Mweengara, Ara utu
Tai Bwara n Nano
Te buumwaane ao te buuaine a taekina aia maroro nakon ana euangkerio Iesu Kristo—35 te ririki marangana.
Ana Karaki Neiei
Ibukin 35 te ririki N onimaki ao ni kantaninga kainnabau bwa e na riki bwa te membwa n te Ekaretia. Abwakin ririki akanne a kaonaki n te tataro ae nako man te nano, ma teniua tataro aika kakaawaki inanon tain te bitaki n te bwai are I rinanona.
Al ao Ngai ti mareaki n 1959. Tebwina te ririki imwiina a reke natira teniman ao ti maeka n te taun ae uarereke i Kanata. Al e bitineti n te kateitei ao ngai I tiku n te mweenga bwa te tina are n tabetai I ibuobuoki n te bitineti. N tain te wiikeen, Al ao Ngai ti bootaki ni kukurei ma raraora, n tainako ma te manging. Tamau bon te arekooro, ngaia are I rangi n ririba te manging inanon mwakoron maiura ae bubura, ma ea riki bwa ai arora n inoonoo.
N te ririki anne, 1969, I ataia bwa maiu ai akea uaana ao natira a kainnanoa ae tamaroa riki nakon are ti anganiia. N te tairiki teuana n te bukamaru ni moi manging, I katorobubua n tataro, “Te Atua ae ko tangiraki, ngkana ko Mena ikanne, taiaoka buokai ni bita maiu.” I berita Nakoina N na aki manga mooi manging, te kabaeaki are I karinea mai imwiina anne.
Anne te moan tataro are I ururinga, ao e waekoa ni kaekaaki. Natin buun mwaneu, ai natiu te aine, e kaoaki bwa e na ira te Buraimwarii ma raraona ae te Aomata ae Itiaki ni Boong aika Kaitira. Ngke buun mwaneu e reiakina riki taekan te Ekaretia, e kaungaaki nanona bwa e na kanakoa nakoiu bokin te maekatiin n te Ekaretia, are e roko inanon teuana te namwakaina imwiina are I taekina au moan tataro. I aki ataia bwa tera te Moomon, ma I tangira te rongorongo are inanon te maekatiin ao I warekia man te moaniba ni karokoa kabaneana. I baireia bwa N na ukoukora te Ekaretia ao inanona I kunea kaekaakiu. I bon bita maiu, ao I bwabetitoaki n Tuun 19, 1970.
Al e aki karekea are I tangiria. E tangira aron maiura are mai imwaina n reitinako ni maiuakinna. E reitinako n riki bwa te buu ae tamaroa, te karo ao te tia katauraoi bwaai, ma imwiin 35 te ririki imwiina, ni kaineti ma te euangkerio, I bon tiku ibon irou.
I bon kaikawaia natira inanon te Ekaretia, ma inanon tabeua te ririki, natira a baireia bwa a na kabanea te Taabati ni buti n te booti ma tamaia nakon ae a na taromauri ma ngai. I bon rangi n un. N tebongina inanon 1975 I taetae ma au beretitenti n te titeiki ao I tuangnga bwa I a baireia bwa N na kiitana te Ekaretia ibukina bwa e urua ara utu. E ongora ma te taotaonannano man taku, “Karaoa are ko riai ni karaoia, ma kakoaua bwa Tamam are i Karawa e kariaia.” Ngaia are I aoki rikaaki nakon mweengau ao n aki mamatam ao n tataro. Anne te kauoua n tataro ae tiku n au ururing. Te kaeka e roko man te namakin are Ngai bon te reitaki n tieinin te euangkerio ibukin au utu; ngkana I urua te reitaki anne, ni kabane a na bon bua. I ata te kaeka e roko mai iroun te Atua, ngaia are I kabaeaki bwa n aki kitana te Ekaretia. Ao I bon aki kitanna.
Te tiku ni kakaonimaki e aki roko ni bebete, ma a rawata bwaai a buokai ni kateimatoa au onimaki ao I nanorinano ni kantaninga ibukin te bong are Al e na manga iangoa te euangkerio:
-
I tangira n tainako Al ao I karaoa au kabanea n tamaroa n tararuaia ao ni boutoka nakoina, n riki bwa te buu ae kakaonimaki.
-
I tataro n tainako. Tamau are i Karawa ao Iesu Kristo a riki bwa raou n au euangkerio. Ngkana I tiku ma Al e kangaanga ibukina bwa e aki maiuakina te euangkerio, I taetae ma Tamau are i Karwa ao ni kina au Tia Kamaiu.
-
I wareware n tainako ni koroboki aika a tabu ao booki ake tabeua n te Ekaretia are a kona n reke irou, n ikotaki ma te Ensign. Uoua kibun koroboki aika tabu aika onoti, 3 Nibwaai 13:33 ao Doctrine ao Covenants 75:11, a rikiraki n nano ao n tatangiraki irou. A anganai te korakora ao te nanorinano n tataninga bitakin nanon kainnabau ao natiu.
-
I kakaonimaki n nako n tataro ti ngai ni karokoa ni kabane natira a oki rikaaki. Ni kabane a kakaonimaki ni boong aikai. Ngke a ikawai ao a kitana mweengara, I reitinako n ira te taromauri n ti ngai.
-
Ti karaoa te kainutu n te tairiki n akean Al n ataakin are aio te bwai ae ti bon kakaraoia. I uotarake te maororo n te taibora ni katairiki, ao ti maroroakinna n te utu.
-
I kataia n ongotaeka n tainako ni karaoi bwaai aika a eti.
-
I karekea te mwaaka riki teuana man au bubuti ni karekean te kakabwaia n te nakoanibonga.
-
I ukoukori reirei mai irouia taan kairiiri n te nakoanibonga.
-
I karikiia raraou n te Ekaretia bwa au utu.
-
I nakon te tembora ni karekea au entaumente. I karaoa aio inanon ririki aika a mwaiti ni karaoa te babaire anne. I maaku bwa e na karika te kangaanga ae korakora riki n au reitaki ma Al. N tokina, I kunea bwa te kabanea n raoiroi ibukiu. Al e boutokaia, ao I kukurei iai, ao imwiin karekeana, I kai manga karekea Al bwa bukin aki nakoiu nakon te tembora. Ngke I ira te taromauri n te tembora, I karina aran Al inanon te rinan n ara n tataro.
Ni bon arona, I reitinako ni maiu bwa te membwa ae e kakaonimaki n te Ekaretia. I taratarai kawai aika uarereke n tibwa te euangkerio ma ngaia, e ngae ngke e aki kan ongo. I kunea bwa te Tamnei ae Raoiroi e kaungaai ma te bwai ae e ti are Nna taekinna ao te tai n tibwaia. I reiakinna imwiina bwa ibukina au kakaonimaki ao kabaeakiu nakoina, Al e riingaki n te Tamnei n te tai teuana nakon teuana.
E ongora naba nakon aia reirei mitinare n taai aika bati. Ma ni katoa tai, e uruaki nanou ibukina bwa e teimatoa n okira aron maiuna ni kawai. Inanon taai ni bwarannano, e ngae n anne, te Tama are i Karawa e tarataraai ao e karaoi bwaai ake akea irou ma kakabwaia tabeua. N tai nako I ataia bwa iai riki te bwai teuana inanon Al ae kakaawaki bwa N na tataningaia.
Ni karaurau Al e tabe ni bitaki. E a toki ana tataebuaka. E toki mangingina. E a rangi n akoai riki nakon are mai imwaina. E a moanna n ira te taromauri.
Ao I reitinako n tataro.
Te bwai ae kamimii ni kaekaan au kateniua n tataro are I ururinga e roko inanon Eberi 2005. I bon titiraki ngkana Al e na kona ni butimwaea ana euangkerio Iesu Kristo—I a bon namakina te raraoma ae uarereke. I bubuti nakon Tamau are i Karawa ibukin Ana ibuobuoki. Tao bon te tai ae riai ibukina bwa Tuurai 9, e a bwabetitoaki Al.
E ngae n anne rokou n te tia anne e bon aki beebete. I kukurei n tia ni karekea te kakoaua ni kamimiin mwaakan te Atua ni bitakin te nano ae aki kakoaua nakon te temanna ae kakoaua. I ataia bwa E ongo ao e kaekai au tataro aika a mwaiti ake I anga ae raka iaon 35 te ririki n nako. Ibukin Ana kaeka, I a maeka ngkai ma te mwaane ae bitaki, temanna are e tangira Tamara are i Karawa n ai arou. Ao ti tangiriira ibon iroura ao e a nano riki nakon are mai imwaina.
I ataia bwa iai tabeman n te Ekaretia ake a tataninga, kantaninga, ao n tataro ibukiia ake a tangiriia bwa a na kaaina te Ekaretia. I tangiria ni kaungaia tarira ao mwanera akanne bwa ana butimwaea ana kakao te Tia Kamaiu n “nakomai nakoiu” (Aramwa 5:34) bon ibukiia ao tiaki ti ibukiia ake a tangiriia. I ataia man te bwa are a rinanona are a karaoi e na anganiia te korakora ngkai akea riki te bwai ae kona. N tiku ni kaan nakon te Tama are i Karawa, ongotaeka n Ana tua, ao ni kukurei ni kakabwaia aika ngkai e karikirakea te kakukurei ao ni karekea Ana tai ni mwakuri rinanora.
I kakoaua bwa te Atua e ongo n ara tataro. N tataninga te Uea ao ni butimwaaia ana Tai are e na riki iai ma te onimaki e bon kanganga rekena, ma I ataia bwa Ana tai are e na riki iai ae e eti n tainako.
Ana Karaki teuaei
Inanon 35 te ririki a mwaiti aomata ake a maroroakina te euangkerio ma ngai. Kainnabau e aki kona n aki karekea te tai ni maroroakinna, ao e rangi ni mwaatai ni katuka ana Boki Moomon ao Ensign maekatiin n te tabo are e na nooraki. Eng, I bon aki kona n tabekii. E kaoia mitinare n taai aika a mwaiti; ni kakauoman ke ni kateniman mwaitiia a bon reireinaki aia reirei mitinare.
Ma tera are e tauai man te tebo n te ran ni bwabetito?
I reke au anga n tainako. I abwabwaki au tai ni mwakuri. I aki nooria bwa e na iai au tai ibukin te euangkerio. I bon rangi n tabetabe riki ma te karekemwane. Ngaia are I tuanga Eva, “N te taina ngkana a karaurau butin bwaai ao e a reke riki au tai ae mwaiti, N na wareka ana Boki Moomon.”
Ma I bon aki karaoia. Irarikina, I bon aki bati ni wawareware, ao ngkana I kataia ni wareka te Baibara, e bon aki mataata raoi irou. Ngaia are anne tokina.
Iai naba te bwai teuana are e totokoai man kainakin te Ekaretia, te bwai riki ae moan te matoatoa; te maiu n tangira te bure are I i mauiuakinna. E reirei te Uea are Beniamina bwa “bon ana kairiribai te Atua te aro n aomata … ni karokoa ae e kakauongo nakon ana wirikiriki te Tamnei ae Tabu” (Motiaea 3:19). I bon aki kakauongo—I tekateka iaon te oo. E taku te Tia Kamaiu, “Ane e aki mena i Rou ao e rawa nako Iu” (Mataio 12:30). I a ataia ngkai bwa ibukin aron maiuakinan maiu, I rawa nako Ina. I kainanoa te bitaki.
I maiu i tinanikun te euangkerio ma I bon tuai ni maiuakinna raoi, ma ni waakin te tai, I moanna n namakina te Tamnei. I katoka te bwabwaati ao te momooi. Ngke I karaoa te bitaki anne, te Tamnei e moanna ni kakoaua nakoiu n tainako. I bon tuai naba ni mena n te tabo are I riai ni mena iai—au taetae ni kawai e aki rangi n raraoi ao iai kateiu tabeua aika I riai ni katamaroai riki—ma I a bon bitaki.
Ngkanne n te bongina ao I a karekea au batia. Bon mai iroun natiu te aine, Linda. Kanoana Ana Boki Moomon ao te Baibara ma kibu inanona aika mwaiti ni mwakenaki. E korea naba te reta nakoiu are e tuangai mwaitin tangirau irouna ao e tangirai bwa N na ata te bwai are e ataia.
E koreia, “Ti te kawai n ataia ngkana ana euangkerio Iesu Kristo e koaua bon te bubuti n te nano ae koaua ma nanom raoi.”
Imwiina Linda e tibwai karinanin koroboki aika a tabu ake a kairai iaon kawai n te tataro ao kamatebwaian koroboki aika a tabu.
“Ti te kawai are I kona ni kina iai au Tia Kamaiu ao te Tama are i Karawa,” e koreia, “bon man te tataro ao warekaia ni koroboki aika a tabu.”
Imwiina e kabwarabwara aron kakaawakin te nanorinano ao ni kangaa, n akean te Atua inanon maiuna, e bon aki kona ni karekea te rau. N tokina, e koroboki, “Tai manga katikui bwaai ni kawaeremwei. Ko a tia n anganaki ae rangi ni mwaiti. Ngkai aio te tai ni kaoki bwaai nakon te Tama are i Karawa. Ti aio te kawai nakon te kukurei ae koaua.”
Ai bon akea riki birinakou. Te mwakuri e a karaurau, ao ea reke riki au tai ae mwaiti. Ngaia are I waaki ni wareware ao ni kamatebwai koroboki aika tabu are e a tia ni kamataatai nakoiu, ake e anganai te nano ni kan wareka ni kabane Ana Boki Moomon. Ma a bon teimatoa ni mwaiti riki bwaai aika I aki oota iai.
N te tai aei ao I a ira te bootaki n toa ibukina bwa kainnabau e taku bwa e na tamaroa ngkana I roko n tekateka irarikina. E iangoia naba bwa Nna wareka te Doctrine ao Covenants. I karaoia, ao I ota riki iai. Imwina, ma ana ibuobuoki kainnabau, I wareka ana Boki Moomon ao n namakina rokon mwaakan koroboki aika a tabu inanon maiu. Rinanon tataro aika a mwaiti, te Tamnei e a tabe ni korakora ni bitai.
Tera ae karaoaia te bitaki inanou? Te Tamnei ae Tabu ao te atatai n koroboki aika a tabu. Ni kauoua a anganai te bitaki ni maiu ao ni bubutia te Atua kabwaraan au bure, ake bon ngaia ake a totokoai man kaainakin te Ekaretia inanon ririki aika a mwaiti.
Kaotakin au bure bon te bwai ae rangi ni kangaanga. E karika te maraki ae korakora nakoiu ngke I wene iaon au kainiwene inanon teniua te bong n rawaawata. Ma rinanon ana Mwakuri ni Kamaiu Iesu Kristo, a kabwaraaki au bure. Imwiina te Tama are i Karawa e anganai te korakora n teiraki ao ni wakinako ma maiu ae boou.
Natiu ae Kevin e bwabetitoai n Turai 9, 2005. Temanna mai irouia mitinare are e reireina kainnabau bwi n ririki n nako e iri. Uoua te ririki imwiina I kairiia au utu nako San Diego Californina Tembora ni kabaeaki ibukin taai ao n aki toki.
Nikiran ririki ake itiua bon ririki ni kakukurei inanon maiu. I a kona n toka n okira au tabo bwa te tamanuea ao te tia kairiiri n te maiu n tamnei nakoia au utu ao n tibwa te euangkerio ma kainnabau, natiu ao tibura aika ruaman. Katiteuanaan te utu e a tia n riki bwa kakorakorakiia aomata nako n te maiu n tamnei. Buun natira te aine e a tia ni kaaina te Ekaretia, ao aman tibura a tia n nako ni mitinare ke ae a bon karaoa aia mwakuri ni mitinare. Maiu ae boou inanon te Ekaretia bon te kakai. I aki ata aron te kakukurei are korakora ao te rikirake are e uotia nakoiu.
I rangi ni kakaitau ibukin te kauoua n tai. I kakaitau ngkai I kona ni kabomwi n ririki ake a tia ni bua ni karaoa ana mwakuri te Atua.
Ngke I wareka ana reta natiu te aine, I ataia ae ai bon akea riki birinakou.
Te kukurei ae korakora e a tia n rin inanon maiura ibukina bwa ti a katiteuanaaki inanon te euangkerio.
Kamataata n teTamnei iroun Craig Dimond