Beeku n te Ekaretia
Te Reirei E A Kaman Ataaki Iroun te Tia Kanreireinaki
Ngkana ti butimwaai aia konabwai taan kan reireinaki n tatabemaniia nako aika tamaroa, ti moanna n noora ae nooria te Atua.
Ngke i nakon katabeakiu man te Ekaretia i Cusco, Peru, kaain abau ao Ngai ti ira te kiraati n te Bootaki n Aine ao te Nakoanibonga ae te Merekitereka ae bootaki. Te tia reirei n te bong anne bon te tia reirei n reirein te Euangkerio ibukiia ikawai. Bukina bwa a taetae inanon bootaki aika uoua aikanne, ai bon ti 20 te miniti nikiran te tai ibukina n anga reirei iaon te bwai ae a tia ni katauraoia.
E moanna man tuangakiia membwa ni kabane bwa a na teiraki ake a tia ni kaaina te Ekaretia inanon te maan ae uoua te ririki n nako. Niman membwa aika a teirake. E korea te nambwa 5 iaon te burakibooti ao imwiina e taku, “Tariu ao mwaneu, e kakukurei bwa iai 5 membwa ibuakora aika a tibwa kaina te Ekaretia. Ti te kanganga bwa inanon uoua te ririki n nako, ao ti bwabetitoia 16 aika tibwa rairaki n te uoote aei.”
Imwiina e korea te nambwa 16 irarikin te nambwa 5 ao ma te ingainga n nano ae korakora e titiraki, “Ngaia, tariu ao mwaneu, tera ae ti na karaoia?”
Te titita e tabeka baina ao e taku, “Ti riai n nako ni kakaeia ao ni kaokiia.”
E kariaia te tia reirei ao imwiina e korea te taeka te kamaiuia iaon te burakibooti. “Iai 11 membwa aika boou aika ti na kaokiia,” e kaeka.
Imwiina ao e wareka te rongorongo mairoun Beretitenti Thomas S. Monson ibukin kakaawakin te kamaiu. E wareware naba man te Nu Tetemanti bwa e kanga te Tia Kamaiu n rimwiia ana tiibu aika bua (taraa Ruka 15:6). Ngkanne e titiraki, “Ngkanne ti na kanga ni kaokiia?”
A tei baai, ao e wetea temanna te membwa imwiin temanna. Iai aia iango kaain te kiraati bwa a na kanga aia utu n te mweenga ke n tatabemaniia nako ni uaia ni mwakuri ni buokia ni kaokiia aika tibwa rairaki nakon te ekaretia. Ngkanne e titiraki te tia reirei, “Ngkana ko nakonako inanon te kaawa ao n noora te mwaane ae ko kinaa bwa ngaia temanna mai buakoia aika tibwa rairaki n iteran te kaawa, tera ae ko na karaoia?” E taku temanna te membwa, “N na kawaria ao n taetae nakoina. N na tuanga bwa ti rangin ni kainnanoia bwa e na oki ao n ingainga nanora bwa e na manga raoniira.”
Tabeman n te kiraati a kariaia ao n anga tabeua iango bwa ti na kanga ni buokiia membwa aikai. Iai te nano ae ingainga n te ruu, te nano ae korakora ni karaoa te bwai ae riai ni karaoaki ni buokiia membwa aika tibwa rairaki aikai ni buokiia ni kaokiia nakon bwaninin waaki ni kakukurei.
Ngai ma kaain abau ti kiitana te reirei aei ma te nano ae boou ni karaoa te bwai teuana iroura ni buokia ni kaoka temanna nakon waaki ni kakukurei n te Ekaretia. I namakinna bwa ni kabane kaain te kiraati a okirikaaki ma te namakin ae aekan anne. Imwiin te atatai anne, I titirakinai i bon irou: Tera ae karika nakoraoin te reirei ae uarereke aei? Bukin tera bwa aomata ni kabane a kitana te kiraati ma ungannanoia ni kani maiuakina te euangkerio?
Ngke I tabe n iangoi titiraki aika uoua aikai, I kunei aua reirei ake a karika te kiraati aei bwa te kiraati ae nakoraoi reireinakiia ao te namakin n angareirei ae nakoraoi:
-
Te Rairaki bon te botoniango.
-
Te tangira bon te kaantaninga.
-
Te reirei bon te kiing.
-
Te Tamnei bon te tia reirei.
Te Rairaki Bon te Botoniango
Nakon katakina ni “‘kaon aia iango kaain te kiraati ma rongorongo,” n aron are e a tia Beretitenti Monson ni kauringiira n aki karaoa, te bwai ae kataia ni karaoia te tia reirei aei “ni kaungaia n tatabemaniia n iangoia, n namakinna, ao ni karaoa te bwai teuana ibukin maiuakinan te euangkerio.”1
Ni kauarerekeana, ana botoniango te tia reirei aei bon buokaia kaain te kiraati ni karaoa te bwai ae a na tia n aki karaoia ngke arona bwa aki ira te kiraati. Ao te mwakuri anne e karaoaki bwa e na buokiia n tatabemaniia nako bwa a na riki bwa ana reirei ni koaua te Tia Kamaiu.
Te kantaninga ibukin te reirei aei bon ibukin te rairaki. Te taeka ae te rairaki nanona bon te rairaki nakon te kawai ae boou, ni kamatoa te katei ae boou. Te rairaki—n riki bwa te tia reirei ni koaua—bon tiaki te bwai ae kai toki ma te mwakuri ae teimatoa.2 N te kiraati aei te mwakuri ae karaoaki irouia kaain te kiraati e iangoaki bwa e na buokiia tiaki ti kaain te kiraati ma aika ana rairaki irouia membwa. N tainako ngkana ti maiuakina raoi ana reirei te euangkerio, temanna e na kakabwaiaaki mai irouna ke rinanon aia mwakuri tabeman. Ibukin aei, reirei ao reiakinan te euangkerio boni bwaai aika onoti. Nakon ae e tii kaineti nakon ukoukoran te rabakau, reiakinan te euangkerio e kaineti nakon rairakim ibon iroum.
Te Tangira Bon te Kaantaninga
Ngke I ira te kiraati i Peru, I kona n namakina te tangira iroun te tia reirei ibukiia naake a roko ao ibukiia aika tibwa rairaki ae kaoia kaain te kiraati bwa a na kamarurungiia. Te tangira e taraa ni kaona te ruu—mairoun te tia reirei nakon te tia kan reireinaki, mairoun te tia kanreireinaki nakon te tia reirei, mairoun temanna te tia kan reireinaki nakon temanna, ao mairouia taan kanreireinaki nakoia aika tibwa rairaki.
Te tangira e buokiira ngaira taan reirei n anga reirei n aron are e na karaoia te Tia Kamaiu ngke arona bwa E mena n ara umwanreirei. Ni koauana, “te tangira e kaumakiira bwa ti na tauraoi ao n anga reirei n te aro ae kaokoro.”3
Ngke arona bwa a na kantaninga te tia reirei bwa e na anga ni kabane kanoan te bwai n reirei, e na kabanea a na tai te tia reirei iaon kanoan te reirei nakon kainnanoia taan kanreireinaki n tatabemaniia. Te tia reirei mai Peru e taraa n ae akea nanona ni kan reiakina te bwai teuana. E ti tangiria ni kaungai nanoia kaain ana kiraati bwa a na bane n nako nakoia tariia ma mwaneia n te tangira. Te tangira ibukin te Uea ao te tangira ibukira n tatabemaniira nako e karika te nano ae korakora. Te tangira bon te kaantaninga. Ngkana te tangira bon ara kaantaninga, te Uea e na kakorakoraira ni kakoroa nanon Ana kaantaninga ni buokiia Natina. E na anganiira te kaungaira ma te bwai ae ngaira taan reirei ti kainnanoia n taekinna ao ni kanga ngaira n taekinna.
Te Reirei Bon te Kiing
Te tia reirei mai Peru e aki wareware man te reirei n te bokinreirei ngke e anga reirei. E anaaki nanou bwa e kabongana te bokinreirei ke taetae man taian maungatabu ni katauraoi ibukin te kiraati, ma ngke e angareirei, e angareirei man booki aika tabu. E karakina rongorongon te tiibu ae bua ao ni kaokioka te kibu aei: “Ao ngkana ko a manga rairaki ao ko na kateimatoaia tarim” (Ruka 22:32). E tibwaua ana kakao Bereitenti Monson nakoia membwa ni kabane n te Ekaretia bwa a na kamaiuia naake a tia ni bua kawaia. Reirei i nuukan ana reirei bon te onimaki ao te tangira. Kaain te kiraati a kainnanoa te onimaki ae tau bwa ana kona ni karaoia, ao a kainnanoia bwa a na karaoia ma te tangira.
Ngkana reirein ana euangkerio Iesu Kristo ae kaokaki a reiakinaki ma te mataata ao te aki nanokokoraki, ao te Uea e na kakorakoraia taan kanreiakinaki ao te tia reirei. Ngkana a mwaiti aia iango membwa aika anga ibukin kawarakiia tariia ao mwaneia aika aki kakaonimaki, ao a na kaan riki aomata n tatabemaniia nako nakon te Tia Kamaiu, ae teimatoa ni kawariia tabeman n Ana tai ni mwakuri n te aonaaba. Te reirei bon te kiing nakon reirein ao angareirei n te euangkerio. E kaukii naano. E kaukii iango. E kauka kawain Tamnein te Atua ni kaungaia ao n reireiniia ni kabane aika roko.
Te Tamnei Bon te Tia Reirei
Taan reirei n te euangkerio aika raraoi a ataia bwa tiaki raoi taan reirei ni koaua. Te euangkerio e reireiaki ao n reiakinaki rinanon te Tamnei. N akean te Tamnei, reirei iaon koauan te euangkerio aki kona n reiakinaki (taraa D&C 42:14). Mwaitin te tai ae anga te tia reirei te kakao mairoun te tamnei ae raoiroi ni karaoa te mwakuri, ao e na rangin ni korakora riki ana mwakur te Tamnei ae Raoiroi n tain te reirei. Te tia reirei mai Peru e anga te kakao mairoun te Tamnei. Ngaia ae ngkana a kaeka kaain te kiraati ma aia iango, namakinan te Tamnei e rikirake ao e kakorakoraia n tatabemaniia nako.
Te tia reirei e aki kataia n anga te reirei. Ma, e kataia ni kaoka te reirei are e a kaman ataia te tia kanreireinaki. Man kaoaia kaain te kiraati rinanon mwaakan te Tamnei, te tia reirei e buokiia membwa ni ukoukora oin nanoia ni karaoia—ni kawariia tariia ao mwaneia n te tangira. Ngke a tibwauai aia iango kaain te kiraati, a kaungaia bon irouia bukina bwa a ikotaki n nakon te Tamnei.
Ngkana ti kataia ni maiuakina te euangkerio ni buoakia kaain rarikira, te Uea e na kaungaira n te bwai ae ti riai ni karaoia. Ngaia are ngkana n tabeia taan reirei ti tangira te Tamnei bwa e na raoniira inanon ara kiraatiruum, ti na ti kainnanoia ni kaoia kaain te kiraati bwa ana maiuakin reirein te euangkerio ni kabane. Ngkana ti angananora bwa ti na maiuakina reirein te euangkerio ni kabane, ti kaniira riki nakon te Atua ao te Atua e kaniira (taraa D&C 88:63).
Te Kaantaninga Ibukiia Taan Kanreireinaki N Tatabemaniia Nako
Tiaki reiakinna ao n anga reirei n te euangkerio ibukin tii te kantaninga ni karekean te wanawana. Ti reiakinna ao ti reireia te euangkerio ni karekea te karietataaki. Kamatebwaian ao reiakinan te euangkerio tiaki ibukin reirei iaon koaua, ma bon ibukin kabanean aroia taan kanreiakinaki. Tabera ngaira kaaro ke taan reirei bon buokaia taan kanreiakinaki ke taan reirei bwa a na ukoukora te reirei inanon oin nanoia ao aia iango.
Ngkana ti kakoaua aron aia konabwai taan kanreireinaki aika tamaroa n tatabemaniia, ti moanna n noora are e nooria te Atua. Ngkanne ti kona n atonga te bwai ae E na tangiria bwa ti na taekinna ao ni karaoa te bwai ae E tangiria bwa ti na karaoia. Ngke ti waaki inanon te kawai n reirei ao n angareirei aei, te rairaki bon ara botoniango, te tangira bon ara kaantaninga, te reirei bon te kiing, ao te Tamnei bon te tia reirei. Ngkana ti reirei ao ti angareirei n te kawai aei, te Uea e na kakabwaia te tia kanreireinaki ao te tia reirei are a na kona ni karikirakeaki iai ni kabane (taraa D&C 88:122).
Kamataata N te Tamnei iroun Hyun-Gyu Lee; Ran ni Kamaiu, iroun Simon Dewey
Kamataata N te Tamnei iroun Craig Dimond and Matthew Reier