I Kan Tekateka iaon Rangan Iesu

Te Ara e tauaki

Tibura te mwaane bon tii aua ana ririki ngke e anaia te bureitiman n iteran te kawai. E taku bwa e na nakon ana auti Tibuna te unaine, taraan aenimaua te maaire (8 kiromiita) raroana.

Bon ana kauoua n tai ni birinako man aki kukureina mani mweengana, ni kataia ni kawarai. Inanon tabeua namwakaina imwiina, I ataia bwa te katabeaki ibukin kaikawakiia tibu te mwaane ao mwaanena uoman aika a uarereke e nang riki ngkai bwa tabeu―te iango are I tuai n tauraoi ni butimwaeia.

Ngai ao kainnabau ti karaoa ara kabanea n tamaroa ni kaikawaiia natira ma reirein te euangkerio, ma aki butimwaei reirei akanne. I a riaon au ka 50 n ririki ao n namakinna bwa n te kabanea ao I bon inaomata ni ira are I tangiria. I kawakina te kouru are I a tia n tibwauaia ma kainnabau ni karaoan ara mwakuri ni mitinare ngkana e a riitaea. Te iango n te nako ni boobwai ma ataei aika a tuai n roro n nako n reirei, katauraoan taai n amwarake, karaoan ngaa ni kunnikai aika a na uatiiaki, ao boong rimii ni manga riki bwa tinaia te roro ae tebwi tabun e karika te tang.

Te bwakantaai teuana, ma e ngae n anne, iai te bwai teuana ae bita nanou. Te bwai ae uarereke ae karawawata nanon tibu te mwaane, ngaia are I a katoka iaon rangau ao ni kaoi rannin matana. Ngke I taua, ti maroroakinna bwa mwaitira tangirana iroun Iesu. N uaakan ma ngai iai au karenta ae tine n te oo ae korotamneiaki n tamnei te Tia Kamaiu, ngaia are ti matakuakin tamnei aikana a tamaroa akanne teuana imwiin teuana.

Tibu te mwaane e mamate nanona n tamnein te Tia Kamaiu n tekateka iaon mataroan te atiibu ma, te teinaine ae uarereke ae buraun irana iaon rangana. N te tamnei, te Tia Kamaiu ao te tei a kaota te rau. Tibu te mwanne e taraa te tamnei ni kaania ni kotea te teinaine, ao ni weteia n aran mwaanena.

“E kanga n tekateka Katie iaon rangan Iesu tibu te unaine” e titiraki. “I kan tekateka iaon rangana naba!”

“Ko aki kona n tekateka iaon rangan Iesu ngkai, mamaten nanou, ma ko kona n tekateka iaon rangau,” I taetae. “Iesu e anganiia ataei aika uarereke tibuia te unaine bwa a na tangiriia ao n tauiia ao n tararuaiia ngkana a kainnanoia.”

N te tai ae waekoa ao nanou e mwaneaki n te nano n tatangira ni boong aika rimwi―n aron te Tia Kamaiu ae tangiriia―teniman ataei aika a tangiraki ake a kainnanoai. A bon aki riki ngkai bwa bwaai ni karawawata ma ai te kakabwaia ae kamimii ao te tai ni beku ibukin te Uea.

N na boni kakaitau n aki toki ibukin ana nanoanga te Uea are e anganai n te bwakantaai anne. E bita maiu ao n teimatoa ni kakorakorai ao ni kakabwaia mweengau.