Am kakoaua e bon kona ni korakora riki nakon ae ko ataia.
Ko a tekateka n te bootaki ni kaoti kakoaua. Ngkai ko taraia kaain te taromauri n teirake ao ni kaoti aia kakoaua, ko namakinna bwa ko riai naba. Ma terana ae ko taekinna? Ao terana ngkana ko a moanna n tang ngke ko a mena ieta ikekei? Ke teranangkana ko aki moanna n tang? Ko kona ni moanna n titiraki ngkana bon iai am kakoaua. Ke tao ko aki koaua raoi bwa terana am kakoaua. Aikai tabeua kairam n ni buokiko n ataae te kakoaua ao ae tiaki.
Te Kakoaua Bon te aki Nanououa, te Rabakau, ke te Onimaki inanon te Koaua
“Koaua ae itiaki” (Aramwa 4:19) e moanaki ma te onimaki raoi. Am kakoaua bon te kakoaua n tamnei n te bwai are ko onimakinna ke ko ataia bwa e koaua (taraa D&C 80:4). Ngkana ko tibwaua am kakoaua, te mwakoro ae te kabanea n itiaki ao ni korakora e na roko man taeka n aron ataia, kakoaua, ao taekina koauana. Ngkana ko kona n atongnga ma te nano ae koaua, “I ataia bwa ana Boki Moomon e bon koaua,” ko kona ni karekea te mwaaka ni bitii maiu ao ni kaoa te Tamnei n ringiia tabeman.
Iangoia bwa iai am baoki ae buubura ae oon ni bwaai ni kamaninga ake a karaoaki tii ibukim. Ni kamanenaa te tamnei iaon moan te baoki, ko kataia ni katomatoma te bwai ni kamwaninga. Ngkana uoua mwakoron am bwai n takakaro a toma raoi, ko ataia bwa a bon reitaki. Kakoaua a mwakuri n ti te arona. Ngkai iai am taneiai n te maiu n tamnei, mwakoron am kakoaua aika kakaokoro a na moanna n toma raoi, ao ko na roko ni kakoaua ke n atai koaua tabeua ibukin te euangkerio.
E ngae ngkana ko aki ataia ngkai ngkana bwaai ni kabane ibukin te Ekaretia a bon koaua, Te Tama are i Karawa e na kakabwaiako ao ni buokiko n reireiniko ngkana ko teimatoa ni iai iroum tangirana ae tamaroa n ataia ao ngkoe ma nanom ae koaua ko kataia n reiakin.
Te Kakoaua e bon Onoti nakoim
Ngkai ko mwakuri i aon am kamwaninga, am utu ao raraom a na kona ni buokiko imarenan tai ni kaokia ni kabane. Ma n tokina, bon am kamwaninga n ti ngaia ni kateia ao ni kawakinna. Ko kona ni katan iaan aia onimaki am karo ke raraom n taai tabetai, ma ngkai ko rinanon te taneiai n te maiu n tamnei ae mwaiti riki, ko kona ni kateimatoa oin am kakoaua.
Ngkai ko rikirake inanon te euangkerio, e bon kakaawaki bwa ko na karikirakea am kakoaua i bon iroum. N aron ae uoman aomata aika kakaokoro aia kawai ni katomatoma te bwai ni kamwaninga—tao temanna e katomaa man tein rarikina ao are temanna e moana ana katomatoma man kabotauan aia kara—ngaira n tatabemaniira ti katea ara kakoaua rinanon te onimaki ao te taneiai n te oota are bon onoti nakoira.
Ngkana ko aki koaua ibukin te bwai teuana, tataro ma nanom ni koaua ibukin kairam ao te koaua. N taainako tataro a bon aki kaekaaki n te kawai are ti kantaningaia, ai ngaia are kateimatoa matam ao nanom ni kaukii ibukin kaeka.
Te Kakoaua e Bon Teimatoa n Rikirake
N aiaron are ko aki kona n anaa te kamawaninga ae e a tia man te baoki n akean karaoakin te mwakuri, kona aki kantaningaa am kakoaua n roko ni kabane n tii te taina. Ko reireiniko, te mwakorona imwiin te mwakorona, ni koauaan raoi te euangkerio.
Kateimatoaan te kakoaua ae matoatoa e tangira te kekeiaki ae teimatoa. Ngkai ko reitanako te mwakuri iaon karikirakean am atatai n te euangkerio, te Tamnei ae Raoiroi e na kakabwaiako n am kekeiaki ao am kakoaua e na reitinako n rikirake.
Puzzle art iroun Eric P. Johnsen; rawetamnei iroun Welden C. Andersen
