E Volai Tu Beka e Yaloda na Vakabauta ni Veisorovaki i Jisu Karisito?

Mai vei Linda K. Burton

Peresitedi Raraba ni Soqosoqo ni Veivukei

Na vakayacori, maroroi, kei na rekitaki ni noda veiyalayalati ena vakadinadinataka ni sa volai vakaidina tu e yaloda na Veisorovaki i Jisu Karisito.

Kemuni na taciqu lomani, o ni tu e lomaqu kau vakasamataki kemuni tiko ena vica vata na vula ni noqu veinanuyaka voli na itavi veibolei oqo. E dina ga niu vakila noqu sega ni veiraurau ena itavi e vakatikori vei au, ia au kila ni sa ilesilesi mai vua na Turaga kivua na Nona parofita digitaki, o koya gona oqo, sa na via rauta vinaka. E vakavulica na ivolanikalou ni “ena vakayacori vakaidina na vosa [ni Turaga], se ra tukuna na [Nona] tamata.”¹

Na veivakadeitaki ni nona lomani ira kece na Luvena yalewa na Tamada Vakalomalagi sa dua na isolisoli vakamareqeti ka rau sala vata mai kei na ilesilesi oqo. Au sa vakila na Nona lomani keda vakayadua!

Me vakataki kemuni, au taleitaka na ivolanikalou! Ena ivola i Jeremaia eda raica kina e dua na ivolanikalou ka tara vakalevu sara na lomaqu. O Jeremaia a bula ena dua na gauna kei na vanua dredre, ia a vakatarai koya na Turaga me “raica taumada e dua na gauna ni inuinui ena nodra vakasoqoni vata mai na yalododonu ni Isireli”²—na noda siga. A parofisaitaka o Jeremaia:

“Ni sa oti na gauna ko ya, sa kaya ko Jiova, kau na tugana na noqu vunau ki na lomadra, kau na vola ki yalodra; ia kau na yaco meu nodra Kalou, ka ra na yaco ko ira me ra noqu tamata. …

“… Ni ra na kilai au ga ko ira kece, ko ira era sa tamata wale kei ira talega era sa turaga, sa kaya ko Jiova: niu na bokoca na nodra caka cala, ia na nodra ivalavala ca kau na sega ni nanuma tale.”³

Oi keda na tamata a raici keda o Jeremaia. Eda sa sureti Jiova li me vola na lawa, se ivunau, ki na yaloda? Eda vakabauta li ni veivosoti e rawa mai na Veisorovaki a vakaibalebaletaka o Jeremaia ni sa baleti keda vakayadua sara ga?

Ena vica na yabaki sa oti, a wasea o Elder Jeffrey R. Holland na veika a vakila me baleta na nodra vakabauta titobu na ivuvu ka ra se qai mate oti ga na luvedra ena nodra takosova mai na Buca o Salt Lake. A kaya, “Era sega ni cakava oqori me baleta e dua na parokaramu, era sega ni cakava oqori me baleta e dua na itaviqaravi raraba, era cakava baleta ni tu e yalodra na vakabauta ni kosipeli i Jisu Karisito, ka tu sara ga ena uto ni nodra sui.”

A vakamacalataka, ena yalomalumalumu:

“Sa ikoya duadua sara ga oya na sala e rawa kina vei ira na tinanigone me ra buluti [ira nodra isolisoli] ena dua na kato ni madrai ka tomana na ilakolako, ka kaya, ‘Na vanua yalataki e tiko ena dua na vanua e liu. Eda na yacova yani na buca.’

Sa rawa mera kaya oqori ena vuku ni veiyalayalati kei na ivunau kei na vakabauta kei na ivakatakila kei na yalotabu.”

A tinia ena vosa veivakauqeti oqo: “Kevaka eda na rawa ni vakayacora na vakasama oqori ena noda veimatavuvale vakakina ena Lotu, era na dui lulutu ga ki na kedra vanua donu na veika vuqa tale eso. Sa na rawa mera lutu laivi mai kina ena noda bula na veika ka sega soti na betena. A tukuni vei au ni qiqibili oqori e dau vakaiyalayala ga na kena iusana. Me vaka ga na nodra dodonu o ira na neimami itubutubu mera digitaka na cava ga mera kauta, na ika 21 ni senitiuri oqo ena vakavuna meda vakatulewataka, ‘Na cava e rawa meda biuta ena qiqibili oqo?’ Na ka bibi duadua sa ikoya na ka e tu e yaloda; sa ikoya na ka e tara sobu sara na uto ni noda sui.”⁴ Se, me kena matata, sa ikoya na ka e volai tu e yaloda!

Me vaka e dua na veiliutaki raraba vou ni iSoqosoqo ni Veivukei, keitou sa vakasaqara vagumatua sara na Turaga me keitou kila na veika e gadreva ka na vinakata o Koya me keitou biuta ena qiqibili ni iSoqosoqo ni Veivukei me tomana tiko na toso ki liu ni Nona cakacaka. Keitou sa vakila ni vinakata taumada na Tamada Vakalomalagi me keitou vukei ira na Luvena lomani mera kila na ivunau ni Veisorovaki i Jisu Karisito. Ni da sa kila oqori, vakakina ni na rabailevu na noda vakabauta, sa na vaka sara talega kina na noda gadreva meda bula savasava. Karua, ena neitou kila na bibi ni kena gadrevi na vaqaqacotaki ni veimatavuvale kei na vale vakayadua, keitou sa vakila kina na nona vinakata vei keitou na Turaga me keitou na vakauqeti ira na Luvena lomani mera marautaka ka nanuma tiko na nodra veiyalayalati. Ena kena maroroi na veiyalayalati, era na vaqaqacotaki na matavuvale. Kena itinitini, eda vakila na Nona vinakata meda cakacaka ena duavata kei ira na veimataisoqosoqo tale eso vata kei ira na noda matabete veiliutaki, ka gumatua ena nodra vakasaqarai ka vukei o ira era gadreva tu me ra tubu ena kena salatu. Sa neitou masu vagumatua meda na dolava yadua na yaloda ka laiva vua na Turaga me tawana kina na ivunau ni Veisorovaki, veiyalayalati, kei na duavata.

Ena rawa vakacava meda vaqaqacotaki ira na veimatavuvale se vukei ira eso tale vakavo ke toqai taumada tu ena dui yaloda e dua na titobu kei na tudei ni vakabauti Jisu Karisito kei na Nona Veisorovaki sega ni vakaiyalayala? Au via wasea ena bogi nikua ni kevaka e toqai tu e yaloda na tolu na ivakavuvuli ni Veisorovaki oqo, ena vakalevutaka na noda vakabauti Jisu Karisito. Au sa nuitaka ni kilai ni veivakavuvuli oqo ena vakalougatataki keda vakayadua se da vou ki na Lotu se da sa lewenilotu dede tu mai.

Vakavuvuli 1: “Na veika taucoko sara e veicalati ena bula sa rawa me vakadodonutaki ena Veisorovaki i Jisu Karisito.”⁵

Keitou, vata kei kemuni, eda vakadinadinataka na Veisorovaki ni noda i Vakabula, o Jisu Karisito. Na neitou ivakadinadina, me vaka na nomuni e sa toqai tu e yaloda, ena noda sa sotava tiko mai e vuqa na bolebole kei na veivakacacani. Ni da sega ni kila deivaki na ituvatuva ni bula marau ni Tamada Vakalomalagi kei na Veisorovaki ni iVakabula ni tiki lomadonu ni ituvatuva oqori, ena rawa ni vakavuna me ka ni veivakaleqai na bolebole oqo. Eda wasea kece na veivakatovolei ni bula. Ia e toqai tu ena yalodra na yalodina “Na veika taucoko sara e veicalati ena bula sa rawa me vakadodonutaki ena Veisorovaki i Jisu Karisito.”

Na cava na vuna e vakatara kina na Turaga meda vakararawataki kina ka sotava na veidredre ena bula oqo? Me kena itukuni, esa tiki ni ituvatuva ni noda tubu kei na toro cake! Eda “kaila ena reki”⁶ ena noda kila ni sa noda na madigi me da lako mai ki vuravura ka sotava na bula vakayago. A vakavulica o Elder Dallin H. Oaks, “Na saumaki ka gadrevi sa dau rawati cake vakarawarawa ena sotavi ni veika rarawa ka dredre, mai na tiko vakacegu kei na bula marau.”⁷

Na nona ivakaraitaki e dua na marama ivuvu yalodina e matanataka na dina oqo. A vakamau o Mary Lois Walker ni yabaki 17 vata kei John T. Morris e St. Louis, Missouri. E rau takosova na bucabuca vata kei ira na Yalododonu ena 1853, ni curumi yani na Buca e Salt Lake ni oti vakalailai na imatai ni vakananumi ni nodrau vakamau. Ena nodrau ilakolako e rau a sotava na leqa me vakataki ira tale eso na Yalododonu. Ia na nodrau kune rarawa kei na leqaleqa a sega ni oti ena nodrau yaco yani ena Buca e Salt Lake. Ena yabaki ka tarava ni sa yabaki 19 o Mary, a vola vaqo: “A sucu na luvei keirau tagane. … Ena dua na bogi ni sa vula rua se tolu … a vakasolokakanataka mai vei au e dua, ‘Ena yali mai vei iko na ka lailai oqori.’”

A malumu mai na gone dramidrami ena gauna ni vula ibatabata. “Keirau cakava na veika kece e rawa ni caka, ia sa toro sobu tiko ga na bula ni gone. A mani vakacegu yani ena ikarua ni Feperueri, kau sa gunuva kina na bilowai wiwi ni tawase mai vua na lewequ kei na noqu dra.” Ia a se bera ga ni cava na nona vakatovolei. A tauvi mate bibi talega na wati Mary, ka mai takali yani na nona bula, ni oti e tolu na macawa na takali ni luvena.

A vola vaqo o Mary: “A vakatalega kina oi au, niu a se yabaki gone, vakuwai ena gauna lekaleka ni 20 na siga, mai vua na turaga watiqu kei na luvequ e duabau ga, ena dua na vanua duatani drau vakadrau na maile mai vei ira na wekaqu vata kei na dua na ulunivanua dredre ka tu e mataqu, kau a diva meu sa mate talega ka laki sema vei rau na noqu daulomani.”

Tomana o Mary: “Au a taubale vata tiko kei na dua na noqu itokani ena dua na yakavi bogi ni Sigatabu, au nanuma lesu na nona sa yali [na turaga watiqu] kei na noqu galili bibi, ia niu a tagi toka au a raica rawa, me vaka e dua na raivotu ena noqu vakasama, na dredre levu ni bula au na sotava kau a vakila deivaki vakaidina. Sa tarai au e dua na yalolailai vakaitamera, baleta ni kila tu na meca na gauna me valuti keda kina, ia na noda [iVakabula, o Jisu Karisito,] sa qaqa me ia na veivakabulai. Mai na veivuke nei Tamada, sa rawa kina vei au meu vala vata kei ira kece na mataivalu ka vaka era sa tuva tu mera saqati au ena gauna oqo.”⁸

A vulica o Mary ena yabaki ni bula gone ni 19, ni Veisorovaki ena vakadodonutaki keda mai na veika kece e veisaqasaqa ki na noda bula oka kina na rarawa titobu.

Vakavuvuli 2: E tu na kaukauwa ena Veisorovaki me rawa kina vei keda meda vorata na turaga se marama vakayago ka yaco meda tisaipeli dina i Jisu Karisito.⁹

E tiko na sala me da kila kina ni da sa vulica e dua na ivunau se ivakavuvuli ni kosipeli. Sa ikoya na gauna e rawa kina vei keda meda vakavulica na ivunau se ivakavuvuli ena dua na sala me rawa kina vua e dua na gone me kila. E dua na ivurevure yaga duadua me vakavulici vei ira na gone mera kila na Veisorovaki sa ikoya na vosa vakatautauvata ka kunei ena dua na lesoni ni Lalai. Ena rawa me vukei keda oqo ena noda vakavulici ira na luveda, makubuda, se itokani ena so tale na vakabauta vakalotu ka ra gadreva me ra kila na ivunau yaga vakalevu oqo.

“E dua na [marama] a taubale tiko qai lutu ena dua na qara titobu sara [qai] sega ni rawa ni kaba lesu mai. Veitalia na ka [e] cakava, [a] sega ni rawa me lako lesu mai [vakaikoya]. Na [marama] a kaciva na veivuke ka marautaka ni dua e takoso tiko a rogoci [koya] qai biuta sobu ki na qara e dua na ikabakaba. Sa qai rawa [vua] me kaba lesu mai tautuba ni qara ka rawata tale na [nona] galala.

“Eda tautauvata kei na [marama] ena loma ni qara. Na ivalavala ca e tautauvata na lutu ki na loma ni qara, ka sega ni rawa meda lesu mai vakataki keda. Me vakataki koya ga a takoso tiko ka rogoca na tagi ni [marama] me veivuke, na Tamada Vakalomalagi a tala mai na Luvena e Dua Bau Ga me vakarautaka na sala ni dro. Na veisorovaki i Jisu Karisito e rawa me vakatautauvatani vata kei na kena biu sobu na ikabakaba ena loma ni qara; e solia vei keda na sala ni kaba lesu mai.”¹⁰ Ia na iVakabula e levu cake na ka e cakava mai na kena biu sobu na ikabakaba, o Koya e “lako sobu ki na loma ni qara ka vakarawarawataka vei keda meda vakayagataka na ikabakaba meda dro kina.”¹¹ “Me vaka ga na [marama] ena loma ni qara me kabata cake na ikabakaba, e dodonu meda veivutunitaka na noda ivalavala ca ka talairawarawa ki na ivakavuvuli ni kosipeli kei na cakacaka vakalotu ka kaba tani mai na noda loma ni qara ka vakatara me cakacaka na Veisorovaki ena noda bula. Ia, ni sa oti kece na veika e rawa ni da cakava, sa na vakatara na Veisorovaki meda rawa ni bula kilikili ka lesu ki na iserau ni Tamada Vakalomalagi.”¹²

Wale toka ga oqo a noqu kina na madigi meu sotava e dua na ivuvu ni gauna oqo, e dua na luvena yalewa lomani na Kalou ka se qai curuvou wale ga ki na Lotu e Chile. E tina sega ni vakawati ka rua na luvena gonetagane. Mai na kaukauwa ni Veisorovaki, sa rawa kina vua me biuta vakatikitiki na nona veika makawa ka saga vagumatua ena gauna oqo me yaco me dua na tisaipeli dina i Jisu Karisito. Niu dau vakasamataki koya, e dau lako mai noqu vakasama na ivakavuvuli a vakavulica o Elder David A. Bednar: “Sa dua na ka meda kila tiko ni a tadu mai ko Jisu Karisito ki vuravura me mai mate ena vukuda—sa ikoya oqori na iusutu ka yavu tiko ni vunau i Karisito. Ia sa dodonu vaka kina vei keda meda taleitaka na gagadre ni noda Turaga, mai na Nona Veisorovaki kei na kaukauwa ni Yalo Tabu, me mai bula e yaloda—sega wale ga ni mai dusimaki keda ia me vakaukauwataki keda talega.”¹³

Ena neirau veitalanoataka tiko kei na sisita mai Chile na noda tudei ena salatu ka na muataki keda ki na bula tawamudu, a vakadeitaka vei au nona saga vakaukauwa me tomana tiko na salatu. A sa gole tani mai na salatu voleka ni nona bula taucoko, ka vakaraitaka ni sa sega na ka “e tu mai kea” na tu vakatikitiki tani mai na sala, me na gadreva me suka lesu tale mai ki na nona bula. Sa bula tiko e lomana na kaukauwa e rawati mai na Veisorovaki. E sa volai tu e utona.

Na kaukauwa oqori e sega wale ga ni rawa kina vei keda meda kabata lesu mai na qara ia e solia tale ga vei keda na kaukauwa meda tomana tiko na sala dodonu ka rabailailai ka muataki keda lesu ki na nona iserau na Tamada Vakalomalagi.

Vakavuvuli 3: Na Veisorovaki sa ikoya na ivakadinadina cecere duadua e tu vei keda me baleta na loloma nei Tamada me baleti ira na Luvena.

Ena vinaka vei keda meda vakananuma matua na vakasama veiyavalati oqo mai vei Elder Oaks: “Vakasamataka mada na rarawa a luvuci Tamada Vakalomalagi ena nona solia mai na Luvena me mai vosota na veivakararawataki e sega ni vakasamataki rawa ena vuku ni noda ivalavala ca. Sa ikoya oqori na ivakadinadina cecere duadua ni Nona lomani keda vakayadua!”¹⁴

Na ivakaraitaki cecere oqori ni loloma sa dodonu me vakavuna veikeda yadua meda tekiduru ka vakavinavinakataka ena masu na Tamada Vakalomalagi ena nona lomani keda taudonu ka tala mai kina na Luvena e Duabau ga ka tawacala me mai vakararawataki ena vuku ni noda ivalavala ca, mosi ni yaloda, kei na veika kece sara e rairai cala ena noda dui bula vakayadua.

Nanuma na marama a tukuna wale tikoga oqo o Peresitedi Dieter F. Uchtdorf? Kaya o koya: “E dua na marama ka sotava tiko na veiyabaki ni veivakatovolei kei na rarawa ka kaya ena vosa tagitagi, ‘Sa yaco mai na gauna ni noqu vakila niu sa tautauvata e dua na noti 20 na dola makawa—kakalobilobi, kabasu, duka, vakacacani, ka vakamawe tu. Ia au se dua tiko ga na noti 20 na dola. Au se yaga tiko ga. E dina beka ni sa sega ni yaga vakalevu na kequ irairai ka dina ga niu sa yaviti vakaukauwa ka vakayagataki, au se yaga tiko ga ena taucoko ni 20 na dola.’”¹⁵

E kila tu na marama oqo ni o koya na luvena yalewa lomani na Tamana Vakalomalagi ka kilikili kaya na Nona tala mai na Luvena me sorovaki koya sara ga. Na marama vakayadudua ena Lotu e dodonu me kila na ka e kila na marama oqo—ni sa luvena yalewa lomani na Kalou. Ena tara vakacava na noda bula ni maroroya na noda veiyalayalati na noda kila na keda yaga Vua? Ena vakalevutaka vakacava na noda bula ni gadreva na qaravi ira tale eso, na noda kila na keda yaga Vua? E rawa ni vakalevutaka vakacava na noda gadreva meda vukei ira era gadreva mera kila vakataki keda na Veisorovaki, na noda kila na keda yaga Vua—me vakatitobutaki sara? Ena gauna e sa volai vakatitobu sara kina ki yaloda vakayadua na ivunau ni Veisorovaki, eda sa na qai tekivu meda yaco meda mataqali tamata e gadreva na Turaga meda vaka ena Nona lesu tale mai. Ena kilai keda vaka Nona tisaipeli dina.

Me vakavuna mada na tuli ni yaloda na “veisau levu” ka kauta mai na Veisorovaki i Jisu Karisito.¹⁶ Ena noda yadrava na ivunau oqo, ka kaburaka mai e dua na agilosi ni Kalou ni sa “itukutuku marautaki ni reki cecere,”¹⁷ Au yalataka ni da na vakila me vaka na nodra vakila na tamata nei Penijamini na Tui. Ni oti na nodra masulaka vagumatua sara me cakacaka ena nodra bula na Veisorovaki, “era sa vakasinaiti ena reki”¹⁸ ka sa “lomai keimami me keimami veiyalayalati kei na neimami Kalou me keimami vakayacora na nona lewa, ka muria na nona ivunau kece ga.”¹⁹ Na vakayacori, maroroi, kei na rekitaki ni noda veiyalayalati ena vakadinadinataka ni sa volai vakaidina tu e yaloda na Veisorovaki i Jisu Karisito. Kemuni na taciqu, ni yalovinaka ka nanuma na ivakavuvuli e tolu oqo:

“Na veika taucoko sara e veicalati ena bula sa rawa me vakadodonutaki ena Veisorovaki i Jisu Karisito.”²⁰
E tu na kaukauwa ena Veisorovaki me rawa kina vei keda meda vorata na turaga se marama vakayago ka yaco meda tisaipeli dina i Jisu Karisito.²¹
Na Veisorovaki sa ikoya na ivakadinadina cecere duadua e tu vei keda me baleta na loloma nei Tamada me baleti ira na Luvena.²²

“Ni sa oti na gauna ko ya, sa kaya ko Jiova, kau na tugana na noqu vunau ki na lomadra, kau na vola talega ki yalodra; ia ka na yaco meu nodra Kalou, ka ra na yaco ko ira me ra noqu tamata.”²³ Au sureti keda meda kerea na Turaga me vola na ivakavuvuli ni Veisorovaki oqo ki na yaloda. Au vakadinadinataka ni ra dina. Ena yaca i Jisu Karisito, emeni.