ae Joplin e oreaki nako n te toneito, ma n te tai ae waekoa Bitiobi Chris Hoffman ao te kauntira n te uoote a kakoaua raoi bwa a mano membwa n te uoote.
“Iai ara babaire bwa e kanga mwakuriana ao karaoana ao ibukina bwa ti a tia ni maroroakin katauraoi aikai inanon te kauntira n te uoote imwaain ae a riki,” e taku. “Ti bon onimakina te Tamnei n ataakin te bae ti na karaoia. Waean te iti a aki maiu. Tareboon aika mobwaira a aki mwakuri. Ti tataro ao ni kakauongo ibukin taian kaeka, ao a kaoti—a kaoti n taainako. I namakina te kukurei ao te rauaki n riki bwa te bitiobi ngkai a kangai membwa, “Aio te bwai ae I a tia ni karaoia, n oneanmwiin ae, ‘Tera ae ko tangiria bwa n na karaoia?’”
Te kaeka irouia kaain Joplin a kaota te mwaaka ao te katiteuanaaki n te kauntira n te uoote. “Te bowi n te kauntira n te uoote bon teuana mai buakon bowi aika kabanea ni kakawaki n te Ekaretia,” e koroboki Unimwaane M. Russell Ballard man te Kooram n Abotoro n te Tengaun ma Uoman, “ibukina bwa te kooram n te nakoanibonga ao taani kairiri ni bootaki a kona ni maroro ao ni babaire ma te bitiobi. … Man taian kauntira ao komete n te Ekaretia, I kakoaua te kauntira n te uoote e kona ni korakora mwiin ana waaki ni buokakia natin Tamara are i Karawa.”1
Katiteuanaaki n te Tangira ao te Onimaki
I aon Puerto Francisco de Orellana, te kawa teuana ae tionako ni buakonikain Ecuador, membwa a raingin korakora aia reitaki n te tangira ao te onimaki. Te kauntira n te mwaanga ni katoa namwakaina a kaota mwaitin aia mwamwannano. A kabanea moa aia tai iaoia aomata ao utu, imwiina bwa a kanga taian burokuraem ni kona ni ibuobuoki. E kaoti te kairi imwina.
Angiia membwa a kainnanoa buokaia ni kakaean aia mwakuri. Te kauntira n te mwaanga e kunea bwa te kakaewenako nakoia membwa e kona n taobaraaki angin te tai ni bon katein te tabo. Ngka te kauntira e maroroakina kainnanon te tina ae aki iein ma natina ae te kairake n ataeinaine are iai ana kanganga ni maruruingin rabwatana, te beretitenti n te Bootaki n Aine e ataa te mwakuri are e kona ni mwakuri iai te tina n teimatoa ni kaan ma natina.
Te kauntira n te uoote e katauraoi bwaai n ibuobuoki n te Ekaretia, n aron bwai n reirei ni kairan te wekitiaobu n ana Tabo ni Kamwakuri te LDS.2 A katea te kiraati ae kairaki iroun te membwa n te uoote, are e buoka te membwa temanna n te mwaanga ni karekea ana mwakuri ae tamaroa.
Ramiro Reyes, te moan kauntira n te beretitentii n te mwaanga, e taetae ibukin te kauntira n te mwaanga: “Boni bwaai ni mwakuri ngaira ni bain te Uea. E na kakoroi nanon Ana kouru rinanon ara mwakuri.”
Kawaim nakon te Tembora
I Liverpool, New York, USA, ngkai te beretitenti n te Buraimwari Melissa Fisk e kaea bowin te kauntira n te uoote, e matata raoi ni mwaakana. Ngke e kauka ana baeki ni kakaea ana boki, e kunea tamneia ataein te Buraimwari ae 28 mwaitiia iaon kaintamwaraken te Palmyra New York Tembora. Ni kabane ataei a tenaaki n te man ae te manibeeru. N te tai anne, e katika nako ana iango te tamnei, ao e a tiku ana iango riki n te bong are e a tia n nako iai te Buraimwari n te uoote n nako Palmyra ni karekea te namakin ae kakukurei man tabun tanon te tembora. N akea tekeraoia, ngke a taakin aia burangketi ataei, ao a bon boo ma te kanganga ngke a karina ni kakiriwea ngaon te manibeeru.
Imwiin tararuakia raoi aomata n tatabemania nako, a kaoia ataei taani kairiri, bwa a na riinga te tembora. A rawa ataei ibukina ngkai a maaku bwa rimwi ao manga iai riki taian manibeeru. Ngaia are kaaro ao taani kairiri a tei n te rain ao ni karaoa kawaia nakon te tembora. Aio e angania ataei te ninikoria ni waaki nako.
Ngke e a kaoka ana iango Melissa nakon bowin te kauntira n te uoote, e iango, “Ngke arona bwa ni kabane a kona ni katobibiaki irouia rao aika a tatangira ao taani kairiri ngkai a waaki nakon te tembora.”
E bua ana iango ngke e ongo bwanaan te beretitenti n te Bootaki n Aine n taetae iaon temanna te titita ae kainnanoa te ibuobuoki: “E aki roko n te taromauri n te Taabati ae nako. N na kakoaua raoi bwa ana tia reirei ni kakawari a na kaongoa taekan te mwananga nakon te tembora are imwiina.”
“Iai te kanganga ae a rinanona n te tai aei,” e reitia te beretitenti n te kooram n unimwaane. “N na taetae nakoia ana tia reirei n te mweenga ao n taraia ngkana iai te bwai ae ti kona ni karaoia.”
“Kairake n Ataeinaine a kona n ibuobuoki n tobwa,” e taku te beretitenti ibukia Kairake n Ataeinaine.
Ngke e tarai mataia membwa n te kauntira n te uoote Melissa, e noora te tangira ae koaua ao te tabeainga. E kaota te moangare iaon ubuna. “Te Uea e katauraoi kawai ibukia Natina ni kamanoakia ao n tangiraki,” e iango. “Te kauntira n te uoote!”
N ai aron are n te Joplin, Puerto Francisco de Orellana, ao Liverpool, taani kairiri n te Ekaretia n te aonaaba ni kabuta a teimatoa ni kunei kakabwaia man te kauntira n te uoote ao te mwaanga. Ngke a karaoia, a na karekea te mwaaka ae kamimi man kauntira aikai ni buoka te Uea ni kakabwaiaia natina ao ni kakoroa bukin Ana mwakuri.
Angamaing: tamnei iroun Craig Dimond; mai ieta: tamnei iroun.