Ti Taekina Taekan Kristo
Te Karaanga n Rau
Ibukin rawawatan nanou, I waaki rake ma ni kamatoatoaaki n te onimaki ao te kantaninga iroun te Tama are i Karawa ao Iesu Kristo.
N te bong are e mate iai natira te mwaane te karimoa, buana e karika te rawawata ae korakora n tamneiu. E ngae n anne I kakoaua bwa e kona mwaakan te Tia Kamaiu ni kamaiu ni buokai n rawawatau ao ni marakiu. Ngai ma kaain abau ti tuanga ara tia reirei n te mweenga bwa a na anganiira te kakabwaia. Ti ataia bwa ti na anganaki te korakora. E a tia ara Tia Kamaiu ni berita bwa E bon aki kona ni kitaniira ni motiki roora (taraa Ioane 14:18). I a tia n taua ni kamatoa te berita anne ao ni kakoaua ane E taekinna.
E reirei Itaia bwa te Tia Kamaiu bon “te aomata ae nanokaawaki, ao e ata naba te rawawata” (Itaia 53:3). Ngkana iai ae e kona ni buokiira, I ataia E kona, n arona bon irouna. Ma I ataia bwa ngkana E waekoa n anaa rawawatara mai iroura, ao e na bon akea te ririrake, akea te atatai ae e na riki.
Man te uruaki n nano, I a tia n rinanon teimatoan namakinan te rau n aiaron te karaanga are e roko mairoun te Tia Kamaiu (taraa 1 Nibwaai 20:18). Inanon taai, boong, ke inanon wiiki, ni kanganga ao e a tia Ana rau ni uota nako nanokawakiu. N na ti tangiria n titiraki ibukina. E aki tangiriira Tamara are i Karawa bwa ti na rinanon te maiu ae mamate n ti ngaia.
Ngke I tabe n iangoa te kabuanibwai are e ana maiun natiu te mwaane, e roko te rongorongo man te O Tetemanti n au iango:
“E kona Atuara ae ti toro i Rouna ni kamaiura man te nnenikanaiai ae ura mwaaka te ai iai, ao e na kamaiura mai nanoni baim, te uea.
“Ma ngkana tao e aki, ao ke e ataaki aei i roum, te uea, bwa ti na aki toro irouia antim” (Taniera 3:17–18; e kairaki katuruturuana).
Mwakorona ae kakaawaki bon “Ma ngkana tiaki.” Ti riai n teimatoa n onimaki n aki tabe bwa tera bwaai aika riki. E kona te Tama n tia ni kanakoia anera bwa a na kamanoa natiu man te kabuanibwai, ma E aki. E ataia bwa tera ae E na anaia bwa E na kamaiura bwa ti na kona n tauraoi n Nakoina. Bwaai ni kabane a na bane n okeei. Ma e aki nanonaki n anne bwa ti na aki kona ni manga nanokaawaki ke n tang. Nanokawakira bon ibukin ara tangira, ma nanora e na aki reke n te kanganga.
Te kabanea n tamaroa ni bwaintangira ae ti kona n anganiia naake n iteran te rabuna ake uoua bon te waaki nako ni kakorakoraaki n te onimaki ma te kantaninga iroun te Tama are i Karawa ao Iesu Kristo, e ngae ngke mwaneka n tatabeua nako a anaaki ma rannimata aika wawanako mai matara. Bukina bwa iai te berita nakoira bwa “akea ana tokanikai te ruanimate, ao e anaaki kammarakin te mate iroun Kristo” (Motiaea 16:8). N te bong teuana “ao e na kaoi rannimata te Uea ae Iehova mani maata ni kabane” (Itaia 25:8).
Tamnei © Getty Images