Vakalutuki na Yabaki Lavaki ni Veiqaravi Vakadaukaulotu

Mai vei Heather Whittle Wrigley

iTukutuku mai na Lotu kei na Soqo Eso

Ena kena dolavi na ika 182 ni Koniferedi Raraba Vakayabaki, a kacivaka kina o Peresitedi Thomas S. Monson, ni tekivu sara ga oqo, sa rawa ni ra laki kaulotu na tagane ni ra yabaki 18 kei na yalewa ni ra yabaki 19.

E muri ena dua na soqo ni tabana ni itukutuku, a vakabibitaka kina o Elder Russell M. Nelson ena Kuoramu ni iApositolo Le Tinikarua ni veisau oqo e dua na ka e rawa ni da digitaka: “E sega ni dodonu me ra tekivutaka na nodra veiqaravi na cauravou kei na goneyalewa kevaka era se bera ni vakarau tu vakayalo ka vakayago,” e kaya o koya. Na veika me vaka na vuli, ituvaki ni bula vakamatavuvale, kei na noda dui bula yadua e ra se ka bibi tikoga ena kena vakasamataki na gauna ni laki veiqaravi ena kaulotu.

E vakamacalataka o Elder Jeffrey R. Holland ena Kuoramu ni iApositolo Le Tinikarua ni sa rawa ni ra vakaturi o ira me ra laki kaulotu tudei mai vua na bisopi kei na peresitedi ni iteki ni vo e 120 na siga ki na ika 18 ni nodra siganisucu se ki na siga e rawa ni ra sa tekivu kina. E rawa vei ira na cauravou me ra curu yani ki na koronivuli ni vakavakarau ki na kaulotu (KVK) ni oti ga na nodra biuta mai na vuli torocake se dua na itabavuli tautauvata ka ra sa yacova na yabaki 18. O ira na yalewa e rawa ni ra curu ni oti na ika 19 ni nodra siganisucu.

Era sa kerei o ira era vakarau tiko ki na kaulotu me ra vakavinakataka cake na nodra vakavakarau ni bera ni ra lako yani ki na KVK.

“Sa vakatotolotaka tiko na Nona cakacaka na Kalou,” e kaya o Elder Holland. “Ka gadreva o Koya me levu cake tale na daukaulotu lomasoli ka bula kilikili me ra vakatetea yani na rarama kei na dina kei na inuinui kei na veivakabulai ni kosipeli i Jisu Karisito ki na dua na vuravura dau butobuto ka rerevaki ena vuqa na gauna.”

E kaya o Elder Holland na kena irairai ni rawa ni tauyavutaki tale eso na tabana ni kaulotu.

Me veivuke ena kena sotavi na tubucake ni iwiliwili ni daukaulotu e namaki ena veitabana ni kaulotu e veiyasai vuravura, sa na vakalailaitaki ena dua na ikatolu na gauna ni tiko ena KVK vei ira kece na daukaulotu. Ena veivuke ena nodra vakarautaki vakavinaka cake na daukaulotu e dua na vuli ni veituberi 12 na macawa ka se qai tekivu vakayagataki ga oqo.

Sa rawa vei ira na cauravou kei na goneyalewa ena gauna oqo me ra tekivu veiqaravi vakadaukaulotu ena yabaki 18 kei na 19, vakatau ena nodra ituvaki ni bula kei na nodra igu na iliuliu ni matabete.