Man te Tabo ni Mwakuri n te Aro
Te Berita ao te Tataro
Ana Boki Moomon iai te mwaaka iai ni buokiia ake a tangiria ni kan ataia bwa e bon koaua.
Terana are e kamimiiai ibukin ana Boki Moomon bon te bitaki ae korakora ao n akea tokina are e a karekea inanoia aomata imwaain ae a riki bwa membwa n te Ekaretia. Ngkai te mitinare n te Mexico Cuenavaca Mition I bon nooria ni matau te bitaki ae korakora aio.
Ngke I a tia ni mwakuri inanon onoua te namwakaina, te membwa n te mwaanga e a karekea nakoiu ma toau te aine ae 20 ana ririki ma ana utu bwa ti na reireiniia. Te kairake n aine e aki oota bwa terana are a kakoaua aomata Aika Itiaki ni Boong aika Kaitira ao man titirakiniira titiraki aika bati. N ataakina bwa ana Boki Moomon e kaekai ana titiraki te tamnei, ti anganna te boki ao n tibwaua te berita are inanona ibukin te te tataro ma te nano ae koaua ni kan ataia bwa e bon koaua.
Inanon teniua te wiiki e iriira te taromauri, ao ti reitanako ara reitaki ma ngaia. Ti aki ataia bwa e a tia n a ana te mwaneka ae kakaawaki: e a tia n tataroakina ana Boki Moomon. Inanon tain ara reirei teuana, e tuangiira ibukin te bwai are e karaoia. E a tia n rangi ni kaatuua iangoan ara reirei are ti tibwauaia, ao e tangiria n tataro i bon irouna. E katorobubua ao n titirakina te Atua ngkana e bon koaua ana Boki Moomon. Te rau are e namakinna imwiin tiana n tataro e kakorakoraa nakon warekan riki te boki. Inanon warewarena, e namakina te Tamnei bwa e roko irouna.
N taekinan te bwai are e rinanona, e tuangiira, “I namakina riki ae I raka nakon are mai imwaaina. Te bwai teuana ae e a moanna ni kanoai te bwangabwanga ni kabane are iai inanon maiu are bon akea te bwai ae kona ni kanoaia. I namakina te kukurei ae bati are N nang tang. I aki kona ni kakoaua te bwai are I namakinna, ma I ataia bwa Tamau are i Karawa e a tia ni kaekaai, bwa E ataai, ao bwa E tangirai n te aro are e kona ni kakauongo nakoiu ao ni kaekai au tataro.”
I namakina te kukurei ae bati inanou ngke e taekina te bwai are e rinanona. I ataia bwa ae I mena iaon te tano ae tabu n te tai anne. Te Tamnei ae Raoiroi e kamatoa nakoiu bwa ana taeka a bon koaua. Man ana kakoaua I kauringaki man ana tangira Tamara are i Karawa ae korakora ibukira; E rangi n tangiriira are E a tia n anganiira ana Boki Moomon bwa te bwai ni mwakuri ibukin ataakina ao Ana koaua. Ngkana ti ongotaeka nakon reirei ake a kuneaki inanon ana Boki Moomon, maiura a na bitaki.
I teimatoa n uringnga aron banen te reirei anne. Te titita e titirakiniira, “Terana ae riki ngkai I ataia bwa e bon koaua ana Boki Moomon?”
“Ko na bwabetitoaki,” ti kaeka.
Ana kaeka e rangi ni beebete ma e kaota matoan ao itiakin ana kakoaua: “Ngkanne N na bon bwabetitoaki.”
Ana Boki Moomon iai mwaakana ni buokiira ni kunea te kukurei ao te rau. Ngkana ti warekia, ti na karikirakea te kakatai ae teimatoa ni maiuakinan ana euangkerio Iesu Kristo n aron ae e kataia te titita aei n irii ana banna ni katoto te tia Kamaiu inanon te ran ni bwabetito.
Kamataata iroun Kathleen Peterson