Kaitarai Boong aika a na Roko ma te Kantaninga
Karimoakin te Uea, Abanueana, ao ara utu ni moanibwaii e na anganira te kantaninga are ti kainnanoia ni kaitarai kakaewenako aika ngkai ao aika a na roko.
Te Tari ae Arnaldo Teles Grilo e riki bwa temanna mai buakoia raoraou ngke I a kania au kauabwi ma nimaua n ririki. N te ririki ae 62, Te Tari Grilo, imwiina te intinia ae a tia n riitaea, e weteaki bwa temanna mai buakoia au kauntira n te beretitentii are e a riki imwiina bwa te Oeiras Portugal Mwakoro, ike ti beku iai ni kabane ibukin ririki aika a bati.
Wanawanana ao te bwai are e a tia n rinanona e katauraoa nakoiu, te tia kairiri n te nakoanibonga ae kairake, reirei aika a kakawaki aika a mwaiti, ao te ataibwai. Iai ana kantaninga ao ni kakabwaiaki man rikina, e aki toki n iangoi itera aika a tamaroa ni bwaai nako aika a riki ao e tamaroa anuana ni manikangare. Kateina bon te bwai ae korakora ana anainano nakoia ake e kaan ma ngaiia ao nakoiu bukina bwa I atai kakaewenako aika a kanganga are e rinanona.
Imwiin ana angabeeba n aron ae te intinia, te Tari ae Grilo e kaaina te National Agronomic Agency n aron te tia kakae i Portugal ao imwiina e mwananga nakon teuana mai buakon ana korone Portugal i Aberika ni kaira te karikirake ni kakae iaon kunnikai. Te karikirake anne e kairia nakon ana mwakuri are e a kakabwaiaki iai n aron ae te tiinia n tararua n te bangke n te aba anne. Inanon 30 te ririki i Aberika, e katea ana utu ae moan te tamaroa ao n noora kakukurein te maiu ni karokoa ae ana utu a kairoroaki bwa ana okira Portugal ibukin kabuanibwai n tei itabarabara ma te buaka.
Te Tari ae Grilo ao ana utu a katikui imwiia aia bwai ni kabane are a tia ni mwakuri ibukiia—aia bwai ni kabane ao aia bwai aika a onoti—imwiin noorakina i bon irouia korakoran mwiin te urubwai n te buaka iaon abaia are a tatangiria.
N aki ongei kanganga ao mangaongao are a riki n te buaka are e a kararoa te rau ni kabane ao te teimatoa inanon kabanean ana namwakaina i Aberika, te Tari ae Grilo e kamaiua temanna mai buakoia raoraona man anganakin teuanne te kaa are rangin bobuaka are e a tia ni kaboa i Tiaman. Te kaa e kariaia raoraona ao tinan raoraona ni birinako man te buaka.
Mwaitin kaubwain bwaai n te maiu man te mwakuri korakora are a tauraoi ibukin Te Tari ae Grilo a aki bitii baika a moanibwai irouna. E teimatoa n taui reirei aika a matoatoa ao te tangira ibukin ana utu.
N okirikaki nakon Portugal n ana ririki 52, e kaitara koauan moanbwain maiuna ae man te akea. Ma ni kabane kakaitara ao kabuanibwai are a riki, tera ae karika te kaokoro ni maiuna? E aera ngkai e rangin raoiroi ibukin boong aika ngkai ao aika a na roko? E aera ngkai e aki nanououa?
Te Tari Grilo e rairaki ni moan bongin te Ekaretia i Portugal ao e riki bwa te anainano ae matoatoa ao te bwaeoniia n te aba anne. N taai aika a bati e kaira ana utu nakon te tembora i Switzerland, ni mwananga n 2,800 te maaire (4,500 kiromiita) te mwananga ae bwanin ni kaotakin te onimaki ao te anganano. Inanon ana ririki ni ibuobuoki, te Tari Grilo ao kainabana a uota te kimwareirei nakoia natiia ao tabeman aika a mwaiti.
Ana onimaki te Tari ae Grilo e boboto iaon Iesu Kristo ao te rabakau are n te kabane, Iesu Kristo E na tautaeka. Aio e anganna te kantaninga ibukin boong aika ngkai ao boong aika a na roko.
Te Nu Tetemanti e kamotia ma rongorongon te kantaninga ae korakora.1 Burabeti n aron Ioane te Tia Kaotioti e noori bwaai ake a na roko ao e tuangiira ibukin kakabwaia ake ti na karekei ngkana ti teimatoa n raoiroi ao n teimatoa n ua te toki.
Ioane e noora te boki ma kabaeana ma kanikinaeana ake itiua, ke n te tai aio, ao e kabwarabwara bwa e kanga Tatan n un n taainako ni kaitara te raoiroi (see Te Kaotioti 5:1–5; 6). Ma Ioane e noora naba Tatan bwa e na kabaeaki ao Iesu e na tautaeka inanon te tokanikai (taraa Te Kaotioti 19:1–9; 20:1–11). N te kabanea e nooria aika raoiroi ni maeka ma te Atua imwinn te Kabanea ni Motikitaeka (taraa Te Kaotioti 20:12–15).
Teuana mai buakon kakaewenako aika a korakora n te bong aio bon reiakinam ni kaitara te maaku ao te bwarannano bwa ko aonga n tokanikai iaon taian kakatai ao kariri. E bon ti anaa tabeua te tai ibukira ni kauka te nuutibeebwa, ni kakae iaon te intanete, ke n ongo katanoata ibukin rongorongo iaon te reerio ke terewition ni kaitara ma te raraoma n te bukinaki n riaoan te tua ao kanganga aika a bon kaoti ni katoabong.
Ni matatara n taian berita inanon booki aika a tabu ni kaineti bwa e kanga te Uea n tokanikai iaon te buakaka ao e kanga te koaua n tokanikai iaon te kairua e kona ni buokira ni kaitarai boong aika ngkai ao aika a na roko ma te kantaninga ao te kakabwaiaki. Ni boong aikai n te aonnaba ti noora te buaka, kanganga aika a riki, ao kanganga ni kaubwain te aba. Inanon te tai bwaai aikai tiaki tii bwaai aika ti taratarai mai kiraroa ma bwaai aika ti rootaki iai n onoti.
Akea kainnanoana iroura n tanginiwei ni kaubwain te aba ke ni kabanea ara tai iaon bwain te aonaaba, ibukin bwaai ake a kona ni buribaira man kimwareirein, bwaai n te maiu aei.
I kakaitau ibukin ana katotoo te Tari ae Arnaldo Teles Grilo. E kawakin moa bwaai aika bwain te maiu n tamnei, bwaai “aika a koro kakawakia nakoi[ra] ni boong aika kaitira” (2 Nibwaai 25:8), n reitaki ma ana reitaki te utu ao te mwakuri n ibuobuoki nakoia tabeman.
Ti riai ni kabane ni kaitarai boong aika a na roko ma te kantaninga bukina ti ataia bwa ana kairoro te buakaka e na tokanikai te aba iaona. Ti riai ni kabane ni kateimatoa te taratara ae tamaroa ngkai ti kaitarai kakaewenako bukina n te bong aei iai iroura booki aika a tabu, aia reirei burabeti aika a maiu, te kariaia man te nakoanibonga, tembora, ao aia boutoka membwa n te Ekaretia n tatabemaniia nako. Ti riai ni kabane n tokanikai iaon Tatan man uaan te tataro (D&C 10:5). Ao ae kabanean te kakawaki riki, bwa kam na karekea te kantaninga rinanon ana mwakuri ni kamaiu Kristo ao mwaakan mangautina, bwa kam na kateirakeaki nakon te maiu are akea tokina. Taraa Moronaai 7:41).
Ngkana a eti ara moanibwai, ti na maiuakina te maiu ae teimatoa mani kakabwaiaki. Karimoakin te Uea, Abanueana, ao ara utu ni moanibwaii e na anganira te kantaninga are ti kainnanoia ni kaitarai boong aika ngkai ao aika ana roko.
Te Tari ae Arnaldo Teles Grilo—n te tamnei ae n te angatai inanon 1956 ao ieta inanon 1960 ma te kaa are e angan raoraona ni buokia ni birinako man te buaka—ni katikui ana bwai ni kabane are e a tia ni mwakuri ibukiia, ma e teimatoa n taui reirei aika a matoatoa, ana tangira ibukin ana utu, ao ana onimaki iroun Iesu kristo.
Te Kauaoki, iroun Harry Anderson © IRI
Angamaing: anganano n te tamnei iroun Unimwaane Teixeira; angatai: tamnei Bern Switzerland Tembora