Te Koroboki Aio n Ebera

Derk Palfreyman, Utah, USA

Imwiin warekan te O Tetemanti tabeua ririki n nako, e kukurei nanou n ana reirei, ai moararariki ana koroboki Itaia, ao n teimatoa ni kamatebwaia. N 2010, I kunea bwa ni mwanangau ni kiba I tekateka n uakaan ma te rabi ae te Iutaia. I moana te maroro man titirakinna taekan tabeua karaki n ana boki Itaia. Ngke e reitinako ara maroro, ti kakarabakauakina kakawakin te kariaia n te nakoanibonga are e kamatataki n te O Tetemanti.

E titirakinai te rabi bwa a karekea iaa te kariaia n te nakoanibonga membwa man au ekaretia. I taua te tai n tuangnga rongorongon ana Moan Kaotioti Iotebwa Timiti ao kaokan te Nakoanibonga aika te Aaron ao te Merekitereka. Ti maroroakina rairan ana Boki Moomon ao oin te kantaninga ngkai “Kakoauan Taekan Iesu Kristo.”

E waaki nako te rabi. E titiraki bwa rorora ngke e karekea te Moan Kaotioti Iotebwa. Ngke I tuangnga ae 14 ana ririki Iotebwa Timiti, e kaan uaroro ma ana ririki Tamuera are n te O Tetemanti, e kaeka bwa angiina burabeti a weteaki inanon ataeia. E taku bwa ti te arona ngke e na wetea Iotebwa Timiti te Atua inanon ana ka tebwitabun n ririki

I kauka au boki ae tabu, ao ti uaia ni wareka aia koaua taani kakoaua ake Teniman ao Waniman. I tuangnga bwa tabeman mai buakoia taani kakoaua a tia ni kitana te Ekaretia ma akea ae kakewea noorakin taian bwaatua koora.

“A kanga ni kitana te Ekaretia imwiin noorakin te anera ao bwaatua?” e titiraki.

“I uringnga bwa tibun Iteraera a katea te kao ataei ae karaoaki man te koora teutana te tai imwiin kakoauan bwenauaan Tari are e Uraura,” I kaeka.

E rairia nakon 1 Nibwaai ao ni moanna ni wareware. E toki ao e taku, “Te koroboki aio bon te taetae n Ebera.”

E kabwarabwara imwiina bwa e kanga te koroboki ni kaoti bwa te taetae n Ingiriti n rairaki man te taetae n Ebera. I tuangnga bwa te boki e koreaki irouia ana baronga Iteraera. I taekinna man Etekiera 37:15–20, are e taekina ana kai Iuta ao ana kai Iotebwa. Ti boraraoi are ana kai Iuta e tei ibukin te Baibara, I kabwarabwa bwa ana kai Iotebwa bon ana Boki Moomon.

Imwiin ara teniua n aoa ni maroro te rabi e kaotia bwa iai nanona ni karekea kaobiin ana Boki Moomon. Ngke I okira mweengau, I a kanakoa teuana ana kaobii ma au koaua ae koreaki iaona. I kakaitau bwa au konabwai ni kamatebwaia te O Tetemanti e a tia ni katauraoai ni maroroakin booki aika a tabu ao n tibwaua au koaua ma raoraou ae boou, te rabi.