Ko Riai Moa n Tataro
Martins Enyiche, Nigeria
I a kuri ni kitana te Ekaretia iaon te kakauntaeka ma au beretitenti n te titeiki. I namakinna bwa e a tia ni karaoa te bwai teuana ae aki eti. Ana mwakuri e aki kaota te kawai are I taku bwa bwaai a riai n riki n aroia, ngaia are I a katoka nanakou n taromauri.
E tuangai kainnabau, “Ko aki kona ni karaoa te babaire n ai aron anne n akean tabeua tataro aika nanonaki raoi ao te aki mamatam.”
E boni koaua. Imwiin are I a tia n tataro tabeua te tai, a kaoti taeka nakoiu n ae rangin itiaki ao ni kaineti: “Ana toro te Atua e weteaki mairoun te Atua.”
N te tairiki anne I a mii. Inanon miiu tibu teunimwaane e katokai man uniu ni kaitara au tia kairiri. Imwiina ao I a uti man miiu ao n aki kona ni matu nikarokoa banen te tairiki anne. Imwiin te tairiki ae abwabwaki n iangoakina raoi, I a ataia bwa tera ae N na riai ni karaoia. I nakon au beretitenti ao ni kabwara au bure. E kukurei ni butimwaea au kabwarabure, ao ti uaia n tataro.
N te tai ae waekoa I a okira te taromauri. Uoua te wiiki imwiina e a kamwaingai au bwaoti nako Abuja, kautuun Nigeria. Baffled, I mimii bwa bukin tera ngkai I kamwawaki man te titeiki imwiin au konabwai ni katamaroa arou.
I reireinaki n ae waekoa imwiina bwa te Uea e katauraoai. Inanon au kauoua n namwakaina i Abuja, I weteaki bwa te beretitenti n te mwaanga.
I kakoaua bwa Tamara are i Karawa e tangiria n reireinai kakawakin kamatoakia taani kairiri n te Ekaretia imwaain ae E weteai bwa te tia kairiri. Te taneiai aei e kakorakora au koaua. Ngkai I kataa au kabanea ni kona ni kakauongo nakon aia reirei au tia kairiri bukina I ataia bwa a weteaki iroun te Atua. Ao temanna are E weteia, E bon tau.1
Ara tia kairiri bon aomata. E ngae ngke a kairaki n ana kairi te tamnei, a bon aki kororaoi, I reireinaki bwa ngkana ti aki nanoraoi irouia, ti riai ni boutokaia, kaungaia, ao n tataro ibukia ao ibukira bwa ti aonga n onimakina te Atua ao tooro are E a tia n rineiia.