E Dua na iSolisoli e Sega ni Vakamacalataki Rawa e Solia na Kalou
Na Yalo Tabu e cakacaka ena duavata cecere vata na Tamada Vakalomalagi kei Jisu Karisito, ka vakayacora e vuqa na itavi bibi kei na ilesilesi digitaki eso.
Ena 1994, a sureti ira na lewe kecega ni Lotu o Peresitedi Howard W. Hunter me ra “tauyavutaka na valetabu … me sa ivakatakilakila cecere ni [noda] lewenilotu.”1 Ena yabaki vata tiko ga oya, a tara vakaoti kina na Valetabu e Bountiful, mai Utah. Me vakataka e vuqa na tamata, keirau a maqusa sara me keirau kauta na neirau matavuvale gone ki na siga dolavi raraba ni bera na kena vakatabui. Keirau a vakarautaki rau vakavinaka sara na gone me rau curuma na valetabu, ka masulaki ena yalodina ni na ka vakayalo vei rau me yaco kina na valetabu me iusutu bibi ni nodrau bula.
Ni keitou sa curuma yani ena vakarokoroko na loma ni valetabu, sa tekivu meu qoroya sara na kena itaratara totoka, na veitikina sa taucoko vakaoti, na rarama ni cina a basikata na katuba leka cere-i-cake, kei na vuqa na droini veivakauqeti sara. Na veituvaki yadua ni vale tabu oqo sa talei dina sara.
Ni keitou curuma na loqi vakasilesitieli, au vakila ni sa liliga tiko na yavaqu o Ben na luvequ tagane gone duadua yabaki ono. E vaka me rivarivabi o koya—ka sa vaka me lomaleqa.
“E vakacava, Luvequ?” au a vakasolokakana.
“Ta,” a sauma mai, “na cava e yaco tiko eke? Au se bera vakadua mada ni vakaoqo.”
Ena neirau kila ni sa ikoya beka oqo na isevu ni gauna me vakila kina na luvei keirau tagane na veivakauqeti ni Yalo Tabu ena dua na sala qaqa vakaoqo, au sa mani tekiduru e yasana. Ena gauna era tavali kina e yasai keirau na tamata, au a tucake vata tu kei Ben e kea me vica na miniti, ka veivakavulici me baleta na Yalo Tabu. Au kurabuitaka na rawarawa ni neirau veivosakitaka na nona vakasama vakayalo. Ni toso na neirau veivosaki, sa matata sara ni veika a vakauqeti duadua kina o Ben e sega ni veika a raica ia na veika a vakila—sega ni veika vakayago e rairai totoka e wavoliti keirau tu ia na domo lailai rogo vinaka ni Yalo ni Kalou e tiko e lomana. Au a wasea vua na veika au sa vulica rawa mai na veika au a sotava, me vaka ga na nona qoroqoro vakagone a vakatikora vei au e dua na yalo vou meu vakavinavinakataka na isolisoli sega ni vakamacalataki rawa oqo e solia na Kalou—na isolisoli ni Yalo Tabu.2
O Cei Mada na Yalo Tabu?
Na Yalo Tabu sai koya na ikatolu ni Lewetolu Vakalou, o koya gona, me vakataka ga na Kalou na Tamada kei Jisu Karisito, ni sa kila na noda nanuma kei na inaki ni lomada.3 E lomani keda na Yalo Tabu ka vinakata o koya me da bula marau. Me vaka ni kila tu na bolebole eda na sotava, sa rawa me na dusimaki keda ka vakavulici keda ena veika kecega me da cakava meda lesu rawa, ka laki bula vata tale kei na Tamada Vakalomalagi.4
E rau vakayago lagilagi na Tamada Vakalomalagi kei Jisu Karisito ena lewe kei na sui, ia na Yalo Tabu sa ituvaki vakayalo ni tamata ka veivosaki vata kei na yaloda ena noda dau vakila kei na vakanananu.5 Me vaka ni yalo vakatamata, e cecere na Nona itavi me idewadewa ni ivakatakila e solia ki na tamata yadua. Ena ivolanikalou, sa dau vakatokai tiko na Yalo Tabu me Yalo Savasava, na Yalo ni Turaga, na Yalo Tabu sa Yalataki Tu, se na Yalotabu.6
Na Cava na iLesilesi ni Yalo Tabu?
Na Yalo Tabu e cakacaka ena duavata cecere vata na Tamada Vakalomalagi kei Jisu Karisito, ka vakayacora e vuqa na itavi bibi kei na ilesilesi digitaki eso. Sa inaki taumada ni Yalo Tabu oya me vakadinadinataka na Kalou na Tamada kei na Luvena, o Jisu Karisito,7 ka vakavulica vei keda na dina ni veika kecega.8 Na ivakadinadina bula mai vua na Yalo Tabu e vakaraitaka e dua na veivakadeitaki e cecere cake mai na dua tale na ivakadinadina ni ivurevure tale eso. E vakavulica kina o Peresitedi Joseph Fielding Smith ni “gauna e vosa kina na Yalo ni Kalou ki na yalo ni tamata sa tu kina na kaukauwa me vakatikora na dina ena kena kaukauwa duadua kei na kena kilai vakavinaka cake mai na dua tale na dina e vakatikori ena gauna mada ga eda sotavi ira kina na kai lomalagi.”9
E kilai talega na Yalo Tabu me Dauniveivakacegui.10 Ena gauna ni noda leqa se veilecayaki se gauna ni noda gadreva kina meda kila ni sa tiko voleka na Kalou, sa rawa ki vua na Yalo Tabu me laveta cake na yaloda, solia vei keda na inuinui, ka vakavulici keda ena “veika kece ga ni noqu matanitu”11 ka vukei keda meda vakila ni “vakacegu ni Kalou, sa uasivia na ka kece ga e kilai rawa.”12
Ena vica na yabaki sa oti keitou a laki soqoni vakamatavuvale ena dua na kana vata ni gade, ka mani qito vata sara tiko kei na levu na makubuna o tamaqu. Vakasauri ga ka vakidacala, na nona a bale sobu ka mate totolo sara. Na ka tawanamaki oqo a rawa sara ga me veivakaleqai dina, vakabibi vei ira na makubuna, ka voqa kina eso na taro e dredre me saumi. Ia, ni keirau sa vakasoqoni ira vata mai na gone vei keirau, vakayacori na masu ka wiliki na nodra vosa na parofita ena iVola i Momani me baleta na inaki ni bula, a yaco mai na veivakacegui ni Yalo Tabu kivei keitou yadudua. Ena sala e dredre me vakamacalataki rawa ena vosa, na isau keitou vakasaqara a yaco mai vakamatata sara ki na lomai keitou. Keitou a vakila e dua na veivakacegui sa uasivita sara na veika keitou kila rawa, ia sa dei tu ga, sega ni vakabekataki ka dina na ivakadinadina mai vua na Yalo Tabu.
Na Yalo Tabu e qasenivuli ka daunivakatakila.13 Ni da vulica, vakasamataka vakatitobu, ka masulaka na veika dina ni kosipeli, ena vakararamataka na noda vakasama na Yalo Tabu ka vakayadrata na noda kila-ka.14 E vakavurea na dina me volai ki lomada ka rawa me vakayacora e dua na veisau levu ki na yaloda. Ni da wasea na dina oqo ki na noda matavuvale, kivei ira na wekada lewe ni Lotu, vata kei ira na itokani kei ira na noda veikilai ena itikotiko raraba, sa yaco me nodra qasenivuli talega na Yalo Tabu, ni sa kauta o Koya na itukutuku ni kosipeli ka “vakadewa ki na yalodra na tamata.”15
Ena dau vakauqeti keda na Yalo Tabu meda dodoliga yani vei ira na tamata ena veiqaravi. Vei au, na ivakaraitaki vinaka duadua ni kena rogoci na veivakauqeti ni Yalo Tabu ena nodra qaravi na tamata, a yaco ena bula kei na cakacaka vakalotu nei Peresitedi Thomas S. Monson, ni a kaya: “Ena qaravi ni noda itavi, au sa vulica ni gauna eda muria kina e dua na veivakauqeti vuni ka cakacakataka sara ena gauna vata ga oya, ena dusimaka na Tamada Vakalomalagi na vanua eda na lako kina ka vakalougatataka na noda bula kei na nodra bula na tani. Au sega tale ni kila e dua na ka eda sotava me kamica cake se taleitaki na kena vakilai mai na noda vakamuria e dua na veivakauqeti, me da qai kila ni sa sauma na Turaga na nona masu e dua tale mai vei keda.”16
Meu wasea e dua tale na ka veivakauqeti au sotava. Ena gauna a se bisopi tiko kina o Peresitedi Monson, a rogoca sara ni dua vei ira na lewe ni nona tabanalevu, o Mary Watson, ni curu tiko e valenibula. Ni gole yani me laki sikovi koya, a raica ni a davo vata koto kei ira eso tale na tauvimate ena dua na rumu levu. Ni sa yaco yani vei Sister Watson, a siqema rawa ni dua ka toka tikivi koya a ubia sara vakatotolo na uluna.
Ni oti na nona sikovi Sister Watson ka solia vua na veivakalougatataki ni matabete, a lululu vua, vakamoce, ka vakarautaka me lesu. Ia a qai yaco e dua na ka e veivakurabuitaki toka. Meu na wilika na nona itukutuku sara ga o Peresitedi Monson baleta na ka oqo:
“Au a sega ni rawa ni biuti koya. Ni sa vaka e tabaka tu vakadua na tabaqu e dua na liga ka sega ni laurai, kau vakila e lomaqu ni sa voqa tiko vei au na vosa oqo: ‘Gole ki na idavodavo e tarava nei koya na marama lailai ka ubia na matana ni ko curu mai.’ Au sa mani vakayacora. …
“Au mani torova yani na idavodavo nei koya na tauvimate oya, ka tara vakamalua na tabana ka dreta lesu vakamalua na siti ka ubi koya tiko kina. Au a kurabui! Ni o koya talega e lewe ni noqu tabanalevu. Au a sega ni kila ni a curu tale tikoga e valenibula. Na yacana o Kathleen McKee. Ni keirau veisotari mata, a vosa luluvu mai, ‘Isa, Bisopi, nomu curu mai ena katuba oya, au a vakila ni ko sa mai raici au ka mai vakalougatataki au me isau ni noqu masu. Au a marau lo toka ni ko na kila niu sa mai tiko oqo, ia ni ko mai gole ki na idavodavo ka dua, e rarawa na yaloqu, kau kila ni ko a sega ni mai raici au.’
“Au a kaya vei [Sister] McKee: ‘E sega ni dua na ka na noqu sega ni kila ni ko tiko eke. E ka bibi ga, ni sa kila tiko na Tamamu Vakalomalagi, ka ni ko a masulaka vuni mo vakalougatataki vaka-matabete. A vakauqeti au o Koya meu mai cereka laivi na kemu iubi.”17
E Vosa Vakacava vei Keda na Yalo Tabu?
Sa dau vakayaco-ka vei keda taucoko sara na Yalo Tabu, e dina ga eda sega beka ni dau vakila ena veigauna. Ni yaco mai na vakanananu veivakauqeti ki na noda vakasama, eda na vakadinata mai na yalo e vakilai ni curuma na lomada. A vakavulica o Peresitedi Boyd K. Packer: “E dau vosa na Yalo Tabu ena domo ko na vakila vakalevu cake mai na kena o rogoca . … Ni da tukuna tiko na ‘vakarorogo’ ki na domo lailai ni Yalo Tabu, e vakavuqa ni dua e vakamacalataka na veivakauqeti vakayalo ena kaya, ‘Au a vakila …’.”18 Mai na vakila vakalou oqo mai vua na Yalo Tabu eda sa mai kila kina na veika e gadreva na Kalou me da cakava, ni oqo, e vakatokai ena ivolanikalou, “na yalo ni ivakatakila.”19
Na Cava na iBalebale Meda Ciqoma na iSolisoli ni Yalo Tabu?
Ena nona vakavulici na luvei keirau tagane yabaki ono, o Ben, au nanuma ni bibi na kena vakadutaitaki vata na kedrau duidui na veika e vakila tiko, oya na veivakauqeti ni Yalo Tabu, vata kei na isolisoli ni Yalo Tabu ena laki ciqoma ni oti na nona papitaiso. Ni bera na papitaiso, o ira kece na dauvakasaqara na dina ena savasava kei na gugumatua era na rawa ni vakila na veivakauqeti ni Yalo Tabu ena veigauna eso. Ia, na madigi me ciqomi na vakaitokanitaki vakawasoma ni Yalo Tabu kei na taucoko ni veivakalougatataki veisemati sa vakarautaki duadua ga vei ira na lewenilotu bula kilikili, ka sa papitaisotaki ka ra sa ciqoma na isolisoli ni Yalo Tabu ena veitabaki ni liga mai vei ira era taura tu na dodonu ni matabete ni Kalou.
Mai na isolisoli ni Yalo Tabu, eda na ciqoma kina na ikuri ni vuku kei na isolisoli vakayalo, na vakalevutaki ni ivakatakila kei na veitaqomaki, na veidusimaki tudei kei na veituberi, kei na veivakalougatataki yalataki ni veivakasavasavataki kei na veivakacerecerei vakalou ena matanitu vakasilesitieli. E soli mai na veivakalougatataki taucoko oqo ni da sa gadreva dina vakai keda meda ciqoma ka yaco me salavata na noda bula vata kei na lewa ni Kalou ka vakasaqara na Nona veituberi sa tudei.
Niu raicalesu na veika au sotava vata kei Ben ena Valetabu e Bountiful, e malaude vakalevu na lomaqu kei na noqu vakanananu. E matata tiko vei au na gauna au a solegi tu kina ena totoka ni veika au rawa ni raica, ka a vakila rawa e dua na gone a tu e yasaqu na kaukauwa veivakauqeti ni yalona. Niu a vakavotui kina vakamalua, au a sureti meu kakua walega ni tu vakadua ka tekiduru ia meu vakarogoca na kaci ni iVakabula meu yaco me vaka e dua na gone lailai—yalomalua, yalomalumalumu, ka tu vakarau meu rogoca na domo lailai, rogo vinaka ni Nona Yalotabu.
Au sa vakadinadinataka ni sa bula tiko na Yalo Tabu kei na nona ilesilesi vakalou, kei na kaukauwa ni Yalo Tabu eda na kila kina na veika dina kecega. Au vakadinadinataka ni isolisoli ni Yalo Tabu sa isolisoli ka sega ni vakamacalataki rawa ka talei e solia mai na Tamada Vakalomalagi kivei ira taucoko era na lako mai Vua na Luvena, papitaisotaki ena Yacana, ka ciqoma na Yalo Tabu ni sa vakadeitaki ena Nona Lotu. Au sa vakadinadinataka kina na veika oqo ena yaca tabu i Jisu Karisito, emeni.